Bapı: Armııa múgedek etýge múddeli emes

Foto: ashyq derekkóz

Sarbaz Erbaıan Muhtardyń tragedııasynan soń qoǵamda «balany áskerge jiberýdiń qajeti joq» degen pikir qaptap otyr. Májilis depýtaty Ermurat Bápı osyǵan alań, – dep habarlaıdy qandastar.kz.

«Bizde áskerdegi osyndaı jekelegen keleńsiz jáıtterdi jebeý etip, qoǵam men armııanyń arasyna jik salý tendenııasy etek alýda. Áskerdi qubyjyq retinde kórsetý úrdisin mass-medıa ókilderi de úrleı túsýde.

Reseıdiń Ýkraınadaǵy agressııalyq soǵysy turǵysynan qaraıtyn bolsaq, Qazaqstandaǵy ásker men qoǵamnyń arasyna osylaısha syna qaǵý óte qaýipti qubylys bolmaq. Áskerı orta sýbkontınenttik vakýmdaǵy qurylym emes, ol qoǵamnyń ózinen shyqqan, halyq daıyndap bergen áleýmettik bir top. Qoǵam rýhanı turǵyda qandaı dimkás bolsa, áskerimiz de sol syrqat qoǵamnan alysqa ketýi múmkin emes.

Sondyqtan  eldiń erteńgi qaýipsizdigin qorǵaıtyn áskerdi otbasynan bastap qalyptastyrýymyz kerek. «Otan –  otbasynan bastalady». Al Otandy qorǵaý – bul otbasyn qorǵaý degen sóz», – deıdi ol.

Aıta keteıik, sońǵy 3 jylda 270 áskerı qyzmetshi qaıtys bolǵan. Áskerı prokýrorlar onyń basty sebebin aýrý, jol-kólik oqıǵasy jáne ózine qol jumsaý saldarymen túsindiredi. Sarbaz Erbaıan Muhtardy da ájethanada qulap, basymen taqtaıshaǵa soǵylǵan dep málimdeıdi Ulttyq ulannyń áskerı bólimi.