«بارىستى» مامين اسىراسىن, جيعان-تەرگەنى بار شىعار». كلۋبتاردى قاشانعى مەملەكەت قارجىلاندىرادى?

فوتو: hcbarys.kz

پرەزيدەنت قاسىم-جومارت توقاەۆ كاسىبي سپورت كلۋبتارىن قارجىلاندىرۋدى توقتاتىپ, باسىمدىقتى بۇقارالىق سپورت تۇرلەرىنە بەرۋدى ايتقان. سوڭعى كەزدەرى سۇرەڭسىز ويىنىمەن كوپشىلىكتىڭ كوڭىلىن قالدىرىپ جۇرگەن كلۋبتار شىنىمەن دە مەملەكەتتەن اقشا الۋعا لايىق ەمەستىگى تالاي رەت ايتىلىپ كەلەدى. فۋتبول كلۋبتارىمىز ەۋرودودالاردا كوپكە بارمايدى, ال «بارىستىڭ» قحل-دا جارىتىپ جۇرگەنى شامالى, دەپ حابارلادى qandastar.kz 1bol.kz سىلتەمە جاساپ.

كەشە عانا ءوز ايدىنىندا «تورپەدودان» 1:10 بولىپ ۇتىلعانىن, ءتىپتى رەسەيلىك باسىلىمدار ەلوردالىق ۇجىمدى «ءولى» كلۋب دەپ جاتقانىن بۇعان دەيىن جازدىق. اشۋعا بۋلىققان جانكۇيەرلەر ويىن سوڭىندا قارسىلاس كوماندانىڭ اتاۋىن ايتىپ, سولارعا قوشەمەت كورسەتتى. وسى ورايدا قازاقستاندىق جۋرناليست ميحايل كوزاچكوۆ كاسىبي سپورت كلۋبتارىن مەملەكەتتىك قارجىلاندىرۋدان اجىراتۋدى قولداپ جازبا جاريالادى.

«بىزگە «بارىستىڭ» نە ءۇشىن كەرەك ەكەنىن تۇسىنبەيمىن. بۇرىن ونى ەلىمىزدەگى ساياسي بەدەلى مىقتى اسقار ءماميننىڭ ويىنشىعى دەيتىن. قازىر مامين ۇلتتىق وليمپيادا كوميتەتىنەن باسقا ەش جەردە جۇمىس ىستەمەيدى. بىراق «بارىس» ءبارىبىر ەل بيۋدجەتىنەن ميللياردتاپ قارجى الىپ وتىر. ەلىمىزدە وزگە دە حوككەي كلۋبتارى بار, ولارعا دا قوماقتى قاراجات جۇمسالىپ جاتىر. سويتە تۇرا ەرلەر قۇراماسى وليمپيادادا قاشان ونەر كورسەتكەنى ەسىمدە جوق, ءبىز ىرىكتەۋدەن دە وتە المايمىز عوي», – دەپ جازدى كوزاچكوۆ.

ءتىلشى فۋتبول كلۋبتارىنداعى جاعداي دا كوڭىل كونشىتپەيتىنىن العا تارتتى. تورەشىلىككە قاتىستى داۋ ءالى دە وزەكتى.

«فۋتبولدى الايىق, قازاقستان چەمپيوناتىنىڭ ءاربىر تۋرىندا تورەشىلىككە قاتىستى كيكىلجىڭ تۋىندايدى. تورەشىلەردى كىم ساتىپ الاتىنىنان شاتاسىپ كەتتىم: «ەلىماي» ما, «استانا» ما, الدە «اقتوبە» مە? بۇل جاقتا دا ءبارى سالىق تولەۋشىلەر ەسەبىنەن», – دەپ قوستى ول.

كوزاچكوۆ ميللياردتاپ اقشا جۇمسالىپ جاتقان تەننيسشىلەردەن دە پايدانىڭ كوپ ەمەستىگىن العا تارتتى.

«تاعى ءبىر مىسال, بولات وتەمۇراتوۆتىڭ تەننيسشىلەرى وليمپيادا الدىندا اياق استىنان اۋىرىپ قالدى, ولارعا مەملەكەت 2022 جىلعا دەيىن قارجى قۇيىپ وتىردى.

كاسىبي سپورتشىلارعا قانشا قاراجات كەتىپ جاتقانىن ءتىپتى ەلەستەتە دە المايمىن. بۇرىن «سامۇرىق-قازىنا» جىلىنا بارلىق جوباعا 100 ميلليون دوللار بەرەتىنى ايتىلاتىن. ياعني تانىمالدىلىقتى ارتتىرۋ ءۇشىن ۆەلوشاباندوزدار مەن حوككەيشىلەرگە تولەۋ كەرەك, ولار ءبىزدى حالىقارالىق ارەنادا تانىتىپ ءجۇر دەگەن سىلتاۋ ەستيتىنبىز.

ال قازىر قازاقستان ءوزىن برەند رەتىندە قالىپتاستىرىپ بولدى. استاناعا قىتاي, رەسەي, تۇركيا باسشىلارى جۇمىسقا كەلگەندەي كەلىپ-كەتىپ ءجۇر. فرانتسيا, گەرمانيا باسشىلارى دا بولدى. حالىقارالىق بەدەلىمىز جوعارى – ءبىزدى قۇرمەتتەيدى, تىڭدايدى. ىسكەرلىك جاعىنان قارا بەلبەۋ بار. سوندىقتان ەلىمىزدى «استانا» ۆەلوكومانداسىنىڭ جەيدەسى ارقىلى جارنامالاۋدىڭ ەش قاجەتى جوق.

اقشانى بالالارعا ارنالعان سپورت سەكتسيالارىنا جۇمساۋ كەرەك, ال سپورتتىق كلۋبتار وزدەرىنە وليگارح دەمەۋشىلەر تاپسىن. «بارىستى» مامين ءوزى اسىراسىن, جيعان-تەرگەنى بار شىعار», – دەپ قورىتىندىلادى ول ويىن.