«Barysty» Mamın asyrasyn, jıǵan-tergeni bar shyǵar». Klýbtardy qashanǵy memleket qarjylandyrady?

Foto: hcbarys.kz

Prezıdent Qasym-Jomart Toqaev kásibı sport klýbtaryn qarjylandyrýdy toqtatyp, basymdyqty buqaralyq sport túrlerine berýdi aıtqan. Sońǵy kezderi súreńsiz oıynymen kópshiliktiń kóńilin qaldyryp júrgen klýbtar shynymen de memleketten aqsha alýǵa laıyq emestigi talaı ret aıtylyp keledi. Fýtbol klýbtarymyz eýrododalarda kópke barmaıdy, al «Barystyń» QHL-da jarytyp júrgeni shamaly, dep habarlady qandastar.kz 1bol.kz silteme jasap.

Keshe ǵana óz aıdynynda «Torpedodan» 1:10 bolyp utylǵanyn, tipti reseılik basylymdar elordalyq ujymdy «óli» klýb dep jatqanyn buǵan deıin jazdyq. Ashýǵa býlyqqan jankúıerler oıyn sońynda qarsylas komandanyń ataýyn aıtyp, solarǵa qoshemet kórsetti. Osy oraıda qazaqstandyq jýrnalıst Mıhaıl Kozachkov kásibı sport klýbtaryn memlekettik qarjylandyrýdan ajyratýdy qoldap jazba jarııalady.

«Bizge «Barystyń» ne úshin kerek ekenin túsinbeımin. Buryn ony elimizdegi saıası bedeli myqty Asqar Mamınniń oıynshyǵy deıtin. Qazir Mamın Ulttyq olımpıada komıtetinen basqa esh jerde jumys istemeıdi. Biraq «Barys» báribir el bıýdjetinen mıllıardtap qarjy alyp otyr. Elimizde ózge de hokkeı klýbtary bar, olarǵa da qomaqty qarajat jumsalyp jatyr. Sóıte tura erler quramasy Olımpıadada qashan óner kórsetkeni esimde joq, biz irikteýden de óte almaımyz ǵoı», – dep jazdy Kozachkov.

Tilshi fýtbol klýbtaryndaǵy jaǵdaı da kóńil kónshitpeıtinin alǵa tartty. Tóreshilikke qatysty daý áli de ózekti.

«Fýtboldy alaıyq, Qazaqstan chempıonatynyń árbir týrynda tóreshilikke qatysty kıkiljiń týyndaıdy. Tóreshilerdi kim satyp alatynynan shatasyp kettim: «Elimaı» ma, «Astana» ma, álde «Aqtóbe» me? Bul jaqta da bári salyq tóleýshiler esebinen», – dep qosty ol.

Kozachkov mıllıardtap aqsha jumsalyp jatqan tennısshilerden de paıdanyń kóp emestigin alǵa tartty.

«Taǵy bir mysal, Bolat О́temuratovtyń tennısshileri olımpıada aldynda aıaq astynan aýyryp qaldy, olarǵa memleket 2022 jylǵa deıin qarjy quıyp otyrdy.

Kásibı sportshylarǵa qansha qarajat ketip jatqanyn tipti elestete de almaımyn. Buryn «Samuryq-Qazyna» jylyna barlyq jobaǵa 100 mıllıon dollar beretini aıtylatyn. Iaǵnı tanymaldylyqty arttyrý úshin veloshabandozdar men hokkeıshilerge tóleý kerek, olar bizdi halyqaralyq arenada tanytyp júr degen syltaý estıtinbiz.

Al qazir Qazaqstan ózin brend retinde qalyptastyryp boldy. Astanaǵa Qytaı, Reseı, Túrkııa basshylary jumysqa kelgendeı kelip-ketip júr. Franııa, Germanııa basshylary da boldy. Halyqaralyq bedelimiz joǵary – bizdi qurmetteıdi, tyńdaıdy. Iskerlik jaǵynan qara belbeý bar. Sondyqtan elimizdi «Astana» velokomandasynyń jeıdesi arqyly jarnamalaýdyń esh qajeti joq.

Aqshany balalarǵa arnalǵan sport sekııalaryna jumsaý kerek, al sporttyq klýbtar ózderine olıgarh demeýshiler tapsyn. «Barysty» Mamın ózi asyrasyn, jıǵan-tergeni bar shyǵar», – dep qorytyndylady ol oıyn.