باسقارما توراعاسىنىڭ ءوزى كۇتىپ العان: استاناداعى حقكو-دا رەسەيلىك پروديۋسەرگە كورسەتىلگەن قۇرمەت جەلىدەگىلەردى اشۋلاندىردى

ۆيدەودان سكرين

«ازاماتتارعا ارنالعان ۇكىمەت» مەملەكەتتىك كورپوراتسياسىنىڭ ءباسپاسوز قىزمەتى رەسەيلىك پروديۋسەر يانا رۋدكوۆسكايانىڭ استاناداعى حالىققا قىزمەت كورسەتۋ ورتالىعىنا (حقكو) كەلگەنى تۋرالى جازبا جاريالادى. جاريالانعان ۆيدەودان رۋدكوۆسكايانى مەملەكەتتىك كورپوراتسيا باسقارما توراعاسى ارمان كەنجەعاليەۆتىڭ ءوزى جەكە قارسى العانىن كورۋگە بولادى. ۆيدەو كوپشىلىكتىڭ اشۋىن تۋعىزدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

رۋدكوۆسكايانىڭ ايتۋىنشا, ول استانادان پاتەر ساتىپ الۋ ءۇشىن مەملەكەتتىك قىزمەتكە جۇگىنگەن.

«بۇگىن استانالىق حقكو-دا ايگىلى پروديۋسەر, self-made woman يانا رۋدكوۆسكايا قوناقتا بولدى. قازاقستاندا تۋعان شوۋ-بيزنەس جۇلدىزى مەملەكەتتىك قىزمەتكە جۇگىنىپ, ەلىمىزدەگى تسيفرلاندىرۋ مەن سەرۆيستىڭ جوعارى دارەجەسىن ەرەكشە اتاپ ءوتتى. «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى يانا رۋدكوۆسكايانى حقكو-دا قارسى الدى. ايتا كەتۋ كەرەك, ول ءوزىنىڭ ەلەكتروندى كەزەگىن الدىن-الا برونداعان», – دەلىنگەن حقكو جاريالاعان العاشقى جازبادا.

قازاقستاندىقتاردىڭ كوپشىلىگى رەسەيلىك پروديۋسەرگە ەرەكشە قۇرمەت كورسەتىلگەنىن سىنعا العان.

«رۋدكوۆسكايا استانادان پاتەر ساتىپ الىپتى, جارايدى. بىراق ءبىر نارسەنى تۇسىنبەيمىن. ءبىزدىڭ مەملەكەتتىك قىزمەتكەرلەر نەگە سونشا اينالسوقتاپ, بىرگە ءجۇر? حقكو-دا ارنايى قىزمەت كورسەتىپ جاتىر ما? قاراپايىم سالىق تولەۋشىلەردىڭ ەسەبىنەن ومىر ءسۇرىپ وتىرعان قىزمەتكەرلەر بىزگە مۇنداي جاعداي جاسامايدى عوي, ساعاتتاپ كەزەكتە وتىرامىز. قازاقستان ازاماتىنا مەملەكەتتىك قىزمەت الۋ بارىسىندا حقكو-دا «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما توراعاسى جەكە ءوزى ەرىپ ءجۇردى? جازىڭىزدارشى, ءوتىنىش. ارمان كەنجەعاليەۆ مىرزا, رۋدكوۆسكايا حانىمدا قازاقستاندا تۇرۋعا رۇقسات (ۆنج) بار ما? سەبەبى, ەلىمىزدىڭ زاڭناماسىنا سايكەس, شەتەل ازاماتتارى قازاقستاندا تۇرۋعا ىقتيارحاتى بولماسا, تۇرعىن ءۇي ساتىپ الا المايدى. ۆنج بولماسا, ساتىپ الۋ-ساتۋ نەمەسە سىيعا تارتۋ ارقىلى تۇرعىن ءۇيدى راسىمدەۋ مۇمكىن ەمەس. جوق الدە, بۇل رەسەي ازاماتىنا ارنايى ءوزىڭىز جەكە ەرەكشە جاعداي جاساپ بەردىڭىز بە?» – دەپ جازدى جۋرناليست گۇلبانۋ ابەنوۆا.

يانا رۋدكوۆسكايامەن جاريالانعان جازبادان كەيىن مەملەكەتتىك كورپوراتسيا الەۋمەتتىك جەلىدەگى پىكىرلەردى ءوشىردى.

«تالقىلانىپ جاتقان جاريالانىمنىڭ ماقساتى – بەلگىلى ءبىر ادامدى تانىمالدىعىنا قاراي ەرەكشەلەپ كورسەتۋ ەمەس. جاريالانعان ساتتەن باستاپ قوعامدىق پىكىردى مۇقيات باقىلاپ وتىرمىز جانە ءوز وي-پىكىرلەرىن بىلدىرگەن بارشا ازاماتتارعا العىس ايتامىز. سىزدەردىڭ پىكىرلەرىڭىز ءبىز ءۇشىن ماڭىزدى. حقكو-لاردا كورسەتىلەتىن بارلىق مەملەكەتتىك قىزمەتتەر زاڭ اياسىندا جانە بارلىق ازاماتتار ءۇشىن بىردەي نەگىزدە جۇزەگە اسىرىلاتىنىن اتاپ وتكىمىز كەلەدى», – دەلىنگەن حابارلامادا.

مەملەكەتتىك كورپوراتسيا وكىلدەرى بۇل جازبا ارقىلى قىزمەت كورسەتۋ ساپاسىن شەتەلدىكتەردىڭ دە مويىنداعانىنا نازار اۋدارعىسى كەلگەنىن ايتتى. ال يانا رۋدكوۆسكايانى مەملەكەتتىك كورپوراتسيا باسقارما توراعاسى ارمان كەنجەگاليەۆتىڭ جەكە قارسى الۋىن قوناقجايلىلىقتىڭ ءبىر كورىنىسى دەپ اتادى.

مۇنىمەن قاتار, مەملەكەتتىك كورپوراتسيا باسشىسى بۇعان دەيىن دە تانىمال قازاقستاندىقتاردى جەكە قابىلداعانىن, بۇل – قىزمەت ساپاسىن تىكەلەي باقىلاپ, ازاماتتاردان كەرى بايلانىس الۋ ءۇشىن جاسالاتىنىن مالىمدەدى.

«ازاماتتارعا ارنالعان ۇكىمەت» مالىمەتىنشە, باسشىلىق تاراپىنان كورسەتىلگەن ءىلتيپات مەملەكەتتىك قىزمەتتەردى الۋ كەزىندە ەشقانداي ارتىقشىلىق بەرمەيدى. بارلىق قىزمەتتەر قازاقستان زاڭناماسىنا سايكەس, ءاربىر ءوتىنىش بەرۋشىگە تەڭ دارەجەدە ۇسىنىلادى.

ايتا كەتەيىك, يانا رۋدكوۆسكايا 1975 جىلى قازاقستاننىڭ قوستاناي قالاسىندا دۇنيەگە كەلگەن. تۋىلعان سوڭ كوپ ۇزاماي وتباسى رەسەيدىڭ بارناۋل قالاسىنا كوشىپ كەتكەن. رۋدكوۆسكايا – رەسەيلىك تەلەجۇرگىزۋشى, مۋزىكالىق پروديۋسەر, كاسىپكەر. ول – ديما بيلاننىڭ بۇرىنعى پروديۋسەرى.