«باسىنان اتىپ, دەنەسىن كانالعا لاقتىرىپ كەتكەن»: قىزىلوردادا دارىگەردىڭ ءمايىتى تابىلدى

فوتو: ۆيدەودان سكرين

قىزىلوردا قالاسىنىڭ ىرگەسىندە 31 جاستاعى مەديتسينا قىزمەتكەرىنىڭ ءمايىتى تابىلدى. مارقۇمنىڭ جاقىندارى اتپالداي ازاماتقا بىرنەشە ادام جابىلىپ, باسىنان وق اتقانىن ايتتى. بۇل تۋرالى Azattyq Rýhy اگەنتتىگى «ينفورمبيۋرو» اگەنتتىگىنە سىلتەمە جاساپ حابارلايدى.

مارقۇمنىڭ تۋىستارىنىڭ ايتۋىنشا, قاندى قىلمىسقا قاتىسى بار ادامدار ءالى بوستاندىقتا ءجۇر. ونىڭ ۇستىنە جىگىتتىڭ كوز جۇمعانىنا 3 كۇن وتسە دە, تەرگەۋشىلەردەن بىردە-ءبىر حابار جوق دەيدى. تەرگەۋ ءادىل ءجۇرىپ جاتقانىنا كۇماندانعان وتباسى تالاپتارىن ايتىپ, پوليتسيا باسقارماسىنا باردى.

ونكولوگيالىق اۋرۋحانادا جۇمىس ىستەگەن ناۋرىزبەك تۇرسىنوۆ وتكەن دۇيسەنبىدە ءتۇن ىشىندە تەلەفونىنا قوڭىراۋ كەلگەن سوڭ ۇيىنەن اسىعىس شىعىپ كەتكەن, دەيدى مارقۇمنىڭ جاقىندارى. ول سول كەتكەننەن ورالماپتى. سودان كەيىن تۋىستارى پوليتسەيلەرگە حابار بەرىپ, وزدەرى جاپپاي ىزدەۋگە كىرىسكەن. اقىر سوڭى اسقان قاتىگەزدىكپەن ولتىرىلگەن مەديتسينا قىزمەتكەرىنىڭ ءمايىتىن قالا شەتىندەگى ارنانىڭ جاعاسىنان تاپقان.

«قازىر كەلەدى دەپ جاتتىم. ساعات 4 بولدى. تۇرسام, قاسىمدا جوق. مىنا كىسى ءالى كەلمەگەن بە دەپ, ماشيناسىنا قارادىم. ماشيناسى ول جوق. 4-5 ادامدى جالداعان. باسىنان ەكى وقپەن اتقان. اسقان قاتىگەزدىكپەن ولتىرگەنىمەن قويماي, قاسىنداعى كانالعا لاقتىرىپ كەتكەن دەنەسىن», – دەيدى مارقۇمنىڭ جۇبايى ۇلپان نۇرلىباەۆا.

قايعىدان قان جۇتقان وتباسى ناۋرىزبەكتى ءوزىنىڭ تانىستارى ولتىرگەنىنە سەنىمدى. ايتۋلارىنشا مارقۇم وزىنە جاقىن ادام سانايتىن جىگىتپەن سوڭعى كۇندەرى اقشاعا بايلانىستى ءبىراز تۇسىنىسە الماي جۇرگەن. سوندىقتان 31 جاستاعى ازاماتتىڭ ولىمىنە وسى كەلىسپەۋشىلىك سەبەپ دەپ سانايدى.

«بىرنەشە ادام, جوق دەگەندە 4-5 ادامنىڭ قاتىسى بار. سول ادامداردىڭ ءبارىنىڭ تابىلىپ, قاتاڭ جازامەن سوتتالۋىن تالاپ ەتەمىز», – دەدى مارقۇمنىڭ اكەسى اسىلحان داۋىلبەكوۆ.

ونىڭ ۇستىنە تەرگەۋدىڭ ءادىل ءجۇرىپ جاتقانىنا دا كۇماندانادى جابىرلەنۋشىلەر. ويتكەنى تەرگەۋشىلەر مارقۇمنىڭ جاقىندارىنا بىردە-ءبىر رەت كەلىپ جاۋاپ الماپتى. سوندىقتان نارازىلىق بىلدىرگەن وتباسى پوليتسيا باسقارماسىنا وزدەرى كەلىپ تالاپتارىن ايتتى.

«قىلمىستىق ءىس قر قىلمىستىق كودەكسىنىڭ 99-بابىنىڭ 2-بولىگىمەن ءىس تىركەلدى. اسا اۋىر قىلمىس. ەكى ادام وسى ىسپەن قاماۋعا الىندى. قالعان مالىمەتتەر قىلمىستىق پروتسەستىك كودەكستىڭ 2-بولىگىنە ساي جاريا ەتىلمەيدى», – دەيدى قىزىلوردا قالالىق پوليتسيا باسقارماسى باسشىسىنىڭ ورىنباسارى عالىمجان تابىنباي.

بەلگىلى بولعانداي, ءىس «ادام ءولتىرۋ» بابى بويىنشا تەرگەلىپ جاتىر. ال مارقۇمنىڭ جاقىندارى ءىستىڭ اق-قاراسى انىقتالىپ, كىنالىلەر قاتاڭ جازالانعانىن قالايدى.

ايتا كەتەيىك, ناۋرىزبەك تۇرسىنوۆتىڭ ارتىندا كامەلەت جاسىنا تولماعان ءۇش بالاسى مەن جارى قالدى.