باتىلدىق, مەيىرىم, مىقتى رۋح – ەلوردادا قايىرىمدىلىقپەن اينالىساتىن جاندار ماراپاتتالدى

بۇگىنگى جەڭىمپازدار اراسىندا ادامدى اجالدان اراشالاعاندار مەن قايىرىمدىلىقپەن اينالىسىپ, ۇلتتىق قۇندىلىقتاردى نىعايتۋعا سەپتىگىن تيگىزىپ جۇرگەن مەتسەناتتار دا بار.

ءبىر عانا بيىلعى بايقاۋعا 949 ءوتىنىم كەلىپ تۇسسە, 6 جىلدىڭ ىشىندە 4 مىڭعا جۋىق ءوتىنىم تىركەلگەن. كومميسيا مۇشەلەرىنە دە جەڭىمازداردى انىقتاۋ وڭايعا سوقپاعان. سەبەبى ءىس جۇزىندە ءار قاتىسۋشى ماراپاتقا لايىق.

ماسەلەن, «تۋعان جەر» نوميناتسياسىنىڭ جەڭىمپازى, جامبىل وبلىسى مەركە اۋىلىنىڭ تۇرعىنى ماريا نيسونوۆا ءتۋابىتتى زاعيپ بولعانىنا قاراماستان كوپتەگەن ادامنىڭ ومىرىنە ماعىنا سىيلاۋدا.
ماريا زاعيپ جانە ناشار كورەتىن ادامدارعا ارنالعان كومپيۋتەردە جۇمىس ىستەۋ, قولونەر, دويبى جانە شاحمات ويىندارىن ۇيرەتۋ ارقىلى ەرەكشە قاجەتتىلىگى بار اۋىل تۇرعىندارىنا قولداۋ كورسەتەدى. سونىمەن بىرگە, قايىرىمدىلىق اكتسيالارىن ۇيىمداستىرادى, فورتەپيانودا, باياندا وينايدى. ەرتەگى جازىپ, ەرەسەكتەر مەن بالالارعا ادەبي كەشتەر ۇيىمداستىرادى.

بايقاۋدىڭ «اسار» اتالىمىندا اقمولا وبلىسى قوسشى قالاسىنان كەلگەن مۋزىكانت ازامات باقي جەڭىمپاز اتاندى. ول قۇرمانعازى اتىنداعى كونسەرۆاتوريا تۇلەگى جانە مۋزىكالىق اسپاپتاردا ويناپ قانا قويماي, قولدان جاساۋمەن شۇعىلدانادى. ۇمىت بولعان قازاق اسپاپتارىن زەرتتەپ, قايتا جاڭعىرتۋمەن اينالىسادى. كوپتەگەن اسپاپتى قىتاي مەن موڭعوليادان اكەلسە, كەيبىرىن اتاقتى مۋزىكانتتار مەن انشىلەردىڭ ۇرپاقتارىنان ساتىپ العان.