باتىس قازاقستاندا كوپىردى سۋ شايدى

فوتو:بقو تۇرعىندارىنان

سىرىم اۋدانى ارالتوبە اۋىلى ماڭىندا كوپىردى سۋ شايىپ, اۋدان ورتالىعىمەن قاتىناس ءۇزىلدى, دەپ جازدى qandastar.kz

سىرىم اۋدانى اكىمدىگىنەن تۇسكەن مالىمەتكە قاراعاندا, قاردىڭ كۇرت ەرۋى سالدارىنان سۋ دەڭگەيى كوتەرىلىپ, 16 ناۋرىز كۇنى تاڭمەن ۋاقىتشا كوپىردىڭ اينالاسىنداعى توپىراق شايىلىپ كەتتى. نەگىزگى كوپىرگە جوندەۋ جۇمىستارى جۇرگىزىلۋدە.

— وسىعان بايلانىستى جول جابىلىپ, كولىك جانە جاياۋ جۇرگىنشىلەردىڭ قوزعالىسى توقتاتىلدى. سىرىم اۋداندىق توتەنشە جاعدايلار جانە اۋداندىق ىشكى ىستەر ءبولىمى تاراپىنان كەزەكشىلىك ۇيىمداستىرىلدى. تۇرعىن ۇيلەرگە قاۋىپ جوق. قازىرگى ۋاقىتتا اكساي قالاسى جاعىنان بالامالى كىرۋ جولدارى بار. قالپىنا كەلتىرۋ جۇمىستارىن سۋ دەڭگەيى تومەندەگەن سوڭ باستاۋ جوسپارلانۋدا, — دەپ حابارلادى سىرىم اۋدانى اكىمدىگىنەن.

ارالتوبە اۋىلدىق وكرۋگىنىڭ اكىمى ءادىلحان مۇحيتوۆتىڭ ناقتىلاۋىنشا, شىدەرتى وزەنىندەگى سۋ دەڭگەيى 15 ناۋرىز كۇنى ساعات 16.00-دەن باستاپ كۇرت كوتەرىلىپ, بۇگىن تاڭعى 04.00-05.00-تەردە كوپىردى ەكى جاعىنان جىرىپ كەتكەن.

— اۋىلدا ون كۇنگە جەتەتىن ازىق-ت ۇلىك قورى بار. ارالتوبەدە 190 ۇيدە 664 ادام تۇرادى. ورتا مەكتەپ, امبۋلاتوريا, مادەنيەت ءۇيى سياقتى الەۋمەتتىك نىساندار قالىپتى جۇمىس ىستەپ تۇر. اۋدان ورتالىعى جاعىنان «كاماز» كولىكتەرىمەن قۇم-قيىرشىق تاس قوسپاسى تاسىلىپ, كوپىردى قايتا بەكىتۋگە قام جاسالاتىن بولادى. قيىندىق تۋىنداعان جاعدايدا تاسقۇدىق اۋىلى ارقىلى 90 شاقىرىم قاشىقتىقتا ورنالاسقان ءبورلى اۋدانى ورتالىعى اقساي قالاسىنا قاتىناۋعا بولادى. تاسقۇدىققا دەيىن 45 شاقىرىم گرەيدەر جول, ار جاعى – اسفالت, — دەدى Kazinform تىلشىسىنە ءا.مۇحيتوۆ.

سونىمەن قاتار قاراتوبە اۋدانى اقتايساي اۋىلىنىڭ تۇرعىندارى اۋدان ورتالىعىمەن بايلانىستىراتىن جولدىڭ ۇستىمەن سۋ وتكەنىن حابارلادى.

— 15 ناۋرىز كۇنى ساعات 16.00-دە قاراكول اۋىلدىق وكرۋگى اقتايساي اۋىلىنىڭ ىرگەسىندەگى تايان وزەنىنەن وتەتىن وتكەلدىڭ ۇستىنەن قار سۋى ءوتتى. ەنى — 20 مەتر. ەلدى مەكەنگە قاۋىپ جوق, — دەدى بۇل وقيعاعا بايلانىستى قاراتوبە اۋدانىنىڭ اكىمى قادىرجان سۇيەۋعاليەۆ.