«بازاردا ىستەيتىن بولساڭ, ورنىڭدى بوسات»: جازيرا جاپپارقۇلعا شىمكەنت سپورت باسقارماسى قىسىم جاساۋدا

ريو وليمپياداسىنىڭ كۇمىس جۇلدەگەرى, اۋىر اتلەت جازيرا جاپپارقۇلعا قىسىم جاسالىپ جاتىر. بۇل تۋرالى جۋرناليست اقىرىس سەيىتقازى Facebook پاراقشاسىندا ايتتى, دەپ حابارلايدى Qandastar.kz.

بۇعان دەيىن جازيرا جاپپارقۇل Aqyrys Seitqazy YouTube ارناسىنا بەرگەن سۇحباتىندا سپورتتاعى مانسابىن اياقتاعان سوڭ, ەلگە قىزمەت ەتۋدى ماقسات تۇتقانىن, بىراق جەتەكشىلىك لاۋازىمدارعا ورنالاسۋ جولىندا ءتۇرلى توسقاۋىلدارعا تاپ بولاتىنىن اشىق ايتقان ەدى.

«تاڭەرتەڭ جازيرا حابارلاستى. ماعان سۇحبات بەرگەن سوڭ, شىمكەنت قالالىق سپورت باسقارماسىنان قىسىم كورىپ جاتىر. ولار سپورتشىنىڭ بازاردا ساۋدا جاسايتىنىنا شۇيلىگىپ وتىر. جازيرا مەملەكەتتىك ArtSport باعدارلاماسى ارقىلى 20 ملن اسا قارىزدانىپ قالعان. سپورت مەكتەبىندە الاتىن 350 مىڭ تەڭگەسى جەتپەگەن سوڭ, قارىزدان قۇتىلۋ ءۇشىن بازاردا تويباستار, بەسىك قۇرالدارىن ساتادى قوسىمشا. ەندى شىمكەنت قالالىق سپورت باسقارماسى بازاردا ىستەيتىن بولساڭ, مىنداعى ورىندى بوسات دەپ, قيعىلىق سالىپ جاتىر», — دەپ جازدى جۋرناليست.

ايتۋىنشا, قازىر جازيرا جاپارقۇل دەنساۋلىق جاعدايىنا بايلانىستى دەمالىس العان.

«ەگەر جاعدايى بەس بوپ تۇرسا, جازيرا بازار ارالاپ جۇرمەيدى عوي. ارتسپورتقا العان سپورتتىق قۇرىلعىلاردىڭ ءبىرازىن ارزان باعاعا, ءبىرازىن تەگىن بەرىپ جىبەرىپتى. ءالى ءبىراز كىلەم, تاتاميلەرى شاڭ باسىپ, قورادا تۇر. مەملەكەتتىڭ باعدارلاماسىنان وپىق جەگەن سپورتشىعا وسىلاي باس سالۋ دۇرىس پا? قازىر باپكەرلەردە ايلىق از, ءبارى قوسىمشا جۇمىس ىستەيدى. تاكسي جۇرگىزەدى, 3-4 زالدا ەڭبەك ەتەدى. جازيرا جاپپارقۇل دا قارىزىن جابۋ ءۇشىن تەنتىرەپ ءجۇر. وليمپيادادان جۇلدە العان قىزدارىمىز كوپ پە ەدى? تولىپ جاتقان چەمپيونىمىز بار ما? وسى ءبىر قاراپايىم قازاق قىزىنا نەگە شۇيلىگىپ قالدىڭدار, شىمكەنتتىكتەر? سپورت ءمينيسترى دە قارشاداي قازاق قىزىنىڭ ماسەلەسىن شەشىپ بەرسە بولار ەدى…», — دەپ جازدى اقىرىس سەيىتقازى.