«Bazarda isteıtin bolsań, ornyńdy bosat»: Jazıra Japparqulǵa Shymkent sport basqarmasy qysym jasaýda

Rıo Olımpıadasynyń kúmis júldegeri, aýyr atlet Jazıra Japparqulǵa qysym jasalyp jatyr. Bul týraly jýrnalıst Aqyrys Seıitqazy Facebook paraqshasynda aıtty, dep habarlaıdy Qandastar.kz.

Buǵan deıin Jazıra Japparqul Aqyrys Seitqazy YouTube arnasyna bergen suhbatynda sporttaǵy mansabyn aıaqtaǵan soń, elge qyzmet etýdi maqsat tutqanyn, biraq jetekshilik laýazymdarǵa ornalasý jolynda túrli tosqaýyldarǵa tap bolatynyn ashyq aıtqan edi.

«Tańerteń Jazıra habarlasty. Maǵan suhbat bergen soń, Shymkent qalalyq sport basqarmasynan qysym kórip jatyr. Olar sportshynyń bazarda saýda jasaıtynyna shúıligip otyr. Jazıra memlekettik ArtSport baǵdarlamasy arqyly 20 mln asa qaryzdanyp qalǵan. Sport mektebinde alatyn 350 myń teńgesi jetpegen soń, qaryzdan qutylý úshin bazarda toıbastar, besik quraldaryn satady qosymsha. Endi Shymkent qalalyq sport basqarmasy bazarda isteıtin bolsań, myndaǵy oryndy bosat dep, qıǵylyq salyp jatyr», — dep jazdy jýrnalıst.

Aıtýynsha, qazir Jazıra Japarqul densaýlyq jaǵdaıyna baılanysty demalys alǵan.

«Eger jaǵdaıy bes bop tursa, Jazıra bazar aralap júrmeıdi ǵoı. Artsportqa alǵan sporttyq qurylǵylardyń birazyn arzan baǵaǵa, birazyn tegin berip jiberipti. Áli biraz kilem, tatamıleri shań basyp, qorada tur. Memlekettiń baǵdarlamasynan opyq jegen sportshyǵa osylaı bas salý durys pa? Qazir bapkerlerde aılyq az, bári qosymsha jumys isteıdi. Taksı júrgizedi, 3-4 zalda eńbek etedi. Jazıra Japparqul da qaryzyn jabý úshin tentirep júr. Olımpıadadan júlde alǵan qyzdarymyz kóp pe edi? Tolyp jatqan chempıonymyz bar ma? Osy bir qarapaıym qazaq qyzyna nege shúıligip qaldyńdar, shymkenttikter? Sport mınıstri de qarshadaı qazaq qyzynyń máselesin sheship berse bolar edi…», — dep jazdy Aqyrys Seıitqazy.