بەلگىلى جۋرناليست قىتايدىڭ كولىگىن ءمىنىپ, جولدا قالعانىن ايتتى

فوتو: اشىق دەرەككوز

قۋات اۋەسباي بۇل تۋرالى الەۋمەتتىك جەلىدەگى پاراقشاسىندا جازدى, – دەپ حابارلايدى qandastar.kz.

«قىتاي جاساپ, قازاقستان قۇراي تۇسكەن Jetour دەگەن جۇيرىكتى تاقىمداعانىمىزعا كوپ ۋاقىت بولا قويماعان. «اتىڭ باردا جەر تانى جەلىپ ءجۇرىپ» دەمەيتىن بە ەدى. جاز شىقسا, ەڭبەك دەمالىسىن الىپ, كوپتەن كورمەگەن اۋىل-ەلدى ارالاپ قايتساق دەگەنبىز.

قىتاي كولىكتەرى تۋرالى پىكىر الا-قۇلا عوي, ايتسە دە ساتىپ الاردا ەشقايسىسىنا ءمان بەرمەگەنىمىز راس. كۇندە تاۋ-تاس كەزىپ, زورىقتىرىپ مىنبەيتىنىمىز انىق, ءۇي مەن جۇمىستىڭ اراسىندا قاجەتىمىزگە جاراپ تۇرسا بولدى ەمەس پە دەدىك. ءارى كوپ ورىندىق كولىكتەر كلاسىندا ەڭ قولجەتىمدىسى وسى بولدى.

سونىمەن قويشى, ەل ىشىندە ءتورت مىڭ شاقىرىمداي جول جۇرگەن سوڭ Jetour-ىمىز سىر بەرە باستادى. سالقىنداتقىش سۇيىقتىقتىڭ دەڭگەيىن تەكسەرىڭىز دەگەن ەسكەرتۋدەن سوڭ, ءجۇرىستى باياۋلاتىپ, اۆتوباننان شىعۋعا ىڭعايلانا بەرگەنبىز, بىراق قوس قاپتالى قورشاۋ, ءبىر باعىتى جوندەۋدەن ءوتىپ جاتقان (بالقاش-قاراعاندى جولى) اۆتوباننان بىردەن شىعا قويۋ مۇمكىن ەمەس. وقىستان توقتاۋعا بولمايدى, تار جولدا ىزعىتىپ كەلە جاتقان كولىكتەرمەن بىرگە وزىڭە دە قاۋىپ توندىرەسىڭ, – دەپ جازادى جۋرناليست.

ايتسە دە جۋرناليست جىلدامدىقتى ازايتىپ, وڭعا قاراي ويىسا بەرگەنىندە قوزعالتقىشتىڭ سىر بەرگەنىن ايتادى.

«جانىمىزدى شۇبەرەككە ءتۇيىپ كەلە جاتقاندا, قوزعالتقىش تۇستان شىققان «تارس» ەتكەن قاتتى داۋىستان بالا-شاعامنىڭ ءتىپتى زارەسى ۇشتى. «اكە, ماشينە ورتەنىپ جاتىر ما?» دەگەن ۇلكەن قىزىمنىڭ جانداۋىسى شىقتى. شىنىندا ارت جاقتان الدە ءتۇتىن, الدە بۋ بۋداقتاپ شىعىپ جاتىر, سالوننىڭ ءىشىن قولقانى قابار وتكىر ءيىس الىپ كەتتى», – دەپ جازدى ول.

ايتا كەتسەك, تۇتىنۋشىعا كولىك ساتىپ الاردا «جولدا بۇزىلسا, Allur-كومەككە حابارلاسساڭىز, دالادا قالدىرمايدى» دەگەن كورىنەدى. الايدا, بۇل ءۋاج ءسوز جۇزىندە عانا قالعان.

«دەرەۋ 5070 ءنومىرىن تەردىم.  «قازاق ءتىلىن تاڭداۋ ءۇشىن 1 سانىن باسىڭىز, كلۋب مۇشەسى بولساڭىز 2 سانىن باسىڭىز…» دەپ ۇزاقتاۋ كىرىسپە جاساپ تۇرىپ الدى دا, ايتەۋىر بايلانىسقا شىقتى. «قالادان ەلۋ شاقىرىم جەرگە دەيىن تەگىن, ءارى قاراي ءار شاقىرىمىنا پالەنباي تەڭگە تولەيسىز, كومەكتى (ەۆاكۋاتور) ءتورت ءجۇز شاقىرىم جەردەگى قاراعاندىدان جىبەرەمىز, وندا دا بوس كولىك تابىلسا» دەيدى. Allur-كومەكتەن قايران بولمادى ءسويتىپ, بالقاشتان ەۆاكۋاتور شاقىردىق»,- دەپ قورىتىندىلادى جۋرناليست.