Belgili jýrnalıst Qytaıdyń kóligin minip, jolda qalǵanyn aıtty

Foto: ashyq derekkóz

Qýat Áýesbaı bul týraly áleýmettik jelidegi paraqshasynda jazdy, – dep habarlaıdy qandastar.kz.

«Qytaı jasap, Qazaqstan quraı túsken Jetour degen júırikti taqymdaǵanymyzǵa kóp ýaqyt bola qoımaǵan. «Atyń barda jer tany jelip júrip» demeıtin be edi. Jaz shyqsa, eńbek demalysyn alyp, kópten kórmegen aýyl-eldi aralap qaıtsaq degenbiz.

Qytaı kólikteri týraly pikir ala-qula ǵoı, áıtse de satyp alarda eshqaısysyna mán bermegenimiz ras. Kúnde taý-tas kezip, zoryqtyryp minbeıtinimiz anyq, úı men jumystyń arasynda qajetimizge jarap tursa boldy emes pe dedik. Ári kóp oryndyq kólikter klasynda eń qoljetimdisi osy boldy.

Sonymen qoıshy, el ishinde tórt myń shaqyrymdaı jol júrgen soń Jetour-ymyz syr bere bastady. Salqyndatqysh suıyqtyqtyń deńgeıin tekserińiz degen eskertýden soń, júristi baıaýlatyp, avtobannan shyǵýǵa yńǵaılana bergenbiz, biraq qos qaptaly qorshaý, bir baǵyty jóndeýden ótip jatqan (Balqash-Qaraǵandy joly) avtobannan birden shyǵa qoıý múmkin emes. Oqystan toqtaýǵa bolmaıdy, tar jolda yzǵytyp kele jatqan kóliktermen birge ózińe de qaýip tóndiresiń, – dep jazady jýrnalıst.

Áıtse de jýrnalıst jyldamdyqty azaıtyp, ońǵa qaraı oıysa bergeninde qozǵaltqyshtyń syr bergenin aıtady.

«Janymyzdy shúberekke túıip kele jatqanda, qozǵaltqysh tustan shyqqan «tars» etken qatty daýystan bala-shaǵamnyń tipti záresi ushty. «Áke, máshıne órtenip jatyr ma?» degen úlken qyzymnyń jandaýysy shyqty. Shynynda art jaqtan álde tútin, álde bý býdaqtap shyǵyp jatyr, salonnyń ishin qolqany qabar ótkir ıis alyp ketti», – dep jazdy ol.

Aıta ketsek, tutynýshyǵa kólik satyp alarda «jolda buzylsa, Allur-kómekke habarlassańyz, dalada qaldyrmaıdy» degen kórinedi. Alaıda, bul ýáj sóz júzinde ǵana qalǵan.

«Dereý 5070 nómirin terdim.  «Qazaq tilin tańdaý úshin 1 sanyn basyńyz, klýb múshesi bolsańyz 2 sanyn basyńyz…» dep uzaqtaý kirispe jasap turyp aldy da, áıteýir baılanysqa shyqty. «Qaladan elý shaqyrym jerge deıin tegin, ári qaraı ár shaqyrymyna pálenbaı teńge tóleısiz, kómekti (evakýator) tórt júz shaqyrym jerdegi Qaraǵandydan jiberemiz, onda da bos kólik tabylsa» deıdi. Allur-kómekten qaıran bolmady sóıtip, Balqashtan evakýator shaqyrdyq»,- dep qorytyndylady jýrnalıst.