بەلگىسىز بىرەۋلەر تانىمال 2 سۋديانى اتىپ ءولتىرىپ كەتتى

يراندىق باق-تىڭ حابارلاۋىنشا, شيراز قالالىق قىلمىستىق سوتىنىڭ سۋدياسى ەحسان باگەريگە بەلگىسىز ەكى ادام شابۋىل جاساپ, ونى ءولتىرىپ كەتكەن. يران بيلىگى بۇل وقيعانى تەراكت دەپ باعالادى, دەپ حابارلايدى Qandastar.kz اقپاراتتىق پورتالى.

بار مالىمەتكە سايكەس, شيراز قالاسىنداعى 102-قىلمىستىق سوت ءبولىمىنىڭ سۋدياسى ەحسان باگەري — ۇلتتىق قاۋىپسىزدىككە قارسى قىلمىستار مەن ەسىرتكى كونترابانداسىنا قاتىستى ىستەردى قاراۋمەن اينالىسقان.

ول سەيسەنبى كۇنى تاڭەرتەڭ, ۇيىنەن جۇمىسقا شىققان كەزدە پىشاقتالىپ ولتىرىلگەن.

فارس پروۆينتسياسىنىڭ باس سۋدياسى سادروللا رادجاي-ناساب بۇل شابۋىلدى «تەررورلىق اكت» دەپ اتاپ:

«بۇگىن تاڭەرتەڭ بەلگىسىز ەكى ادام شيراز قالالىق 102-قىلمىستىق سوتىنىڭ توراعاسى, سۋديا ەحسان باگەريگە شابۋىل جاساپ, ونى جۇمىس ورنىنا بارا جاتقاندا ءولتىرىپ كەتتى», — دەدى.

يران يسلام رەسپۋبليكاسىنىڭ سوت جۇيەسىنىڭ باسشىسى گولام حوسسەين موحسەني ەدجەي فارس پروۆينتسياسىنىڭ سوت ورگاندارىنا 38 جاستاعى سۋديانىڭ ولىمىنە بايلانىستى ارنايى تەرگەۋ جۇرگىزۋدى جانە كىنالىلەردى تەز ارادا جاۋاپقا تارتۋدى تاپسىردى.

بۇعان دەيىن, قاڭتار ايىندا تەگەراندا جوعارعى سوتتىڭ ەكى سۋدياسى اتىپ ولتىرىلگەن بولاتىن. قىلمىسكەر سوت عيماراتىنا كىرىپ, ولاردى وقپەن اتىپ ءولتىرىپ, كەيىن ءوزىن-ءوزى ولتىرگەن. بۇل وقيعا دا تەراكت دەپ تانىلىپ, يران بيلىگى تەرگەۋ باستاعانىمەن, ءالى كۇنگە دەيىن قىلمىستىڭ ناقتى سەبەپتەرى بەلگىسىز.

قازا تاپقان سۋديالار — 71 جاستاعى الي رەزيني مەن 68 جاستاعى موحامماد موگيسەح. ەكەۋى دە تىڭشىلىق, تەرروريزم جانە ساياسي تۇتقىندار مەن بەلسەندىلەرگە قاتىستى رەزونانستىق ىستەردى قاراعان.

Associated Press اگەنتتىگىنىڭ حابارلاۋىنشا, بۇل سۋديالار يران مەن يراك اراسىنداعى سوعىستان كەيىن, 1988 جىلى رەجيمگە قارسى شىققان مىڭداعان ساياسي تۇتقىنداردىڭ جاپپاي ولىمىنە قاتىسى بار.

سول جىلى جەدەلدەتىلگەن سوت پروتسەستەرى ارقىلى ولاردى ءولىم جازاسىنا كەسكەن.