بەردىبەك ساپارباەۆ جاڭا قىزمەتكە تاعايىندالدى

بەردىبەك ساپارباەۆ قر پرەمەر-ءمينيسترىنىڭ ورىنباسارى لاۋازىمىنا تاعايىندالدى, دەپ حابارلادى اقوردانىڭ ءباسپاسوز قىزمەتى.

ب.م. ساپارباەۆتى قازاقستان رەسپۋبليكاسى پرەمەر-ءمينيسترىنىڭ ورىنباسارى قىزمەتىنە تاعايىنداۋ تۋرالى

بەردىبەك ماشبەك ۇلى ساپارباەۆ قازاقستان رەسپۋبليكاسى پرەمەر-ءمينيسترىنىڭ ورىنباسارى بولىپ تاعايىندالسىن, ول قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى قىزمەتىنەن بوساتىلسىن.

قازاقستان رەسپۋبليكاسىنىڭ پرەزيدەنتى ق.توقاەۆ

بەردىبەك ماشبەك ۇلى ساپارباەۆ 1953 جىلى 9 اقپاندا دۇنيەگە كەلدى.

قىزىلوردا وبلىسىنىڭ جاڭاقورعان اۋدانىنىڭ بەسارىق اۋىلىنىڭ تۋماسى, ءبىلىمى جوعارى. 1977 جىلى الماتى حالىق شارۋاشىلىعى ينستيتۋتىن «ەكونوميكا جانە ماتەريالدىق-تەحنيكالىق جابدىقتاۋ» ماماندىعى بويىنشا ءبىتىردى. ەكونوميكا عىلىمدارىنىڭ دوكتورى, پروفەسسور.

ەڭبەك جولىن قىزىلوردا وبلىسىنىڭ زادارينسكي سوۆحوزىنىڭ جۇمىسشىسىنان باستادى (1969-1971 جىلدارى); اسكەري قىزمەتىن وتكەردى (1971-1973 جىلدارى). ينستيتۋتتى بىتىرىسىمەن رەسپۋبليكالىق مەملەكەتتىك ەڭبەك جيناقتاۋ كاسسالارى (گوسترۋدسبەركاسسى) باسقارماسىندا ەكونوميست (1977); قازكسر قارجىمينىندە ەكونوميست, اعا ەكونوميست, جەتەكشى, باس ەكونوميست, ءبولىم باستىعىنىڭ ورىنباسارى (1977-1988 جىلدارى); جوسپارلاۋ-قارجى باسقارماسىنىڭ باستىعى, باس ەكونوميكا باسقارماسىنىڭ باستىعى, قازاقستان رەسپۋبليكاسى ءبىلىم ءمينيسترىنىڭ ورىنباسارى (1988-1993 جىلدارى); پرەزيدەنت اپپاراتى ءبولىمى مەن قازاقستان رەسپۋبليكاسى مينيسترلەرى كابينەتى مەڭگەرۋشىسىنىڭ ورىنباسارى (1993); قازاقستان رەسپۋبليكاسى مينيسترلەر كابينەتىنىڭ ىستەر باسقارماسىنىڭ قارجى, ەڭبەك جانە الەۋمەتتىك قورعاۋ ءبولىمى مەڭگەرۋشىسىنىڭ ورىنباسارى جانە مەڭگەرۋشىسى (1994-1995 جىلدارى) بولدى.

قازاقستان رەسپۋبليكاسى مينيسترلەر كابينەتى اپپاراتىنىڭ باسشىسى (1995); قىزىلوردا وبلىسىنىڭ اكىمى (1995-1999 جىلدارى); وڭتۇستىك قازاقستان وبلىسىنىڭ اكىمى (1999-2002 جىلدارى) قىزمەتتەرىن اتقاردى;

قازاقستان رەسپۋبليكاسى كەدەندىك باقىلاۋ اگەنتتىگىنىڭ توراعاسى, قازاقستان رەسپۋبليكاسى قارجى ۆيتسە-ءمينيسترى – كەدەندىك باقىلاۋ كوميتەتىنىڭ توراعاسى (2002-2006); پرەمەر-مينيستر كەڭسەسى باسشىسىنىڭ ورىنباسارى – قازاقستان رەسپۋبليكاسى پارلامەنتىندەگى ۇكىمەتتىڭ وكىلى (2006-2007); قازاقستان رەسپۋبليكاسىنىڭ ەكونوميكا جانە بيۋدجەتتىك جوسپارلاۋ ۆيتسە-ءمينيسترى (2007 جىلى اقپان – 27 تامىز). 2007 جىلدىڭ تامىزىنان قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى. 2009-2014 جىلدارى – شىعىس قازاقستان وبلىسىنىڭ اكىمى. 2014-2015 جىلدارى قازاقستان رەسپۋبليكاسى پرەمەر-ءمينيسترىنىڭ ورىنباسارى. 2015-2019 جىلدارى اقتوبە وبلىسىنىڭ اكىمى قىزمەتىن اتقاردى.

«قۇرمەت» (1999), «پاراسات» (2007) وردەندەرىمەن, «استانا» (1998), «قازاقستان رەسپۋبليكاسىنىڭ تاۋەلسىزدىگىنە 10 جىل» (2001), «قازاقستان رەسپۋبليكاسىنىڭ كونستيتۋتسياسىنا 10 جىل» (2005) مەدالدارىمەن ماراپاتتالعان.

قر ەڭبەك جانە الەۋمەتتىك قورعاۋ ءمينيسترى لاۋازىمىن 2019 جىلدىڭ اقپانىنان بەرى اتقارىپ كەلدى.