جاڭالىقتار
بەرىك ءۋالي: ايدوس سادىقوۆقا جاسالعان قاستاندىققا قاتىستى تەرگەۋدى پرەزيدەنت باقىلاپ وتىر
فوتو: akorda.kz
مەملەكەت باسشىسى كيەۆتە قازاقستان ازاماتى ايدوس سادىقوۆقا جاسالعان قاستاندىققا قاتىستى تەرگەۋ امالدارىن ءجىتى باقىلاپ وتىر.بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي ايتتى.
«پرەزيدەنتتىڭ تاپسىرماسىنا سايكەس قازاقستاننىڭ قۇقىق قورعاۋ ورگاندارى قىلمىستىق ءىستىڭ ءمان-جايىن انىقتاۋ ءۇشىن شۇعىل شارالار جۇرگىزىپ جاتىر.
مەملەكەت باسشىسى قۇقىق قورعاۋ ورگاندارىنا كۇدىكتىلەردىڭ قازىرگى مەكەنجايىن انىقتاپ, ءتيىستى شارالار قابىلداۋدى تاپسىردى.
قازاقستان تاراپى ۋكراينانىڭ قۇقىق قورعاۋ قۇرىلىمدارىمەن, ونىڭ ىشىندە ينتەرپول جۇيەسى بويىنشا بىرلەسە جۇمىس ىستەۋگە دايىن», – دەپ جازدى ول الەۋمەتتىك جەلىدەگى پاراقشاسىندا.
بۇعان دەيىن ۋكراينا ۇلتتىق پوليتسياسى قازاقستاندىق وپپوزيتسيالىق بەلسەندى ءارى جۋرناليست ايدوس سادىقوۆقا قاستاندىق جاساعان ادامداردى انىقتادى دەپ حابارلاعان ەدى.
