“Betiniń jartysyn tikken“. Aqtaýda qyz balanyń basyna fýtbol qaqpasy qulady

Foto: Massaget.kz/Aıagóz Izbasarova

Aqtaýda 12 jastaǵy qyz balanyń basyna fýtbol qaqpasy qulaǵan. Jasóspirimniń betiniń teń jartysyn tigýge týra kelgen, – dep habarlaıdy qandastar.kz Massaget.kz tilshisine silteme jasap.

Oqys oqıǵa 2-shaǵynaýdandaǵy 71-úıdiń mańynda, fýtbol alańynda bolǵan. Bul týraly áleýmettik jelide Aqtaý qalasynyń turǵyny Azamat Sársenbaev jazdy.

Blogerdiń sózinshe, oqıǵa bolǵan jerde oıyn jáne fýtbol alańdarynyń tósenishi jańartylyp jatqan. Alaıda merdiger kompanııa fýtbol qaqpalaryn bekitpeı, qaldyryp ketken. Al balalar qaqpalardy turǵyzyp, oınamaq bolǵan.

«5 mınýt ótpeı, qaqpalardyń biri 12 jastaǵy qyz balanyń basyna qulaǵan. Abyroı bolǵanda dárigerler jasóspirimdi aman alyp qaldy», – deıdi ol.

Zardap shekken qyz oblystyq balalar aýrýhanasynyń travmatologııa bólimshesine jatqyzylǵan. Dárigerlerdiń aıtýynsha, jasóspirimniń jaǵdaıy turaqty aýyr.

«Jetkinshekke mańdaı súıegi synýy, mıdyń ortasha aýyrlyqtaǵy kontýzııasy dıagnozy qoıyldy. Mańdaıy kógergen. Jalpy jaǵdaıy turaqty, ortasha aýyr. Konservatıvti emdelip jatyr», – deıdi Mańǵystaý oblystyq balalar aýrýhanasynyń neırohırýrg dárigeri Erbol Kenjevalov.