ءبىلىمجاڭالىقتار
ءبىلىم جۇيەسى قىزمەتكەرلەرى فورۋمىنداعى الماتى اكىمى بايانداماسىنىڭ ءماتىنى
بۇگىن, 19 تامىزدا الماتىدا ءبىلىم جۇيەسى قىزمەتكەرلەرىنىڭ فورۋمى ءوتتى. باقىتجان ساعىنتاەۆ مۇعالىمنىڭ مارتەبەسىن كوتەرۋ جانە ولارعا قولداۋ كورسەتۋ شارالارى تۋرالى ايتتى.
قايىرلى كۇن, ارداقتى ۇستازدار, قادىرلى قاۋىم!
جاڭا وقۋ جىلىنىڭ الدىندا وزدەرىڭىزبەن وزەكتى ماسەلەلەردى تالقىلايتىن ءبىلىم سالاسى قىزمەتكەرلەرىنىڭ فورۋمىندا باس قوسىپ وتىرمىز.
بۇگىنگى كەزدەسۋدىڭ كۇن تارتىبىندەگى ماسەلەلەر بارشامىزعا ءبىلىم بەرۋدىڭ اسا ماڭىزدى باعدارلارى جونىندە جان-جاقتى پىكىر الماسۋعا, كەلەشەكتە اتقارىلار ماقسات-مىندەتتەردى بەلسەنە سارالاپ, باعامداۋعا مۇمكىندىك بەرەدى.
مۇنداي اشىق ديالوگ الاڭى – قالانىڭ ءبىلىم بەرۋ جۇيەسىن ساپالى دەڭگەيگە كوتەرۋدىڭ, ءارى باسەكەگە قابىلەتتىلىكتى قالىپتاستىرۋدىڭ بىردەن-ءبىر ماڭىزدى شارتى.
بارشامىز ءۇشىن تانىمى مول تاربيەشىنىڭ, ۇلگى تۇتاتىن ۇستازدىڭ ورنى قاشاندا بولەك.
ەلباسىمىز نۇرسۇلتان ءابىش ۇلى نازارباەۆ اتاپ وتكەندەي, «ءبىلىم جۇيەسىنىڭ جانى دا, جۇرەگى دە, تىرەگى دە – ۇستاز». ولاي بولسا, سىزدەر بەرگەن ساپالى ءبىلىم – جارقىن بولاشاقتىڭ كەپىلى.
كەز كەلگەن ادام اكىم, مينيستر بولا الادى, ال, بىراق كەز-كەلگەن ادام ۇستاز بولا المايدى.
سوندىقتان دا بولار مىناداي ولەڭ شۋماقتارى بەكەر شىققان جوق:
«عالىم دا, شاحتەر دە باس يەتىن
ۇستازىم بار سەنىڭ قاسيەتىڭ.
شىنىندا دا ۇستازدىق ەتۋ ءۇشىن, قاسيەت كەرەك.
ادامدىقتىڭ قاسيەتىن (مەيىرباندىلىق, قايىرمىدىلىق, تاربيە سەكىلدى), – دالانىڭ قاسيەتىن (دارحاندىلىق, كەڭپەيىلىدىلىك), – بابانىڭ قاسيەتىن(وتانسۇيگىشتىك, ءوز تامىرىن, مادەنيەتىن جانە رۋحىن قاستەرلەۋ) شاكىرتتىڭ جۇرەگىنە ءدان قىلىپ ەگەتىن دە ۇستاز.
ءبىزدىڭ بۇرىنعى وتكەن جاقسىلارىمىز: «ءومىر تەڭىز بولسا, مۇعالىم ونىڭ مارجانى», «دۇنيە ءداريا بولسا, مۇعالىم ونىڭ قارماعى», – دەپ بەكەر ايتپاعان.
ارداقتى ۇستازدار, سىزدەردى ساناۋلى كۇندەردەن كەيىن باستالاتىن جاڭا وقۋ جىلىمەن شىن جۇرەكتەن قۇتتىقتاۋعا رۇقسات ەتىڭىزدەر.
قوعامنىڭ العا دامۋى كوزى اشىق, كوكىرەگى وياۋ, ءبىلىمدى ازاماتتاردىڭ كوپتىگىندە.
ءبىلىمدى ۇرپاقتىڭ كوپ بولۋى, مۇعالىمدەردىڭ ماڭداي تەرى مەن ەڭبەگىندە جاتىر.
مەملەكەتتىڭ قارقىندى دامۋى ۇستازداردىڭ ءبىلىمى مەن بىلىگىنە تىكەلەي بايلانىستى. مۇعالىمنىڭ ساپالى ءبىلىمىنىڭ استارىندا سانالى ۇرپاق, بىلىكتى مامان, ۇلتجاندى ازامات, بەلسەندى قوعام, قايىرىمدى حالىق, بەرەكەلى ەل جاتىر.
سىزدەر مەملەكەتتىڭ ءبىلىمى مەن تاربيەسىنىڭ بەسىگىن تەربەتىپ وتىرعان قادىرلى قاۋىمسىزدار!
بىلىمنەن بولەك, اقپاراتپەن الىسقان مىنا قوعامعا ۇستازدىڭ تاربيەسى اۋاداي قاجەت. وزگەنىڭ بالاسىن ءوز بالاسىنداي تاربيەلەپ وتىرعان قۇرمەتتى ۇستازدار قاۋىمى سىزدەرگە العىستان باسقا ايتارىمىز جوق.
الاشتىڭ ارداقتى ازاماتى ءاليحان بوكەيحانوۆتىڭ: «ۇلتقا قىزمەت بىلىمنەن ەمەس, اۋەلى مىنەزدەن», – دەگەن ءمىنسىز ءسوزى بار.
ۇرپاقتىڭ مىنەزىن قالىپتاستىرۋدا بىزگە بۇگىندە دارىندى ۇستازدار كەرەك!
دارىندى ۇستاز – قاسيەتى مەن ءبىلىمىنىڭ ارقاسىندا شاكىرتتەرىنىڭ جۇرەگىن جاۋلاعان, زاماناۋي ءىلىمدى مەڭگەرگەن كاسىبي مامان.
قاسيەتتىڭ استارىندا بىلىممەن قوسا سابىر, ءتوزىم, شىدام, ۇلكەن مەيىرىم مەن رۋح جاتىر.
ۇرپاققا ءبىلىم بەرۋ, ارينە, ماڭىزدى, دەگەنمەن ۇرپاق تاربيەسىنە دە كوپ كوڭىل ءبولۋ قاجەت.
وكىنىشكە وراي, قازىرگى تاڭدا ۇرپاقتىڭ مىنەزى ۇساقتالىپ بارادى.
سول سەبەپتى, بىزگە بۇگىندە مىنەزى ءىرى ۇرپاق قاجەت, قۇرمەتتى ۇستازدار!
تولىعىراق: https://www.almaty.gov.
