بيولوگ-عالىم تۇيە سۇتىنەن جاسالعان شيپالى سۋسىندى وندىرىسكە ەنگىزدى

اتىراۋلىق بيولوگ-عالىم سوفيا ساعىندىقوۆا تۇيە سۇتىنە قىزىلشا شىرىنىن قوسىپ, شيپالى سۋسىندى وندىرىسكە ەنگىزدى. جاڭا ءونىم – ادام اعزاسىنا پايدالى, دارۋمەنى مول, سونداي-اق قانت ديابەتىمەن اۋىراتىندار ءۇشىن تاپتىرماس ەم, – دەيدى عالىم.

سوفيا زۇلقارنايقىزى شيپالى سۋسىندى زەرتتەۋگە 20 جىل ارنادى. جاڭا ونىمىنە قاجەتتى شيكىزاتتى تابۋ ءۇشىن الماتى, اقتوبە, قىزىلوردا, ماڭعىستاۋ وڭىرىندە وندىرىلەتىن شۇبات قۇرامىن زەرتتەگەن. ونداعى ءسۇت قىشقىلى باكتەريالارىن زەرتتەپ, تالاي سىناما دا العان. ىزدەنۋدەن شارشاماعان عالىم قازىر بەينەتىنىڭ زەينەتىن كورىپ وتىر.

سوفيا ساعىندىقوۆا, بيولوگ: — قازىر كوپتەگەن انالاردا ءسۇت جەتىسپەيدى. وعان دابۇل جاقسى, قاجەتتى ءونىم. بالا وسكەننەن كەيىن دە بەرۋگە بولادى بالالارعا. قازىر كوپتەگەن ادامداردىڭ يممۋنيتەتى تومەن. يممۋنومودۋلياتور رەتىندە قولدانۋعا بولادى بۇل سۋسىندى. دۇرىس تاماقتانۋدى دۇرىس دەپ ەسەپتەيمىن. انتيبيوتيك قابىلداعان ۋاقىتتا ودان كەيىن مىندەتتى تۇردە پروبيوتيك ءىشۋ كەرەك. پروبيوتيك رەتىندە ءبىزدىڭ سۋسىندا قولدانۋعا بولادى. سوفيا ساعىندىقوۆا جاڭا ونىمىنە «سوفمايا» دەپ ات قويعان. بۇل ءوزىنىڭ ەسىمى مەن ۇستازى, بەلگىلى بيولوگ مايا شىعاەۆانىڭ قۇرمەتىنە قويىلعان. قازىر جاڭا ءونىم عىلىم جانە جوعارى ءبىلىم مينيسترلىگىنىڭ «عىلىم قورى» ارقىلى «عىلىمي زەرتتەۋ ناتيجەسىن قارجىلاندىرۋ جوباسى» اياسىندا گرانتقا يە بولعان.

ەندى ماڭعىستاۋ وبلىسىنداعى ءسۇت زاۋىتىنان شيپالى سۋسىندى شىعارۋ جوسپارلانىپ وتىر. ساۋلە دۋمانقىزى, ءسۇت زاۋىتىنىڭ تەحنولوگى: — قازىر جاڭا ءونىمنىڭ جوباسى ازىرلەنىپ جاتىر. ول – تۇيە سۇتىنەن دايىندالاتىن «سوفمايا» سۋسىنى. ادامنىڭ دەنساۋلىعىنا وتە پايدالى. ءبىز سۋسىندى ازىرلەپ, جۋىردا شىعارامىز. بيولوگ-عالىم بۇل شىرىننىڭ قاتەرلى ىسىك اۋرۋلارىنا قارسى تۇرۋ قابىلەتىنە قاتىستى زەرتتەۋلەر جۇرگىزىلىپ جاتقانىن ايتادى. ارينە, بۇل ءونىم اتى جامان اۋرۋدى ەمدەيدى دەگەن جاڭساق پىكىر قالىپتاسپاۋى كەرەك. دەگەنمەن اۋرۋدان قورعاۋ مەن اعزاداعى ۋلى زاتتاردان ارىلۋعا كومەگى مول, – دەيدى عىلىمي جوبانىڭ اۆتورى.