بيشىمباەۆ تەرگەۋگە كومەكتەسپەگەن

سالتانات نۇكەنوۆا جابىق مي جاراقاتىنىڭ سالدارىنان قايتىس بولعان. سوت مەديتسينالىق ساراپتامانىڭ قورىتىندىسى وسىنداي.

بۇگىن ونى جابىرلەنۋشى تاراپتىڭ ادۆوكاتتارى وقىپ بەردى. ريات شوني, ءتىلشى: — قوعامدا رەزونانس تۋدىرعان ەكس-مينيستر قۋاندىق بيشىمباەۆقا قاتىستى سوت پروتسەسى جالعاسىپ جاتىر. ونىڭ ءىسى القابيلەردىڭ قاتىسۋىمەن قارالىپ جاتىر. بۇنى ايىپتالۋشى تاراپ ءوزى سۇراعان بولاتىن. بۇگىنگى وتىرىستا مارقۇم سالتانات نۇكەنوۆانىڭ تەلەفونى قارالدى.

ونداعى حاتتار وقىلىپ, فوتوسۋرەتتەر كورسەتىلدى. ال ايىپتاۋشى تاراپ سوتقا دەيىنگى تەرگەۋ امالدارى بارىسىندا قۋاندىق بيشىمباەۆ ءوز تەلەفونىن كورسەتپەگەندىگىن العا تارتتى. مارقۇم سالتانات نۇكەنوۆانىڭ تەلەفونىن تەكسەرۋدى ايىپتالۋشى تاراپتىڭ ادۆوكاتتارى بۇعان دەيىن بىرنەشە مارتە سۇراعان بولاتىن. بيشىمباەۆتىڭ قورعاۋشىلارى حاتتاردان بولەك, ونداعى فوتوسۋرەتتەردىڭ بارلىعىن سوتتا كورسەتۋدى تالاپ ەتتى. ولاردىڭ سوزىنشە, مۇندا ايىپتاۋ اكتىسىن جوققا شىعاراتىن دالەلدەر بار.

دەگەنمەن سالتانات نۇكەنوۆانىڭ اعاسى ايتبەك امانگەلدى تەلەفونداعى سۋرەتتەردى وڭاي الماستىرۋعا بولاتىندىعىن ايتتى. اقىرى سۋديا ايجان كولباەۆا ادۆوكاتتاردىڭ بۇل ءوتىنىشىن قاناعاتتاندىرمادى. پروكۋرور مارقۇمنىڭ تەلەفونىنداعى بىرقاتار جازبانى وقىدى. سالتانات نۇكەنوۆا ءوزىنىڭ ازاماتتىق نەكەدەگى كۇيەۋىمەن اراقاتىناسى تۋرالى جازعان.

ايجان ايماعانوۆا, مەملەكەتتىك ايىپتاۋشى: — «قۋاندىق, مەن ءبىرجولاتا پاۆلودارعا كەتەمىن. ارامىزدا سەزىم قالماعانىن ءتۇسىندىم. ەش نارسەنى ساقتاعىم كەلمەيدى. ول مۇمكىن دە ەمەس. وپاسىزدىق جاساعانىڭ ءۇشىن كەشىرىم دە سۇرامادىڭ, ەش نارسە ىستەمەدىڭ. بارىنە مەنى كىنالاپ, پسيحوتەراپەۆكە قارال دەي بەردىڭ. بۇدان ءارى شىداي المايمىن. كەشىر مەنى, ۇمىت مەنى جانە ماعان بوستاندىق بەر. مەن بارلىعىن وسى جەردەن توقتاتامىن دەپ شەشتىم. مەن اتا-اناممەن بىرگە بولامىن, ولار ماعان قارايلاسادى», – دەپ جازىلعان. قۋاندىق بيشىمباەۆ, ايىپتالۋشى: — شىنىمدى ايتسام, مەن بۇل ماتىنمەن تانىس ەمەسپىن.

ونى ءبىرىنشى رەت ەستىپ تۇرمىن. سالتاناتتىڭ پسيحيكالىق جاعدايى تۇراقسىز بولعاندىقتان, مەن وعان ۇنەمى پسيحوتەراپەۆت تۋرالى ايتاتىنمىن. ول 2 كۇنگە قوناقۇيگە كەتكەن ەدى. ۇنەمى كەتىپ قالا بەرگەندىكتەن, مەن دە ۇيدە وتىرمايمىن, كۇتپەيمىن دەپ شەشتىم. سول كەزدە سالتانات نەگە ۇيگە بوتەن ايەلدەردى اكەلەسىڭ دەيتىن. بۇگىن سوت وتىرىسىندا جابىرلەنۋشى تاراپتىڭ ادۆوكاتتارى سوت-مەديتسينالىق ساراپتامانىڭ قورىتىندىسىن جاريالادى. مارقۇمنىڭ دەنەسىندە قانداي جاراقاتتار بولعانىن وقىپ بەردى. جاننا ورازباقوۆا, جابىرلەنۋشى تاراپتىڭ ادۆوكاتى: — دەنەنىڭ سىرتقى جاراقاتتارى تۋرالى ساراپتامانى شامامەن 40 مينۋتتاي وقىدىق

. ولار 2,5 بەتكە جازىلعان. سوت-مەديتسينالىق ساراپتاما كەزىندە سالتانات نۇكەنوۆانىڭ دەنەسىنەن باس سۇيەك-مي جاراقاتى, بەتىندە كوپتەگەن جارا مەن قان انىقتالدى. مۇرنى سىنعان, ونىڭ اينالاسىنداعى تەرىسىنە قان ۇيىعان. باس تەرىسىندە سۋبدۋرالدى گەماتوما انىقتالعان. بۇل ساراپتاما بىلتىر قاراشانىڭ 10-ءى كۇنى جاسالعان. سوتتا جابىرلەنۋشى تاراپ قاڭتاردىڭ 4-ءى كۇنى قوسىمشا جاسالعان ساراپتامانىڭ قورىتىندىسىن دا وقۋدى سۇرادى. مۇندا سالتانات نۇكەنوۆانىڭ نەدەن قايتىس بولعاندىعى ايتىلعان ەكەن. بىراق بيشىمباەۆتىڭ ادۆوكاتتارى بۇل زەرتتەۋدى جەكە ساراپشى جاساعاندىعىن العا تارتىپ, ونى جاريالاۋعا رۇقسات بەرمەۋدى سۇرادى. ال مارقۇمنىڭ اعاسى ايتبەك امانگەلدىنىڭ ايتۋىنشا, ايىپتالۋشى تاراپ قازىر تەك ۋاقىت سوزۋدىڭ امالدارىن جاساپ وتىر. ايتبەك امانگەلدى, مارقۇمنىڭ اعاسى: — ويتكەنى ونىڭ يزولياتوردا وتىرعان 1 كۇنى, قاتەلەسپەسەم, 2 كۇن دەپ ەسەپتەلەدى. جالپى جازا مەرزىمىن ازايتۋ ءۇشىن ولارعا ۋاقىت سوزۋ ءتيىمدى بولىپ تۇر. ايتا كەتۋ كەرەك, وتكەن سوت وتىرىسىندا ەكىنشى ايىپتالۋشى باقىتجان بايجانوۆ ءوزىن قۋاندىق بيشىمباەۆتان بولەك جەرگە وتىرعىزۋدى وتىنگەن. ايتۋىنشا, وعان قىسىم كورسەتىلىپ جاتىر. سوت وتىرىسىندا قوس كۇدىكتى ءبىر-بىرىنەن الشاق وتىرعىزىلدى. ال ادۆوكاتتار بايجانوۆ نە ءۇشىن ايىپتالىپ جاتقانىن ءالى كۇنگە دەيىن تۇسىنبەي كەلەدى. الىبەك سەكەروۆ, ب. بايجانوۆتىڭ ادۆوكاتى: — بايجانوۆ ونى نە ءۇشىن ايىپتاپ جاتقانىن تۇسىنبەيدى. سەبەبى ول ءاۋ باستان تەرگەۋدەن ەشتەڭەنى جاسىرعان جوق. بار شىندىقتى ايتتى. سوت-مەديتسينالىق ساراپتامانىڭ قورىتىندىسىندا سالتانات نۇكەنوۆا جابىق مي جاراقاتىنىڭ سالدارىنان قايتىس بولعاندىعى جازىلعان. بۇعان دەيىن قۋاندىق بيشىمباەۆ مارقۇمنىڭ ءوزى بىرنەشە مارتە تايىپ جىعىلعانىن ايتقان ەدى. ىسكە قاتىستى سوت پروتسەسى ءالى جالعاسىپ جاتىر.