بيىل 13 مىڭ قانداسىمىز تاريحي وتانىنا ورالدى – ءبىرجان نۇرىمبەتوۆ

بيىل 13 مىڭ قانداسىمىز تاريحي وتانىنا ورالدى. بۇل تۋرالى بۇگىن قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى, دەپ حابارلايدى قازاقپارات ءتىلشىسى.

«كوشى-قون پروتسەستەرىنىڭ تەك الەۋمەتتىك-ەكونوميكالىق جاعدايعا عانا ەمەس, سونىمەن بىرگە ەلدىڭ قاۋىپسىزدىگىنە تىكەلەي اسەرىن جانە كوپقىرلىعىن ەسكەرە وتىرىپ, زاڭسىز ميگراتسيانى باقىلاپ, ارنالارىنا توسقاۋىل قويۋدى, ولاردى انىقتاپ, جولىن كەسۋدى قامتاماسىز ەتۋ قاجەت. بۇگىنگى كۇنى ورىن الىپ وتىرعان كوشى-قون اعىنىنا قاتىستى ايتار بولساق, ىشكى ىستەر مينيسترلىگىندەگى ارىپتەستەرىمىزدىڭ دەرەكتەرىنە سايكەس, وسى جىلدىڭ 10 ايىندا عانا ەلىمىزگە 5,6 ملن ادام كىرىپ, الەمنىڭ 200-گە جۋىق ەلىنەن كەلگەن 5,3 ملن شەتەلدىك شىقتى», – دەدى مينيستر «قازاقستانداعى كوشى-قون: پروبلەملاار, تەندەنتسيالار, پەرسپەكتيۆالار» اتتى رەسپۋبليكالىق دوڭگەلەك ۇستەل وتىرىسىندا.

ونىڭ اتاپ وتۋىنشە, قازىرگى ۋاقىتتا رەسپۋبليكادا شەتەلدەن جۇمىس كۇشىن تارتۋ ساياساتى جۇزەگە اسىرىلىپ جاتىر. ەلىمىزدەگى 2 200-دەن استام كاسىپورىندا 21 مىڭنان استام شەتەلدىك ازامات رەسمي رۇقسات الىپ, جۇمىس ىستەۋدە. سونىمەن قاتار, جەكە تۇلعالاردىڭ دا شەتەلدىك جۇمىس كۇشىن تارتۋعا مۇمكىندىگى بار. جىل باسىنان بەرى 362 مىڭ شەتەلدىك ازاماتقا ەڭبەك پاتەنتى بەرىلدى. «قازاقستان ەتنيكالىق قازاقتاردىڭ تاريحي وتانىنا ورالۋىنا جاعداي جاساۋ ساياساتىن جۇرگىزىپ كەلەدى. تاۋەلسىزدىك جىلدارى ىشىندە 1 ميلليوننان استام قانداسىمىز ەلگە ورالدى. وسى جىلدىڭ ىشىندە عانا 13 مىڭ قانداسىمىز ەلىمىزگە قونىس اۋداردى», – دەدى ءبىرجان نۇرىمبەتوۆ.