بيىل قانشا ادام اسكەرگە بارادى?

فوتو:اكىمدىك

ەلوردادان اسكەرگە شاقىرىلعان 1 مىڭ ازامات اسكەري بورىشىن وتەۋگە جىبەرىلەدى. بۇل تۋرالى استانا قالاسى قورعانىس دەپارتامەنتى باسشىسىنىڭ ورىنباسارى ءانۋار اۋباكىروۆ كوممۋنيكاتسيالار قىزمەتىندە وتكەن بريفينگتە مالىم ەتتى, دەپ حابارلادى qandastar.kz

سپيكەردىڭ سوزىنشە, قازاقستاندىقتاردى 2025 جىلى مەرزىمدى اسكەري قىزمەتكە شاقىرۋ اسكەرگە شاقىرىلۋشىلار سانىنىڭ ارتۋى, اسكەري قىزمەتتىڭ بەدەلى مەن تارتىمدىلىعىن ارتتىرۋ ماسەلەلەرىنىڭ جۇزەگە اسىرىلۋىمەن, سونداي-اق تىركەۋ جانە شاقىرۋ جۇمىستارىن تسيفرلاندىرۋمەن بايلانىستىرىلادى.

«مەملەكەت باسشىسىنىڭ تاپسىرمالارى اياسىندا, سونداي-اق اسكەرلەردىڭ قاجەتتىلىگىنە سايكەس 2025 جىلى وسى ساناتتاعى ازاماتتاردى قارۋلى كۇشتەرگە, باسقا دا اسكەرلەر مەن اسكەري قۇرىلىمدارعا شاقىرۋ 2000-عا جۋىق ادامعا ۇلعايتىلدى. سونىمەن بىرگە, وسى جىلدىڭ ناۋرىز ايىنان باستاپ جەرگىلىكتى اسكەري باسقارۋ ورگاندارىندا مەرزىمدى اسكەري قىزمەتشىلەردىڭ اسكەري قىزمەتكە جارامدىلىق دارەجەسىن انىقتاۋ بويىنشا شاقىرۋ جانە دارىگەرلىك كوميسسيالار جۇمىس ىستەي باستادى», — دەدى ءانۋار اۋباكىروۆ.

ونىڭ مالىمەتىنشە, استانادان اسكەري قىزمەتكە 1 مىڭ جاڭا سارباز جىبەرىلەدى.

بيىل اسكەرگە شاقىرىلۋ مەرزىمىن كەيىنگە قالدىرۋعا نەمەسە شاقىرۋدان بوساتۋعا قۇقىعى جوق 18-27 جاس ارالىعىنداعى جىگىتتەر شاقىرىلادى.

«اسكەري قىزمەت ءاربىر جاس ازامات ءۇشىن زاڭ جۇزىندە بەكىتىلگەن مىندەت ەكەنىن جانە ونى ورىنداماۋ بارلىق قىلمىستىق جانە اكىمشىلىك جاۋاپكەرشىلىككە اكەپ سوعاتىنىن ەسكە سالعىم كەلەدى», — دەپ ەسكە سالدى ول.