بيىل تۇركىستانعا جاڭا مارتەبە بەرىلەدى

2022 جىلدىڭ 27 قىركۇيەگىندە تۇركىستان وبلىسىنىڭ جۇرتشىلىعىمەن كەزدەسكەن مەملەكەت باسشىسى قاسىم-جومارت توقاەۆ «تۇركىستانعا, جالپى, وسى وبلىسقا ەرەكشە ءمان بەرۋدى» جۇكتەپ, مۇنى «ەڭ الدىمەن, ۇكىمەتىمىزدىڭ باستى مىندەتى» دەپ بەلگىلەدى. سودان 2023 جىلعى 17 ماۋسىمدا ۇلتتىق قۇرىلتايدىڭ ەكىنشى وتىرىسىن تۇركىستان قالاسىندا وتكىزىپ, سونداعى سوزىندە ءوڭىردى «قازاقتىڭ رۋحاني استاناسىنا» اينالدىرۋ باستاماسىن قايتالادى.

ۇلتتىق ەكونوميكا مينيسترلىگى سول ماۋسىم ايىندا «تۇركىستان قالاسىنىڭ ەرەكشە مارتەبەسى تۋرالى» جەكە زاڭنىڭ جوباسىن ازىرلەپ, شۇعىل تۇردە قوعامدىق تالقىلاۋعا شىعاردى.

بۇل قۇجات قىسقا عانا بولدى. كولەمى نەبارى 7 بەتتەن ءسال اسادى. ەڭ باستى بابىندا «تۇركىستان قالاسى – قازاقستان رەسپۋبليكاسىنىڭ رۋحاني جانە تاريحي استاناسى» دەپ جازىلدى.

مۇنى ەستىپ, ەل دۇرلىكتى. الەۋمەتتىك جەلى «قازاقستاننىڭ استاناسى تۇركىستانعا كوشىرىلەدى ەكەن» دەگەن اڭگىمەگە تولدى. وبلىس ورتالىعىندا پاتەر باعاسى شارىقتادى. كەيبىر ازامات داعدارىس زامانىندا استانانى كوشىرىپ, تاعى شامادان تىس شىعىندالۋعا قارسىلىعىن اشىق ايتتى.

جوبا جۇرتتىڭ قاتاڭ سىنىنا ماڭداي سوققاننان كەيىن ۇلتتىق ەكونوميكا مينيسترلىگىنە قۇجاتتى قايتا پىسىقتاۋعا تۋرا كەلدى. ءسويتىپ, بىلتىرعى 2 تامىزدا قوعام نازارىنا ۇسىنىلعان «تۇركىستان قالاسىنىڭ ەرەكشە مارتەبەسى تۋرالى» زاڭ جوباسىنىڭ جاڭا نۇسقاسىنان «استانا» ءسوزى الىپ تاستالدى.

ونىڭ ورنىنا جاڭا جوباعا سايكەس, «تۇركىستان وبلىسى – قازاقستان رەسپۋبليكاسىنىڭ رۋحاني جانە تاريحي ورتالىعى ەرەكشە مارتەبەسىنە يە» بولادى. ال تۇركىستان قالاسى – سونىڭ «اكىمشىلىك ورتالىعى بولىپ تابىلادى».

بىراق سودان كەيىن قۇجات «حابار-وشارسىز» كەتكەن. ەندى ءمالىم بولعانداي, ماسەلە كۇن تارتىبىنەن الىپ تاستالماپتى, سودان بەرى زاڭدى ازىرلەۋشىلەر ونى قايتا پىسىقتاپ شىققان. ناتيجەسىندە, ونىڭ ءبىر زاڭ ەمەس, تۇتاس زاڭدار توپتاماسىنا اينالاتىنى انىقتالدى.

ياعني, جوعارىدا اتالعان نەگىزگى زاڭ جوباسى سىرتىندا, «قر كەيبىر زاڭنامالىق اكتىلەرىنە تۇركىستان قالاسىنا ەرەكشە مارتەبە بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوباسى دا دايىندالدى.

قۇجاتتار تاياۋدا پارلامەنتكە ەنگىزىلەدى دەپ كۇتىلۋدە. قابىلدانۋ مەرزىمى رەتىندە 2024 جىل كورسەتىلگەن. دەمەك, تۇركىستان بەيرەسمي مادەني استانادان زاڭ جۇزىندە مارتەبەسى بەكىتىلگەن «قازاقستان رەسپۋبليكاسىنىڭ رۋحاني جانە تاريحي ورتالىعىنا» اينالۋى مۇمكىن.

بۇل زاڭنامالىق تۇزەتۋلەر توپتاماسى جەر كودەكسىنە, «قر ساۋلەت, قالا قۇرىلىسى جانە قۇرىلىس قىزمەتى تۋرالى», «تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى», «قر تۋريستىك قىزمەت تۋرالى» زاڭدارعا وزگەرىستەر ەنگىزەدى.

ساياساتتانۋشى زەيىن سابىرقۇلوۆ تۇركىستاندى شىن مانىندە استانا ەتۋ تۋرالى باستامالار سالماقتى تالقىلانعانىن ايتادى.
«دايەكتەمەلەر دە بايسالدى بولدى. ەڭ باستىسى, تۇركىستان سوناۋ ەسىم حاننان باستاۋ الىپ, ءXىV-ءحVIIى عاسىرلاردا قازاق حاندىعىنىڭ استاناسى بولدى عوي. سونداي-اق ءوڭىردىڭ قوس الپاۋىتتان دا الىس جاتقانى العا تارتىلدى. مىسالى, رەسەيدىڭ ومبى وبلىسىنان استاناعا دەيىن نەبارى 550 شاقىرىم عانا. تۇركىستان بولسا, رەسەيدەن 2 مىڭ شاقىرىمداي الىس قونعان. ول قىتايدان دا شالعايدا. «ەگەر استانانى تۇركىستانعا كوشىرسەك, ورتالىق ازيا ەلدەرىمەن قارىم-قاتىناسىمىز تىپتەن بەكي تۇسەدى» دەگەن دايەكتەمە دە ايتىلدى. بىراق بۇل ۇسىنىستار ەل باسشىلىعى تاراپىنان قولداۋ تاپپاعان كورىنەدى», – دەدى ساياساتتانۋشى.