بيىل ۇلتتىق كينو ورتالىعىنىڭ قولداۋىمەن 10 فيلم پروكاتقا شىعادى

فوتو: اشىق دەرەككوز

بيىل ۇلتتىق كينو ورتالىعىنىڭ قولداۋىمەن 10 جاڭا فيلم پروكاتقا شىعىپ, كورەرمەنىن قۋانتپاق. بۇل فيلمدەردە  جاس ۇرپاقتىڭ تاربيەسىنە وڭ ىقپال ەتەتىن, كورەرمەنگە وي سالاتىن قۇندى يدەيالار كورىنىس تابادى, دەپ جازدى qandastar.kz

ولاردىڭ قاتارىندا 2011 جىلى تارازداعى تەراكتىدە قازا تاپقان عازيز بايتاسوۆقا ارنالعان «كاپيتان بايتاسوۆ» كينوكارتيناسى بار. سونىمەن بىرگە لۋدومانيا تاقىرىبىن قوزعايتىن «يگرومانكا» جوباسى دا قوعامنىڭ كەسەلىن اشىپ كورسەتەدى. ال «90+1» ءفيلمى جاستاردىڭ سالاۋاتتى ءومىر سالتىن ۇستانۋعا جانە سپورتقا دەگەن قۇلشىنىسىن وياتادى. بۇدان بولەك, «وسەنني بريز», «فەيكوۆىي ارمان», «Qaitadan», «تەزەك», «قارا قىز», «التىن ادام», «اروماتنوە سەردتسە» جانە «ءابىل» فيلمدەرى كينوتەاترلاردا ۇسىنىلادى.

«كينو – جاي عانا ونەر ەمەس, ۇلتتىق يدەولوگيانى قالىپتاستىراتىن قۇرالدىڭ ءبىرى. مەملەكەت قارجىسىنا تۇسىرىلگەن كينودا, ەڭ الدىمەن, قوعامعا قاجەتتى قۇندىلىقتار دارىپتەلۋى ءتيىس. بۇعان دەيىن پرەزيدەنت قاسىم-جومارت توقاەۆ تا كينويندۋستريانى مادەنيەتتىڭ ءبىر بولىگى عانا ەمەس, ەكونوميكانىڭ جەكە تارماعى رەتىندە قاراستىرۋدى تاپسىردى. كينونى دامىتۋ ءۇشىن جاڭاشا كوزقاراس, تىڭ سەرپىن قاجەتتىگىن العا تارتتى. ءتۇسىرىلىم بارىسىندا وسى دۇنيەلەردىڭ بارلىعى ەسكەرىلدى. قولعا الىنعان جوبالار كورەرمەن كوڭىلىنەن شىعادى دەگەن ويدامىز», – دەدى ۇلتتىق كينونى قولداۋ ورتالىعىنىڭ باسقارما توراعاسى قۇرمانبەك جۇماعالي.

كينو ورتالىعى ناۋرىز ايىنىڭ باسىندا جاڭا كينوجوبالار كونكۋرسى جاريالاناتىنىن دا حابارلايدى. بيىل فيلم تۇسىرۋگە ارنالعان باسىم تاقىرىپتار لەگى جاريالاندى. ونىڭ ىشىندە ەڭ الدىمەن وتانعا دەگەن سۇيىسپەنشىلىك, تاريح, تاعىلىم, ءبىلىم, وتباسى سەكىلدى ماڭىزدى تاقىرىپتار قامتىلعان. بۇعان قوسا جۇمىسشى ماماندىقتارى مەن ەڭبەك ادامدارىنىڭ ەرلىگى دە باسىم تاقىرىپتار قاتارىندا. تولىققاندى ءتىزىم كينو ورتالىعىنىڭ رەسمي سايتىندا قولجەتىمدى.

ايتا كەتۋ كەرەك, وتكەن جىلى مەملەكەتتىك قولداۋعا ۇمىتكەر كينوجوبالاردى ىرىكتەۋ ەرەجەسىنە وزگەرىستەر ەنگىزىلگەن بولاتىن. جاڭا ەرەجەگە سايكەس, كونكۋرستىڭ ءبىرىنشى كەزەڭىندە اۋەلى ستسەناريلەر قابىلدانىپ, ۇزدىكتەرى ساراپتاما كەڭەسىنىڭ قاراۋىنا جىبەرىلەدى. بۇگىنگى ەسەپپەن قاراساق, كينوگەرلەر ءۇشىن ستسەناري جازۋ, تولىمدى وي قورىتۋعا 2 اي كولەمىندە ۋاقىت بەرىلىپ وتىر.