Bıyldan bastap ár balaǵa 235 myń teńgeden berilmek

Foto: ashyq derekkóz

Prezıdent «QR keıbir zańnamalyq aktilerine Memlekettik bilim berý jınaqtaý júıesi, aqparat, qoǵamdyq damý, mádenıet jáne arhıv isi salalarynda artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańyna qol qoıdy, dep jazdy qandastar.kz

Aqordanyń habarlaýynsha, bul zańnamalyq túzetýlerdiń bir bóligi «Keleshek» biryńǵaı erikti jınaqtaý júıesin engizý maqsatynda ázirlengen. Bul ıgilikti paıdalaný úshin balanyń jasy 5 jastan asýǵa tıis.

Sonda oǵan memleketten bastapqy bilim berý kapıtaly beriledi. Oǵan jyl saıyn memlekettik syılyqaqy jáne banktik depozıttik paıyzdar tólenedi.

«Birjolǵy bastapqy bilim berý kapıtaly 2025 jyly jáne odan keıingi jyldary 5 jasqa tolǵan balalarǵa tólenedi. Onyń mólsheri Ǵylym jáne joǵary bilim mınıstrligi bekitetin «Bastapqy bilim berý kapıtalyn esepteý, paıdalaný jáne qaıtarý qaǵıdalaryna» saı esepteledi. «Keleshek» júıesi jyl saıyn 5% memlekettik syılyqaqy, al, halyqtyń áleýmettik osal toptarynyń balalary úshin 7% memlekettik syılyqaqy kózdelgen qoldanystaǵy Memlekettik bilim berý jınaqtaý júıesimen birge balańyzdyń bolashaǵy úshin qarajat jınaýǵa múmkindik beredi», – dep málimdedi Aqorda.

Bul rette «Keleshek» baǵdarlamasynyń qarjysyn tehnıkalyq jáne kásiptik bilim alýǵa, orta mektep bitirgennen keıin joǵary bilim alýǵa jáne joǵary oqý ornynan keıin bilimin jetildirýge baǵyttaýǵa bolady.

Eger kámelet jasqa tolǵan daryn kolledjge nemese ýnıversıtetke, odan soń magıstratýra ne doktorantýraǵa grantpen túsip, osynyń bárin tegin alsa, onda «Keleshektiń» qarajatyn turǵyn úı jaǵdaıyn jaqsartýǵa, páter satyp alýǵa jumsaýyna ruqsat etiledi.

Baspana kerek bolmasa, salymyn ári qaraı jınaqtaýdy jalǵastyrýyna nemese basqa balaǵa, týysqanyna syılaýyna bolady.

Ǵylym jáne joǵary bilim mınıstriniń orynbasary Talǵat Eshenqulov baǵdarlama aıasynda balalardyń qansha alatynyn túsindirdi.

«Osy «Keleshek» biryńǵaı jınaqtaý júıesiniń talaptaryna sáıkes, mysaly, jetim jáne ata-anasynyń qamqorlyǵynsyz qalǵan balalar úshin «bastapqy bilim berý kapıtalynyń» kólemi, basqa sanattaǵy balalarǵa qaraǵanda eki ese kóp bolady. Atap aıtqanda, Qazaqstandaǵy jasy 5-ten asqan barlyq balaǵa 60 aılyq eseptik kórsetkish bólinedi. Bul 2025 jyly 235 920 teńgege teń. Al, atalǵan sanattaǵy balalar úshin bastapqy kapıtal 120 AEK bolady. Bıyl bul 471 840 teńgeni quraıdy», – dedi vıe-mınıstr Eshenqulov.

«Keleshek» aıasynda balalardyń ata-analarymen shart bekitiledi. Degenmen, mınıstrdiń orynbasarynyń aıtýynsha, kelisimshartqa qol qoıý quqyǵy jetimder úıiniń basshysyna berilýi múmkin.

«Dál arnaıy shot ashylǵan mezette zańdy tulǵa retinde tirkelgen azamattyń osy kelisimshartqa qol qoıý quqyǵy bar. Balalar úıiniń basshysy qol qoıa alady. Eger balany 5 jasqa tolmaı turyp, asyrap alsa, onda bala úshin kelisimshart bekitý quqyǵy asyrap alýshy áke-sheshesine ótedi. Eger qol qoıylyp qoısa, osy quqyqtardyń negizinde asyrap alýshy ata-anamen arada kelisimshart qaıta jasalyp, sol kelisimsharttaǵy talaptar oryndalady», – dedi Talǵat Eshenqulov.

Májilistiń Áleýmettik-mádenı damý komıtetiniń múshesi Qudaıbergen Beksultanovtyń túsindirýinshe, «Keleshek» aıasynda balasyna memleketten bastapqy bilim berý kapıtalyn alý úshin ata-analar baǵdarlamaǵa qatysatyn bankte shot ashyp, oǵan ózderi de aqsha salyp turýǵa mindetti bolady. Eger qatyspasa, eń tómengi jarnany engizbese, memlekettik kapıtaldy da ala almaıdy.

«Bul zań aıasynda «Keleshek» atty biryńǵaı erikti jınaqtaý júıesi engiziledi. «Keleshekke» sáıkes, ata-analar Memlekettik bilim berý jınaqtaý júıesine qatysýshy bankte shot ashýy qajet. Memleket óz kezeginde ol shotqa birjolǵy bastapqy kapıtaldy quıady. Ol árbir jylda 5 jasqa tolǵan balalardyń shotyna jiberiletin bolady. Jetim jáne tastandy balalar úshin memleket 120 AEK-ten, basqa barlyq balalarǵa – 60 AEK-ten beredi. Bul – bir. Ekinshiden, ata-analar jyl saıyn eń quryǵanda, «eń tómen jarnalardy» tóleýi kerek», – dedi májilismen.

Onyń aıtýynsha, ata-analardan óz balasynyń shotyna jyl saıyn salyp turýy talap etiletin eń tómengi jarna:

• halyqtyń áleýmettik osal toby sanatyndaǵy balalar úshin 12 AEK-ti (2025 jyly – 47 184 teńgeni),
• basqa barlyq balalar úshin 24 AEK-ti (bıyl 94 368 teńgeni) quraıdy.

Úshinshiden, Úkimet jyl saıyn osy jınaqtarǵa barlyq balalar úshin 5%, halyqtyń áleýmettik osal toby sanatyndaǵy balalar úshin 7% mólsherinde memlekettik syılyqaqy qosady.

Tórtinshiden, baǵdarlamaǵa qatysýshy bankter tól depozıt mólsherlemesi boıynsha «Keleshek» salymdaryna depozıttik aqsha syılyqaqysyn tóleıdi.

Qoryta aıtqanda, memleket árbir balaǵa ómirinde 1 ret qana beretin birjolǵy bastapqy kapıtalǵa jáne ata-analardyń ózderi balasy úshin dál sol shotta jyl saıyn jınaıtyn jınaǵyna birinshiden memlekettik premııa beriledi (5 ne 7 paıyz). Ekinshiden, olarǵa bankter depozıttik syıaqy esepteıdi. Onyń kólemi bankke baılanysty bolady.

Aqyr sońynda jınaqtalǵan qarajatty balanyń kolledjdegi oqýyna, ýnıversıtetke aqyly túsýine jumsalýy qajet. Bul jerde depýtattardyń aıtýynsha, zań boıynsha qarajatty shetelde oqýǵa da paıdalanýǵa bolady.

Eger bala bilim berý grantymen tegin tússe, jınaqtaryn turǵyn úı satyp alýǵa nemese basqa deńgeıde bilim alý, ekinshi mamandyǵyn ıgerý úshin paıdalanýǵa múmkindik beriledi.

Budan bólek, qarajatty úshinshi tulǵanyń – týǵan aǵa-inileriniń, ápke-sińlileriniń uqsas salymyna nemese saqtandyrý kompanııasynyń shartyna aýdarýǵa bolady.

Zań boıynsha «Keleshek» qoldanystaǵy «AQYL Memlekettik bilim berý jınaqtaý júıesinde» jumys isteıtin bolady. Sony aýystyrady.