«Biz ótemaqy men turǵyn úıdi tez aldyq» – Shet aýdanynyń turǵyndary

Sý tasqynynan zardap shekken Shet aýdanynyń turǵyndaryna úıler satyp alyndy. Baspanasy qyzyl sý basyp, jaramsyz bolyp qalǵan bes otbasy ózderine úı tańdady. Olar bıýdjet qarajaty esebinen satyp alyndy. Aldaǵy kúnderi taǵy bir otbasyna jańa úı salyna bastaıdy. Olardyń aýylynda satylatyn úı bolmaǵandyqtan jańasyn salý týraly sheshim qabyldandy.

Apatty dep tanylmaǵan basqa 54 úıde jóndeý jumystary júrgiziledi. Turǵyndar osy maqsattar úshin ótemaqy alyp, máseleni óz betinshe sheshýge nıet bildirdi.

Krasnaıa Polıana aýylynyń turǵyny Aqmaral Mýsına óz otbasy úshin qolaıly úı tańdady. Kóp balaly ana máseleniń tez arada sheshilgeni úshin alǵysyn aıtty.

– Biz ótemaqy men materıaldyq kómek aldyq. Úıdi ózimiz tańdadyq. Ákimdik unaǵan úıdiń bireýin satyp alyp beremiz dedi. Aıta keteıin, múliktik ótemaqy men turǵyn úıdi biz óte tez – bir apta ishinde aldyq, – deıdi Aqmaral Mýsına.

Stadnıchenko otbasy úshin de Krasnaıa Polıana aýylynan úı satyp alyndy. Nadejda Stadnıchenko – kóp balaly ana, otbasym panasyz qalmaǵanyna qýanyshtymyn deıdi.

– 30 naýryz kúni tańerteń úıde sý kire bastady, – deıdi aýyl turǵyny. – Tehnıkadan biz tek tońazytqysh pen peshti alyp úlgerdik, qalǵanynyń bári jaramsyz bolyp qaldy. Bir-eki kún qurbymnyń úıinde turdyq. Qazir biz jóndeýden ótken 2 bólmeli úı aldyq. Úlken zaly bar, dárethana men jýynatyn bólme, ortalyq sý qubyry, monsha, kómir bar. Aýlasynda biz baqsha salýdy josparlap otyrmyz. Sondaı-aq, materıaldyq kómek pen búlingen múlik úshin ótemaqy aldyq. Qazir biz týystarymyzda turamyz, biraq jańa úıge kóshemiz. Barlyǵy tez sheshilgenine óte qýanyshtymyn.

Sondaı-aq, Shet aýdanynda sý tasqynynan zardap shekkenderge 100 AEK mólsherinde birjolǵy áleýmettik kómek jáne búlingen múlik úshin ótemaqy tólendi.

Qyrylǵan mal shyǵyny óteldi. О́lgen mal barlyq veterınarııalyq-sanıtarııalyq normalardy saqtaı otyryp joıyldy.

Biz sý tasqyny kezinde bes sıyr men bir qulynnan aıyryldyq, – deıdi Aqsý aýylynyń turǵyny Aıjan Qashkenbaeva. – Jaqynda mal aldyq. Sondaı-aq bizge generator, teledıdar ákelindi. Bizde aǵash óńdeıtin tehnıkamyz, muzdatqyshymyz buzyldy. Bul zalal bizge tolyǵymen óteldi.

Sý basqan eldi mekenderde qudyqtar men uńǵymalardy túgendeý júrgiziledi. Aptanyń sońyna deıin dezınfekııalyq jumystar atqarylady.

Kentishilik joldardy qalpyna keltirý jalǵasýda.