«Bizdiń áskerge jaý kerek emes, óz-ózin qyryp tastaıdy»: Jýrnalıst qazaq áskerindegi sumdyqty aıtty

Kollaj: Sn.kz

Tanymal jýrnalıst, baspager, ári qoǵam belsendisi Shyńǵys Muqan alta aıdan beri es-túzsiz komada jatqan  sarbar Erbaıannyń da jaǵdaıyna toqtaldy, dep habarlaıdy qandastar.kz Skifnews.kz aqparat portalyna silteme jasap.

Baspager Erbaıannyń qazirgi jaǵdaıyna alańdap, buǵan deıin áskerde talaı sarbaz kóz jumǵanyn sóz etti. Bul týraly ol áleýmettik jelidegi paraqshasynda jazdy.

«Bizdiń áskerge jaý kerek emes, óz-ózin qyryp tastaıdy.

Erbaıan baýyryma janyp ashyp, janymdy qoıarǵa jer tappaı otyrmyn. Mundaı sumdyq jaǵdaılar ún-túnsiz ótpeýi kerek. Sarbazdyń mehnaty eń bolmaǵanda keıingi sarbazdardy aman alyp qalý úshin qoǵamdy aıaǵynan tik turǵyzýǵa tıis.

@ulysmedia.kz -tiń jetekshisi @samal.live “sońǵy úsh jylda 270 áskerı qaıtys bolǵanyn, onyń ishinde 90 sarbaz óz-ózine qol salyp qaıtys bolǵan” (derek kózi belgisiz) degen derek keltiripti.

Bul áskerge syrtqy jaý kerek emes, óz-ózin qyryp tastaıdy dep oılap otyrǵan shyǵarsyz. Men de osylaı oılap úlgerdim.

Izraıl degen el bar, áskerı boryshyn barlyǵy óteıdi, qyzdar da, uldar da. Áskerde dál qazir 170 myń adam boryshyn ótep jatyr (Qazaqstanda 110 myń ásker). Osy Izraıl ásker arasyndaǵy álimjettikten ábden sabaq alǵan el. 2014 jyly qatarlastarynyń qorlyǵyna shydamaı Davıd Shnaıder ózine qol jumsap, rezonans bolǵan. 2010 jyly Nadav Sela degen sarbaz da ózine qol jumsaǵan. Sodan “Arnaıy Lılı” atty baǵdarlama qabyldanyp, antıbýllıń is-sharalary iske asty. Sodan soń jaǵdaı túzelgen.

“Aqymaq ózgeniń emes, óz qateliginen de sabaq almaıdy” deýshi me edi, evreı halqy óz qateliginen sabaq alypty.

Endi, bizdegi jaǵdaıdy aıta almaımyn. Bizde qatelikten sabaq alý degen joq. Erbaıannyń jaǵdaıy, mine osyndaı. Sodan ne ózgerdi? Eshnárse! Oǵan deıin de talaı sarbaz kóz jumdy. Budan soń da kóz jumady. 99%-yn qoǵam estimeıdi.

Meniń atamnyń inisiniń balasy Keńes kezinde áskerden aýytqyp keldi. Sodan adam bolmady. Sońynda jyndyhanada qaıtys boldy. 90-jyldary aýyldaǵy bir aǵaıyn aǵamyz áskerden tiri oralmady. Sol jaǵdaı áli ózgermepti. Sebebi orystyń urdajyq minezine qurylǵan psıho-emoııalyq jaǵdaı sol baıaǵydaı, Keńes kezinen kele jatyr.

Nesin aıtamyz, bizde álimjettik tek áskerde emes, jylda tóbelesten qanshama oqýshy qaıtys bolady. Antıbýllıń onda da oqý-tárbıe úderisiniń mańyzdy bóligine aınala alǵan joq.

Shynynda da, qazir balalardyń bolashaǵynan qorqa bastadym. Keler urpaqqa qandaı qoǵamdy mura etip qaldyryp bara jatyrmyz? Durysyraq qoǵamdy qaldyra alar ma edik?..», – dep jazdy baspager.