جاڭالىقتار
بقو-عا كومەككە بارعان 3 مىڭداي قىزمەتكەر ءوز قالاسىنا قايتتى
باتىس قازاقستان وبلىسىنا كومەككە بارعان توتەنشە جاعداي مەن قورعانىس مينيسترلىگى, ۇلتتىق قاۋىپسىزدىك كوميتەتى مەن ۇلتتىق ۇلانعا قاراستى اسكەري بولىمدەردىڭ 3 مىڭداي قىزمەتكەرى بۇگىن ءوز قالاسىنا اتتاندى.
جان-جاقتان جەدەل جەتكەن كۇشتىك قۇرىلىمداردىڭ جانە جەرگىلىكتى ەرىكتىلەردىڭ ارقاسىندا 20 كۇندە وبلىس ورتالىعى مەن 84 ەلدى مەكەندە 140 شاقىرىمداي دامبا تۇرعىزىلدى, بۇرىنعى بوگەتتەر نىعايتىلدى. رەسەيدەگى يرەكتى سۋ قويماسىنان مول سۋ تاستالۋىنا بايلانىستى بيىل جايىق وزەنى 10-11 مەترگە دەيىن كوتەرىلۋى مۇمكىن دەلىنگەن ەدى. الايدا «قازگيدرومەتتىڭ» بولجامى كەلمەدى. داريا دەڭگەيى 8 مەتر 65 سانتيمەردەن اسپادى. سوڭعى 4 تاۋلىكتە وزەن 10 سانتيمەترگە ءتۇستى. سانات مۇقانوۆ, سەمەي قالاسى 28738 اسكەري ءبولىمى ديۆيزيون كومانديرىنىڭ ورىنباسارى: — كەلگەننەن باستاپ ساربازدارىمىز تىنىم تاپپاي, جايىق وزەنى جاعالاۋىن بۇعاتتاۋ مەن قالاعا قاراي سۋدىڭ جايىلۋىنىڭ الدىن الىپ, وتە ۇلكەن ەڭبەك ەتتى.
باقىتجان نارىمبەتوۆ, بقو اكىمىنىڭ ورىنباسارى: — 3 مىڭنان استام اسكەريلەر كەلىپ, ۇلكەن قولداۋ كورسەتتى. بۇل باتىس قازاقستان وبلىسىندا 84 ەلدى مەكەننىڭ قاۋىپسىز قالۋىنا, حالقىمىزدىڭ امان-ساۋ قالۋىنا ۇلكەن سەپتىگىن تيگىزدى. سول ءۇشىن بارشا كەلگەن قولداۋشىلارعا, اسكەريلەرگە قۇتقارۋشىلارعا بقو اتىنان العىس بىلدىرەمىز.
