«بلوگەرلەر جارنامالاعان»: الماتىدا ارتىق مايدان ارىلامىن دەپ وتا جاساتىپ, كوز جۇمعان ايەلدىڭ جاقىندارى ەمحانانىڭ قىزمەتىن جالعاستىرىپ جاتقانىنا نارازى

ۆيدەودان سكرينشوت

47 جاستاعى قۇرالاي باتىرحان 5 شىلدەدە الماتىداعى تانىمال Amira ەمحاناسىندا ارتىق مايىن الىپ تاستايتىن ليپوساكتسيا وتاسىن جاساتامىن دەپ اجال قۇشتى. مارقۇمنىڭ جاقىندارى ادىلدىكتى تالاپ ەتىپ, كىنالىلەردىڭ جازالانۋىن تالاپ ەتتى. بۇل تۋرالى Stan.kz اقپارات اگەنتتىگى “كورەمىز” باعدارلاماسىنا سىلتەمە جاساپ حابارلايدى.

47 جاستاعى قۇرالاي باتىرحان قۇنى 2 ميلليون تەڭگە تۇراتىن وتا ارقىلى ارىقتاماق بولىپتى. سەبەبى 2 بالانىڭ اناسى 103 كەلىگە دەيىن سالماق قوسىپ, ءوزىن جايسىز سەزىنگەن, دەنەسىندە قاتپارلار پايدا بولىپ, تەرىسى قيىلىپ قالعان. جوعارى قاباتقا كوتەرىلگەندە, ەنتىگىپ, اۆتوبۋستارعا مىنە المايتىنىن تۇسىنگەن. باۋىرلارىنىڭ ايتۋىنشا, 25 جىلدىق ءوتىلى بار مۇعالىم فيزيكالىق جاتتىعۋلار جاساپ, تونۋس كلۋبىنا دا جازىلعان, ۇزاق ۋاقىت ارتىق سالماقپەن كۇرەسكەن. الايدا جىل سايىن سالماق قوسا بەرىپتى.

ونىڭ ۇستىنە 5 جىل بۇرىن مارقۇمنىڭ جاتىرىن الىپ تاستاپتى. باۋىرلارىنىڭ سوزىنشە, وسىدان سوڭ گورمون ديزبالانسى بولىپ, تولىقتاۋىنا اسەر ەتىپتى.

«بالا كەزىنەن تەز تولادى. بىراق سوڭعى ۋاقىتتا تەز سالماق قوستى. قارنى سالبىراپ, اياعى ءىسىپ كەتەتىن. ءوزى دە اۋىرسىنىپ قالاتىنىن, ارتىق سالماق اعزاسىنا كەرى اسەر ەتىپ جاتقانىن ايتاتىن ەدى. سول ءۇشىن “مايىمدى سورعىزامىن” دەدى. مۇنى ءبىر اۋىر وتا دەپ ويلامادىم”, – دەدى قۇرالاي باتىرحاننىڭ اناسى نۇربالا تويىمباەۆا

قۇرالايدىڭ سىڭلىلەرى پلاستيكالىق وتا جاسايتىن ەمحانانى ۇزاق زەرتتەپ ىزدەگەندەرىن ايتتى. سوزدەرىنشە, بارلىق بلوگەر جاقسى پىكىر ايتىپ, ماقتاعاننان سوڭ Amira ەمحاناسىنا جاساتاتىن بوپ شەشكەن. بۇل ەمحانادا ءانشى لۋينا, بلوگەر كارينا وكسۋكپاەۆا پەن اسەل اسقار, Ninety One انشىلەرى پلاستيكالىق وتا جاساتقان ەكەن.

كلينيكا دارىگەرى دانيار ۋرمۋرزين وتا جەڭىل وتەتىنىن جانە 2 ساعاتتا اياققا تۇرىپ, ۇيىنە قايتا الاتىنىن ايتىپ سەندىرگەن. الايدا 7:40 شاماسىندا وتاعا كىرگەن قۇرالاي 5 ساعاتتان سوڭ جان تاپسىردى.

“ونىڭ تالداۋ اناليزدەرى جاقسى بولدى, دەنساۋلىعىندا ەشقانداي كىنارات بولماعان. وعان ليپوساكتسيا جانە ابدومينوپلاستيكا جاسالادى دەدى. ياعني مايدى سورعىزعان سوڭ ارتىق تەرىنى الىپ تاستايدى. اپكەمدى شەشىندىرىپ قارادى. دەنەدەن 4 كگ ماي الامىز دەدى. بۇل وتا جەڭىل وتەدى دەگەسىن دارىگەرگە سەندىك”, – دەدى مارقۇمنىڭ ءسىڭلىسى گۇلنار باتىرحان.

وتادان ويانعان سوڭ 12:42-دە قۇرالاي جۇبايىنا جازعان. ءالى ءدارى قابىلداپ جاتقانىن, وزىنە كەلە الماي, وتە ناشار سەزىنىپ جاتقانىن جەتكىزگەن. كۇيەۋى دەرەۋ كەلگەندە, ول كوماعا تۇسكەن ەكەن. قولى وتە سۋىق بولعان. الايدا ەمحانادا رەانيماتسيالىق كابينەت بولمادى دەيدى.

ايەلدىڭ ءولىمىنىڭ سەبەبى – جەدەل ميوكارد ينفاركتى دەپ جازىلعان.

كارديولوگ مامان بۇل جەردە پلاستيكالىق حيرۋرگ ناۋقاستى زەرتتەمەگەنىن جانە دۇرىس تالداۋ اناليزدەرىن الماعانىن باسا ايتتى. سەبەبى 3,4-دارەجەلى سەمىزدىك كەزىندە گورمون اۋىتقۋى, قالقانشا بەزى تولىققاندى تەكسەرىلۋى كەرەك ەدى دەيدى.

“اپكەمىزدىڭ جاعدايى قيىن ەكەنىن ءبىلىپ, ءبارىمىز ەمحاناعا كەلدىك. الايدا ولار جەدەل جاردەم شاقىرمادى. ءبىز شاقىرىپ ەدىك, “مامانداردىڭ ءوزى شاقىرماسا, ءبىز كەلمەيمىز” دەدى. بىرەسە قان قىسىمى كوتەرىلدى, بىرەسە قانتى جوعارىلادى دەپ ءتۇرلى نارسەلەردى ايتا بەردى, بىراق ناقتى تۇسىندىرگەن جوق. نە ءۇشىن جاعدايى ناشارلاعانىن تۇسىردىرمەدى. شامالىدان كەيىن ونىڭ كوز جۇمعانىن ايتتى. ءبىز جىلاپ جۇرگەن كەزدە بىزگە ەسكەرتپەستەن مايىتحاناعا دەنەنى بەرىپ جىبەرىپتى”, – دەدى مارقۇمنىڭ باۋىرى.

مامان دانيار ۋرمۋرزين ءالى قىزمەتىن جالعاستىرىپ ءجۇر. سوزىنشە, ول مۇنداي جاعدايمەن ءبىرىنشى رەت كەزىگىپ وتىر.

قازىر قىلمىستىق كودەكستىڭ 317-بابى “مەديتسينا نەمەسە فارماتسەۆتيكا قىزمەتكەرىنىڭ كاسىپتىك مىندەتتەرىن تيىسىنشە ورىنداماۋى” بويىنشا ءىس قوزعالىپ, سوت-مەديتسينالىق ساراپتاما تاعايىندالدى.

ەسكە سالساق, الماتىدا ارتىق سالماقتان ارىلۋ ءۇشىن ليپوساكتسيا جاساتقان 47 جاستاعى ايەل كوز جۇمدى. حيرۋرگيالىق وپەراتسيادان كەيىن قۇرالاي باتىرحانوۆانىڭ جاعدايى ناشارلاپ, جەكەمەنشىك كلينيكادا جان تاپسىرعان. مارقۇمنىڭ جاقىندارى بولعان ىسكە دارىگەرلەردى كىنالاپ وتىر.