جاڭالىقتار
«بۇرىنعى كۇيەۋىم بالالاردىڭ كوزىنشە اياۋسىز ۇردى»: الماتىلىق كەلىنشەك پرەزيدەنتتەن كومەك سۇرادى
فوتو: ۆيدەودان سكرين
الماتىلىق ديلبار تيمۋروۆا بۇرىنعى كۇيەۋىنىڭ وزىنە بالالاردىڭ كوزىنشە قاتىگەزدىكپەن قول كوتەرگەنىن مالىمدەدى, دەپ حابارلايدى qandastar.kz Skifnews.kz اقپارات پورتالىنا سىلتەمە جاساپ.
جابىرلەنۋشى ديلبار تيمۋروۆانىڭ ايتۋىنشا, ارادان ءۇش اپتا وتسە دە, قۇقىق قورعاۋ ورگاندارى ەشقانداي ارەكەت جاساماعان. سوندىقتان ول پرەزيدەنتتەن كومەك سۇراۋعا ءماجبۇر بولعانىن جەتكىزدى.
«مەن شاراسىز جاعدايعا تاپ بولىپ, قۇقىق قورعاۋ ورگاندارى ارەكەت ەتپەگەندىكتەن پرەزيدەنتتەن كومەك سۇراۋعا ءماجبۇرمىن. 28 تامىز كۇنى مەنى ءۇش جىل بۇرىن اجىراسىپ كەتكەن, ەكس-كۇيەۋىم نۋرادين اسان ۇلى ۇرىپ-سوعىپ, ەڭبەككە جارامسىز ەتتى. ورتامىزدا ەكى كامەلەتكە تولماعان بالا بار. ارادا ءۇش اپتا وتسە دە, قۇقىق قورعاۋ ورگاندارى تاراپىنان ەشقانداي شارا قولدانىلمادى. ماعان جاق سۇيەگىمدى قالپىنا كەلتىرۋ ءۇشىن بىرنەشە وپەراتسيا جاسالدى, اۋرۋحانادا جاتتىم. ەگەر بۇرىنعى كۇيەۋىمە قانداي دا ءبىر شارا قولدانىلعاندا, بۇلاي كومەك سۇراپ وتىرماس ەدىم», – دەيدى جابىرلەنۋشى.
ونىڭ ايتۋىنشا, ەكس-جولداسى اۋقاتتى وتباسىنان شىققاندىقتان ءىستى جاۋىپ تاستاۋى مۇمكىن.
«مەنىڭ ەكى كىشكەنتاي بالام بار. قاشان ارەكەت ەتەسىزدەر? مەنىڭ ءولۋىم كەرەك پە? ەلىمىزدىڭ كونستيتۋتسياسىنىڭ كەپىلى رەتىندە قاسىم-جومارت كەمەل ۇلى, سىزدەن كومەك سۇرايمىن! بۇرىنعى كۇيەۋىم تيمۋروۆ نۋرادين اسان ۇلىن زاڭ اياسىندا بارىنشا قاتاڭ جازالاۋىڭىزدى وتىنەمىن», – دەدى جابىرلەنۋشى.
