جاڭالىقتار
بىلتىرعى بيۋدجەت ەسەبىنە 14 دەپۋتاتتىڭ كوڭىلى تولماي, قارسى داۋىس بەردى
پارلامەنت پالاتالارىنىڭ بىرلەسكەن وتىرىسىندا دەپۋتاتتار ۇكىمەتتىڭ 2023 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبى مەن جوعارى اۋديتورلىق پالاتانىڭ قورىتىندىسىن قابىلدادى,-دەپ حابارلايدى Qandastar.kz
تالقىلاۋ كەزىندە سەنات دەپۋتاتتارى, ءماجىلىستىڭ «اۋىل», Respublica, Amanat پارتيالارىنىڭ فراكتسيالارى ۇكىمەت ەسەبىن بەكىتۋدى قولدادى.
ال «قازاقستان حالىق پارتياسىنىڭ», «اقجول» پارتياسىنىڭ فراكتسيالارى ەسەپتى قابىلداۋدان باس تارتاتىنىن ءمالىم ەتتى.
جالپىۇلتتىق سوتسيال-دەموكراتيالىق پارتيا فراكتسياسى داۋىس بەرۋدەن قالىس قالدى.
داۋىس بەرۋگە قاتىسقان دەپۋتاتتاردىڭ ىشىندە ءماجىلىستىڭ 14 دەپۋتاتى ۇكىمەت ەسەبىن قابىلداۋدان باس تارتىپ داۋىس بەردى.
قارجى ءمينيسترى ءمادي تاكيەۆتىڭ ايتۋىنشا, 2023 جىلى جالپى ىشكى ءونىم 5,1% وسكەن. جىلدىق ينفلياتسيا دەڭگەيى 2 ەسە تومەندەپ, 9,8% كولەمىندە تۇراقتالعان.
جالپى بيۋدجەت تاپشىلىعى 3,1 ترلن تەڭگە نەمەسە جالپى ىشكى ءونىمنىڭ 2,6%-ىنا تەڭ بولعان.
مەملەكەتتىك بورىش 27,2 ترلن تەڭگە نەمەسە جالپى ىشكى ءونىمنىڭ22,8%-ىنا جەتكەن.
رەسپۋبليكالىق بيۋدجەتتىڭ كىرىس جوسپارى 99,9% ورىندالىپ, بيۋدجەتكە 19 ترلن تەڭگە تۇسكەن. ال شىعىس جوسپارى 99,6% اتقارىلىپ, 22,4 ترلن تەڭگە بولعان.
يگەرىلمەگەن قاراجات — 73 ملرد تەڭگە.
ۇلتتىق قوردىڭ اكتيۆتەرى 13,4% ۇلعايىپ, 60 ملرد دوللارعا جەتكەن. بيۋدجەت قاراجاتىن ءتيىمسىز پايدالانۋ كولەمى 489 ملرد تەڭگە بولعان.
