جاڭالىقتار
بيۋدجەتتى ءتيىمسىز پايدالانۋ: ۇكىمەتتى سمايىلوۆ باسقارعان كەزدەگى ولقىلىقتار انىقتالدى
![](https://qandastar.kz/wp-content/uploads/2024/05/IMG_6167-780x405.jpeg)
بۇگىن ءماجىلىس وتىرىسىندا قارجى ۆيتسە-ءمينيسترى داۋرەن تەمىربەكوۆ ۇكىمەتتىڭ بىلتىرعى رەسپۋبليكالىق بيۋدجەتتىڭ اتقارىلۋى تۋرالى ەسەبىن تانىستىردى. «2023 جىلى بيۋدجەت قاراجاتىن ءتيىمسىز پايدالانۋ كولەمى 489 ملرد تەڭگە بولعان», – دەدى ول. ەسەپتەگى مالىمەت بويىنشا, 87 ملرد تەڭگە – 2023 جىلعا بولىنگەن كۆازيمەملەكەتتىك سەكتور سۋبەكتىلەرىنىڭ شوتتارىنىڭ قالدىقتارى. 143 ميللياردتان استامى – رەسپۋبليكالىق بيۋدجەتتەن بولىنگەن يگەرىلمەگەن قاراجات, پايدالانىلماعان نىسانالى ترانسفەرتتەر مەن بيۋدجەتتىك كرەديتتەر. ۆيتسە-مينيستر قارجىنىڭ ءتيىمسىز يگەرىلگەنى تۋرالى اقپارات جوعارعى ەسەپ پالاتاسىنىڭ اقپاراتىندا بەرىلەتىنىن ايتتى.
«بيۋدجەت قاراجاتىن ءتيىمدى جانە تولىق پايدالانۋ ءۇشىن اكىمشىلەردىڭ جاۋاپكەرشىلىگىن ارتتىرۋ شارالارى قابىلداندى. 2023 جىلدىڭ قورىتىندىسى بويىنشا ورتالىق جانە جەرگىلىكتى اتقارۋشى ورگانداردىڭ بىرقاتار قىزمەتكەرلەرى تارتىپتىك جاۋاپكەرشىلىككە تارتىلدى», – دەپ قوستى ۆيتسە-مينيستر.
2023 جىلى بيۋدجەت تاپشىلىعى 3,1 ترلن تەڭگەنى نەمەسە جالپى ىشكى ءونىمنىڭ 2,6 پايىزىن قۇرادى. «100 ملرد تەڭگە تولىق يگەرىلمەگەن. ونىڭ 27 ميلليارد تەڭگەسى مەملەكەتتىك رەزەرۆتەن ۇنەمدەلگەن اقشا. يگەرىلمەۋدىڭ نەگىزگى سەبەپتەرى: جەتكىزۋشىلەردىڭ كەلىسىمشارت تالاپتارىن ۋاقىتىلى ورىنداماۋى, جەتكىزۋشىلەردىڭ تاۋاردى جەتكىزبەۋى, ورىندالعان جۇمىستاردى, شوت-فاكتۋرالاردى ۋاقتىلى جەتكىزبەۋى, كورسەتىلگەن قىزمەتتەردىڭ ناقتى كولەمىنە تولەم جاسالعان», – دەپ تۇيىندەدى ءسوزىن ۆيتسە-مينيستر.