Bıýdjetti tıimsiz paıdalaný: úkimetti Smaıylov basqarǵan kezdegi olqylyqtar anyqtaldy

Búgin májilis otyrysynda qarjy vıe-mınıstri Dáýren Temirbekov úkimettiń byltyrǵy respýblıkalyq bıýdjettiń atqarylýy týraly esebin tanystyrdy. «2023 jyly bıýdjet qarajatyn tıimsiz paıdalaný kólemi 489 mlrd teńge bolǵan», – dedi ol. Eseptegi málimet boıynsha, 87 mlrd teńge – 2023 jylǵa bólingen kvazımemlekettik sektor sýbektileriniń shottarynyń qaldyqtary. 143 mıllıardtan astamy – respýblıkalyq bıýdjetten bólingen ıgerilmegen qarajat, paıdalanylmaǵan nysanaly transfertter men bıýdjettik kredıtter. Vıe-mınıstr qarjynyń tıimsiz ıgerilgeni týraly aqparat Joǵarǵy esep palatasynyń aqparatynda beriletinin aıtty.

«Bıýdjet qarajatyn tıimdi jáne tolyq paıdalaný úshin ákimshilerdiń jaýapkershiligin arttyrý sharalary qabyldandy. 2023 jyldyń qorytyndysy boıynsha ortalyq jáne jergilikti atqarýshy organdardyń birqatar qyzmetkerleri tártiptik jaýapkershilikke tartyldy», – dep qosty vıe-mınıstr.

2023 jyly bıýdjet tapshylyǵy 3,1 trln teńgeni nemese jalpy ishki ónimniń 2,6 paıyzyn qurady. «100 mlrd teńge tolyq ıgerilmegen. Onyń 27 mıllıard teńgesi memlekettik rezervten únemdelgen aqsha. Igerilmeýdiń negizgi sebepteri: jetkizýshilerdiń kelisimshart talaptaryn ýaqytyly oryndamaýy, jetkizýshilerdiń taýardy jetkizbeýi, oryndalǵan jumystardy, shot-faktýralardy ýaqtyly jetkizbeýi, kórsetilgen qyzmetterdiń naqty kólemine tólem jasalǵan», – dep túıindedi sózin vıe-mınıstr.