چەلاح پەن كۇلەكباەۆ بوستاندىققا شىعا ما: ءومىر بويىنا سوتتالعاندار شارتتى تۇردە مەرزىمىنەن بۇرىن بوساتىلماق

“كونستيتۋتسيانىڭ 15-بابىندا ءولىم جازاسىن قولدانۋعا تىيىم سالىنعان, ال قىلمىستىق جانە قىلمىستىق-اتقارۋ زاڭنامالارىنان وعان قاتىستى نورمالار الىنىپ تاستالدى. وسىلايشا, قىلمىستىق كودەكستەگى بۇل سوتتالۋشىلار توبىنا قاتىستى شەكتەۋدى ساقتاۋ كونستيتۋتسياعا سايكەس كەلمەيدى”, – دەلىنگەن تۇسىنىكتەمەدە.

ادۆوكاتتاردىڭ ايتۋىنشا, ءبىر كەزدەرى قىلمىستىق كودەكستە ءولىم جازاسى قاراستىرىلعان ەدى. كەيىن ول ءومىر بويىنا باس بوستاندىعىنان ايىرۋ جازاسىمەن اۋىستىرىلدى, الايدا زاڭدا قۇقىقتىق قايشىلىق تۋدىراتىن نورمالار قالىپ قويعان. ء“ومىر بويىنا باس بوستاندىعىنان ايىرۋ” دەگەن تۇجىرىم, ءمانى بويىنشا, ادام ءومىرىنىڭ سوڭىنا دەيىن بوساتىلمايدى دەگەن ءسوز. بىراق ءىس جۇزىندە مۇنداي سوتتالۋشىلار 25 جىل تۇرمەدە وتىرعان سوڭ شارتتى تۇردە مەرزىمىنەن بۇرىن بوستاندىققا شىعۋى مۇمكىن.

ءومىر بويىنا باس بوستاندىعىنان ايىرۋ جازاسى ادام ولىمىمەن اياقتالعان تەرروريستىك اكتىلەر, اسا قاتىگەزدىكپەن جاسالعان كىسى ءولتىرۋ نەمەسە پەدوفيليا سياقتى اسا اۋىر قىلمىس جاساعاندارعا تاعايىندالادى. وتكەن جىلى پەدوفيليا ءۇشىن ءومىر بويىنا باس بوستاندىعىنان ايىرۋ جازاسى ەنگىزىلگەن ەدى.

ەسكە سالايىق, 2012 جىلى مامىردىڭ 27-سىنەن 28-ىنە قاراعان ءتۇنى الماتى وبلىسىنىڭ «ارقانكەرگەن» شەكارا بەكەتىندە 14 شەكاراشى جانە ءبىر قورىقشى قازا تاپتى. امان قالعان ون بەسىنشى سارباز ۆلاديسلاۆ چەلاح شەكارا بەكەتىنەن 20 شاقىرىم جەردە ورنالاسقان قىستاۋدان تابىلدى. تەرگەۋ جۇمىسى بارىسىندا ۆ.چەلاح باستى كۇدىكتى رەتىندە قاراستىرىلىپ, قاماۋعا الىندى. بۇل ءىس بويىنشا سوت ۇكىمى 2012 جىلى 11 جەلتوقساندا شىعىپ, سوت چەلاحتى 15 ادامدى ءولتىردى دەپ تانىدى. ول ءومىر بويىنا باس بوستاندىعىنان ايىرىلدى. رۋسلان كۇلەكباەۆ – 10 ادامنىڭ ءومىرىن قيعان تەراكت ءۇشىن ءومىر بويىنا سوتتالعان. ول الماتىدا پوليتسەيلەرگە شابۋىل جاساعان. تۇرمەلەردە ءومىر بويىنا باس بوستاندىعىنان ايىرىلعان وزگە دە قاۋىپتى قىلمىسكەرلەر بار. ولاردىڭ ناقتى سانى تۋرالى بۇگىنگى تاڭدا اقپارات جوق.

شارتتى تۇردە مەرزىمىنەن بۇرىن بوساتۋ شاراسى – سوتتالۋشى 25 جىلىن وتەگەن جاعدايدا, وڭ مىنەزدەمەگە يە بولىپ, قوعام ءۇشىن ەندى قاۋىپ توندىرمەيتىنىن دالەلدەگەن كەزدە عانا قولدانىلادى.