جاڭالىقتار
چل: «قايرات» قاقپاشىسى تۋرالى نە بىلەمىز?
فوتو: اشىق دەرەككوز
الماتى فۋتبولىندا جاڭا قاھارمان پايدا بولدى. «قايرات» قاقپاشىسى تەمىرلان اناربەكوۆ چەمپيوندار ليگاسىنىڭ توپتىق كەزەڭىنە جولداما سىيلاعان تاريحي ماتچتىڭ باستى كەيىپكەرى اتاندى. 21 جاستاعى قاقپاشىنى نەگە جانكۇيەرلەر قازىردىڭ وزىندە قازاق فۋتبولىنىڭ جاڭا جۇلدىزى دەپ اتاي باستادى? بۇل تۋرالى qandastar.kz Vesti.kz-كە سىلتەمە جاساپ حابارلايدى.
شوتلانديالىق «سەلتيككە» قارسى قارىمتا ويىندا اناربەكوۆ ءوز شەبەرلىگىن تولىق كورسەتتى. پەنالتي سەرياسىندا ول قاتارىنان ءۇش سوققىنى قايتارا ءبىلدى. ناتيجەسىندە «قايرات» 3:2 ەسەبىمەن جەڭىسكە جەتىپ, باستى ەۋروكۋبوكتىڭ توپتىق كەزەڭىنە شىقتى (نەگىزگى ۋاقىت – 0:0).
اتىراۋدان «قايراتتىڭ» نەگىزگى قۇرامىنا دەيىن
2003 جىلدىڭ 14 قازانىندا اتىراۋدا تۋعان تەمىرلان العاشقى فۋتبول قادامىن سول قالادا جاسادى. 2017 جىلى «قايرات» اكادەمياسىنا اۋىسىپ, 2022 جىلى نەگىزگى قۇرامعا كوتەرىلدى. ال 2024 جىلى تاجىريبە جيناۋ ءۇشىن استانالىق «جەڭىستە» جالعا وينادى.
«سەلتيكپەن» كەزدەسۋدە ول كەزدەيسوق الاڭعا شىقتى – العاشقى ماتچتا نەگىزگى قاقپاشى الەكساندر زارۋتسكي جاراقات العان بولاتىن. دەگەنمەن, جاس ويىنشى بۇل مۇمكىندىكتى ءتيىمدى پايدالانىپ, جانكۇيەرلەردىڭ جۇرەگىن جاۋلاپ الدى.
ماۋسىمداعى جەتىستىكتەرى
2025 جىل تەمىرلان ءۇشىن ەرەكشە ماۋسىم بولدى. بارلىق جارىستاردا ول 11 ويىندا الاڭعا شىعىپ, نەبارى 7 گول جىبەردى جانە 7 ماتچتا قاقپاسىن «قۇرعاق» ساقتادى. بىراق باستى ەرلىگى – ءدال «سەلتيككە» قارسى ويىن.
ءبىر كۇندە جۇلدىزعا اينالعان قاقپاشى
ماتچ الدىندا ونىڭ Instagram پاراقشاسىندا بار بولعانى ەكى مىڭعا جۋىق وقىرمان بولسا, ويىننان كەيىن بۇل كورسەتكىش 40 مىڭعا جۋىقتادى. ەندى اناربەكوۆ تەك «قايراتتىڭ» ويىنشىسى عانا ەمەس, كلۋبتىڭ تاريحي جەڭىسىنىڭ سيمۆولىنا اينالدى.
بولاشاعى جارقىن قاقپاشى
جاسى 21-دە بولسا دا, تەمىرلان اناربەكوۆ قازاقستان فۋتبولىنىڭ تاريحىنا ەسىمىن جازىپ ۇلگەردى. الدا ۇلتتىق قۇرامانىڭ 2026 جىلعى الەم چەمپيوناتىنا ىرىكتەۋ ويىندارى كۇتىپ تۇر. جانكۇيەرلەر جاس قاقپاشىنىڭ بۇل دەڭگەيدە دە ءوزىن دالەلدەي الاتىنىنا سەنىمدى.
