«Dál qazir qıyn jaǵdaıdamyn»: «Dıkıı» Armannyń áıeli halyqqa úndeý jasady

20 jylǵa bas bostandyǵynan aıyrylǵan Arman Jumageldıevtiń jary Aıkól Alıkjanova áleýmettik jelide jazba jarııalady, dep habarlaıdy Qandastar.kz

“Myna vıdeoda apam, Armanym jáne Marııam Medına qyzym tórteýimiz. Bul meniń eń súıikti vıdeolarymnyń biri. Bul jerde biz óte baqytty edik. Úlken úı satyp alamyz, sol jerde qyzymyzdy birge ósiremiz dep armandaýshy edik. Alla bizge az synaq bermedi. Enemdi óte jaqsy kórdim. Enem meniń qorǵanym edi. Qıyn sáttegi qoldaýshym edi. Onyń ómirden ótkenine sene almastaı qıyn jaǵdaıdamyn. Ony tósegine kelip, burynǵydaı qushaqtaı almaımyn. Ol burynǵydaı Marııam ekeýimizdi kútip almaıdy. Enemniń denesin ózim jýdym. Jas sábıdeı ıisi ańqyp turdy. Juma kúni ketti. Ol sheıit boldy dep úmittenemin”, – dep jazdy.

Aıta keteıik, jaqynda sottalýshynyń anasy dúnıeden ozǵan edi.

Eske salaıyq, Arman Jumageldıev 2022 jylǵy qańtardaǵy jappaı tártipsizdikterge baılanysty 20 jylǵa bas bostandyǵynan aıyrylǵan edi. Qylmys áleminiń serkesi jappaı tártipsizdikterge qatysyp, olardy uıymdastyrǵany, adam urlap, onyń ólimine sebep bolǵany, sondaı-aq adamdy zańsyz bostandyqtan aıyrǵany úshin kináli dep tanyldy. Oǵan 10 jyl boıy qoǵamdyq-saıası jáne pýblııstıkalyq qyzmetpen aınalysýǵa tyıym salyndy.