جاڭالىقتار
“دالا قىراندارى”: استانادا 2000 جاس ەسىرتكىگە قارسى شارادا بىرىكتى
استانادا سينتەتيكالىق ەسىرتكىنى تاراتۋشىلارعا قارسى بۇرىن-سوڭدى بولماعان «ساتقىندار» ناۋقانى ءوتتى. ماڭىزدى شاراعا ەكى مىڭنان استام جاس جۇمىلىپ, قوعامدىق ىندەتكە قارسى ءۇنىن جەتكىزدى, – دەپ جازادى qandastar.kz
شاراعا الەمنىڭ ءتورت دۇركىن رەكوردشىسى, گيننەس كىتابىنىڭ رەكوردشىسى سەرگەي تسيرۋلنيكوۆ, «رەكاۆەري-پاۆلودار» بىرلەستىگىنىڭ كوورديناتورى سەرگەي لاپتەۆ, سونداي-اق «دالا قىراندارى» كوورديناتورلارى – مما بويىنشا الەم چەمپيونى جانە استانا قالاسى جاستار ءماسليحاتىنىڭ دەپۋتاتى ۆاسيلي تاحتاي, دۇنيەجۇزىلىك بوكس سەرياسىنىڭ (WCB) ەكى دۇركىن الەم چەمپيونى مەربولات تويىتوۆ پەن قازاق كۇرەسىنەن الەم چەمپيوناتىنىڭ جۇلدەگەرى نۇرعالي تۇرسىنعازيەۆ, نۇربول سەيىتقاليەۆتەر قاتىستى.
قوزعالىسقا Shiza, HiRo جانە Yerbolat سياقتى تانىمال رەپەرلەر قولداۋ تانىتتى. رەسمي بولىمنەن كەيىن «دالا قىراندارى» جاساقتارى استانانىڭ كوشەلەرىن ارالاپ, ەسىرتكى ساتۋشىلارعا قارسى ءىس-قيمىلدارعا كومەكتەستى.
-ەسىرتكىگە ەلتىگەن, كەزەكتى دوزا ىزدەگەن تالاي ادام قارىزعا باتتى, زاڭ بۇزىپ, قىلمىسقا ۇرىندى. تىعىرىققا تىرەلىپ, ومىردە باسقا قىزىق-قۇمار تاپپاي, وزىنە قول سالعاندار جەتەرلىك. پرەزيدەنت سوندىقتاندا ۇلتتىق قۇرىلتايدا دا ۇلتىمىزعا قاۋىپ توندىرەتىن, جاستاردى قۇردىمعا قۇلاتاتىن سينتەتيكالىق ەسىرتكىمەن كۇرەستى كۇشەيتۋدى تاپسىرعان ەدى. “دالا قىراندارى” جاستار بىرلەستىگى شەت قالماي, وزەكتى شارا وتكىزدى. بارشاعا ورتاق ماقساتىمىز – ۇلتتىڭ بولاشاعىنا بالتا شاباتىن كەسەلمەن كۇرەسۋ, – دەدى ۆاسيلي تاحتاي.
ستاتيستيكاعا جۇگىنسەك, ەسىرتكى ءوندىرىسى كۇننەن كۇنگە ۇلعايىپ بارادى. ەگەر 2019 جىلى – 3, 2020 جىلى – 8 زاڭسىز ەسىرتكى زەرتحاناسى جويىلسا, 2023 جىلى ولاردىڭ سانى بىردەن 81-گە جەتكەن. بيىل ەلىمىزدە 31 جاسىرىن ەسىرتكى لابوراتورياسى جويىلعان. ۋلى زات تۇتىناتىنداردىڭ دەنى – جاستار. قىنجىلتاتىنى دا سول.
-ەسىرتكى ساۋداسى – بۇل وتە پايدالى بيزنەس, سوندىقتان ونىمەن اينالىساتىن ادامدار مورالدىق پرينتسيپتەرگە الاڭدامايدى. ناشاقورلىقپەن كۇرەس مەملەكەت ءۇشىن باسىم مىندەتتەردىڭ ءبىرى بولعانىنا قاراماستان, بۇل ىندەتتىڭ تەز تارالۋىن تەجەۋ وتە قيىن. سونىمەن قاتار ەسىرتكىنىڭ كەز-كەلگەن “قالتاعا” ارنالعان تۇرلەرى دە تابىلادى. بىراق ەسىرتكىنىڭ ءتۇرى مەن قۇنىنا قاراماستان, زاردابى بىردەي – تولىق “قۇلدىراۋ”. جاستار بۇدان اۋلاق بولۋ كەرەك, – دەدى نۇرعالي تۇرسىنعازيەۆ.
شىنىندا جاستاردىڭ وسىنداي شارالاردا بىرىگىپ, ماسەلەگە ءجىتى نازار اۋدارۋىنا ىقپال جاساۋ كۇن تارتىبىنەن تۇسپەۋى ءتيىس. بۇگىنگى “دالا قىراندارىنىڭ” باستاماسى دا وسىنى كوزدەدى جانە سول ۇدەدەن شىقتى دەپ ايتا الامىز.
