داريعا نازارباەۆاعا قاتىسى بار: ۇقك 59 ادامنىڭ جازاعا تارتىلعانىن حابارلادى

فوتو: اشىق دەرەككوز

ولار داريعا نازارباەۆانىڭ بەينەسىن قولدانىپ, «جاڭا قازاقستاندى» بولۋگە, شيەلەنىس تۋعىزۋعا, كەك الۋعا جانە ەسكى ءتارتىپتى قايتارۋعا ارەكەت ەتكەن.

ءماجىلىس دەپۋتاتى ەرمۇرات ءباپي ەسكى قازاقستاننىڭ الەۋمەتتىك جەلىلەر ارقىلى ارانداتۋشىلىق تاراتىپ, رەۆانش الۋعا تىرىسىپ جاتقانىن مالىمدەگەن بولاتىن. بۇل ماسەلەگە قاتىستى ۇلتتىق قاۋىپسىزدىك كوميتەتى (ۇقك) جاۋاپ بەردى, دەپ حابارلايدى  qandastar.kz  Orda.kz-كە سىلتەمە جاساپ.

ۇقك مالىمەتىنە قاراساق, 2024 جىلى ينتەرنەتتە زاڭسىز ارەكەتتەرگە, ونىڭ ىشىندە جاپپاي تارتىپسىزدىكتەرگە شاقىراتىن دەسترۋكتيۆتى اقپارات تاراتۋدىڭ ناقتى فاكتىلەرى تىركەلگەن.

«جۇرگىزىلگەن جۇمىس ناتيجەسىندە وسىنداي ماتەريالداردى ورنالاستىرعان 330 جەلى پايدالانۋشىسى انىقتالدى. 29 ادام قىلمىستىق جاۋاپكەرشىلىككە تارتىلدى, 30 ادام اكىمشىلىك جاۋاپكەرشىلىككە تارتىلدى. قالعاندارىنا قاتىستى الدىن الۋ شارالارى ۇيىمداستىرىلدى», دەپ مالىمدەدى ۇقك.
دەپۋتات ەرمۇرات ءباپي مانيپۋلياتسيالار ارقىلى «جاڭا قازاقستاندى» بولۋگە, شيەلەنىس تۋعىزۋعا, كەك الۋعا جانە ەسكى ءتارتىپتى قايتارۋعا ارەكەتتەر جاسالىپ جاتقانىن اتاپ وتكەن ەدى. ونىڭ ايتۋىنشا, بۇل ءۇشىن داريعا نازارباەۆانىڭ بەينەسىن دە قولدانىپ, ارازدىق تۋدىرىپ جاتىر. بۇل مالىمدەمەگە دە ۇقك تۇسىنىكتەمە بەردى.

«ساياسي سيپاتتاعى ينتەرنەت-ارانداتۋشىلىقتىڭ باسىم بولىگى ءانونيمدى تۇردە ارەكەت ەتەتىن, شەتەلدىك پلاتفورمالاردى پايدالاناتىن تاراتۋشىلاردان شىعادى. بۇل ولاردىڭ جەكە باسىن انىقتاۋ مەن سايكەستەندىرۋدە ەلەۋلى قيىندىقتار تۋعىزادى», دەپ ءتۇسىندىردى ۇقك.
ۇلتتىق قاۋىپسىزدىك كوميتەتى ەرمۇرات ءباپيدىڭ ايتقان تۇجىرىمدارىن نازارعا العانىن جانە دەپۋتاتتان قوسىمشا اقپارات بولعان جاعدايدا حابارلاۋىن سۇرادى.