Darıǵa Nazarbaevaǵa qatysy bar: UQK 59 adamnyń jazaǵa tartylǵanyn habarlady

Foto: ashyq derekkóz

Olar Darıǵa Nazarbaevanyń beınesin qoldanyp, «Jańa Qazaqstandy» bólýge, shıelenis týǵyzýǵa, kek alýǵa jáne eski tártipti qaıtarýǵa áreket etken.

Májilis depýtaty Ermurat Bápı eski Qazaqstannyń áleýmettik jeliler arqyly arandatýshylyq taratyp, revansh alýǵa tyrysyp jatqanyn málimdegen bolatyn. Bul máselege qatysty Ulttyq qaýipsizdik komıteti (UQK) jaýap berdi, dep habarlaıdy  qandastar.kz  Orda.kz-ke silteme jasap.

UQK málimetine qarasaq, 2024 jyly ınternette zańsyz áreketterge, onyń ishinde jappaı tártipsizdikterge shaqyratyn destrýktıvti aqparat taratýdyń naqty faktileri tirkelgen.

«Júrgizilgen jumys nátıjesinde osyndaı materıaldardy ornalastyrǵan 330 jeli paıdalanýshysy anyqtaldy. 29 adam qylmystyq jaýapkershilikke tartyldy, 30 adam ákimshilik jaýapkershilikke tartyldy. Qalǵandaryna qatysty aldyn alý sharalary uıymdastyryldy», dep málimdedi UQK.
Depýtat Ermurat Bápı manıpýlıaııalar arqyly «Jańa Qazaqstandy» bólýge, shıelenis týǵyzýǵa, kek alýǵa jáne eski tártipti qaıtarýǵa áreketter jasalyp jatqanyn atap ótken edi. Onyń aıtýynsha, bul úshin Darıǵa Nazarbaevanyń beınesin de qoldanyp, arazdyq týdyryp jatyr. Bul málimdemege de UQK túsinikteme berdi.

«Saıası sıpattaǵy ınternet-arandatýshylyqtyń basym bóligi anonımdi túrde áreket etetin, sheteldik platformalardy paıdalanatyn taratýshylardan shyǵady. Bul olardyń jeke basyn anyqtaý men sáıkestendirýde eleýli qıyndyqtar týǵyzady», dep túsindirdi UQK.
Ulttyq qaýipsizdik komıteti Ermurat Bápıdiń aıtqan tujyrymdaryn nazarǵa alǵanyn jáne depýtattan qosymsha aqparat bolǵan jaǵdaıda habarlaýyn surady.