دارىگەرلەر تانىمال دۋباي شوكولادىنىڭ دەنساۋلىققا قاۋىپتى ەكەنىن ەسكەرتتى

فوتو: Ozon.ru

بۇل ءتاتتى سوڭعى بىرنەشە ايدا ناعىز حيتكە اينالدى. دۋباي شوكولادىن بلوگەرلەر مەن اتاقتى ادامدار ماقتاپ, بۇدان ءدامدى ەشنارسە جەپ كورمەگەندەرىن ايتادى. الايدا دارىگەرلەر بۇل ءتاتتىنىڭ تەك ارتىق سالماققا عانا ەمەس, جالپى دەنساۋلىققا دا زيان ەكەنىن ەسكەرتىپ جاتىر. ونىڭ قۇرامىن جانە دەنساۋلىققا قالاي اسەر ەتەتىنىن «دوكتور پيتەر» ساراپشىلارمەن بىرگە زەرتتەپ كوردى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

تانىمال ءتاتتى قولدان جاسالادى. ونىڭ قۇرامىندا بەلگيالىق ءسۇتتى شوكولاد, فيستاشكا نەمەسە كۇنجىت پاستاسى, كاتايفي قامىرى بار. سوڭعى ءونىم باستاپقىدا شىعىستا قولدانىلعان, قامىر وتە جىڭىشكە اق جىپتەر ءتارىزدى شيەلەنىسكەن كۇيدە بولادى. ونىڭ قۇرامىنا ادەتتەگى ينگرەديەنتتەر كىرەدى: سۋ, تۇز, ۇن جانە تاۋىق جۇمىرتقاسى.

ء«تاتتى پاستا مەن شوكولاد, وعان قوسا قامىر – بۇل ناعىز كومىرسۋ بومباسى سياقتى ەستىلەدى. مۇنداي ءونىم دەنساۋلىققا زيان بولۋى مۇمكىن», – دەيدى دارىگەر-توكسيكولوگ ميحايل كۋتۋشوۆ.

فيستاشكا پاستاسى مەن كاتايفي قامىرىنان باسقا شوكولادتىڭ قۇرامىندا ەكزوتيكالىق جەمىستەر, جاڭعاقتار, دامدەۋىشتەر, ءسۇت ونىمدەرى, سونداي-اق بوياعىشتار مەن كونسەرۆانتتار ءجيى كەزدەسەدى. مۇنىڭ ءبارى دەسەرتتى وتە كالوريالى ەتەدى, ال كەيبىر ينگرەديەنتتەر اللەرگيا تۋدىرادى.

«وكىنىشكە قاراي, تانىمال دەسەرتتى جەگەننەن كەيىن ءبىر قىزدىڭ اۋزى قىشي باستاعان. بىرنەشە سەكۋندتان سوڭ ول قاتتى تۇنشىعىپ, جوتەلىپ, دەنەسى قىشىپ, كوزى ءىسىنىپ, اقىرىندا ەسىن جوعالتا باستاعان. كۆينكە ىسىگىن تۋدىرعان ناقتى ينگرەديەنتتى ايتۋ قيىن, بىراق بۇل جاعداي قۇرامىن بىلمەيتىن شوكولادتى باقىلاۋسىز تۇتىنۋدىڭ قاۋپىن ايقىن كورسەتەدى», – دەپ اتاپ ءوتتى دارىگەر.

ءتىپتى ەرەكشە ءتاتتى اللەرگيالىق رەاكتسيا تۋدىرماسا دا, ادامنىڭ اسقازان-ىشەك جولدارىنا قيىندىقتار تۋدىرۋى مۇمكىن.

دارىگەرلەردىڭ ايتۋىنشا, دۋباي شوكولادىندا كالوريا مەن مايدىڭ مولشەرى كوپ. سەبەبى بۇل ديارەيا, اسقازان قىجىلى جانە ءىشتىڭ كەبۋى سياقتى ماسەلەلەرگە اكەلەدى. سونىمەن قاتار ەگەر وسىنداي تاتتىلەردى ءجيى تۇتىناتىن بولساڭىز, سالماق ماسەلەسىنەن قاشىپ قۇتىلا المايسىز. سەمىزدىك قاۋپى ارتىپ, شوكولادتاعى قانتتىڭ جوعارى كونتسەنتراتسياسى قانت ديابەتى بار ادامداردىڭ دەنساۋلىعىن ناشارلاتادى.

ەكسپەرت كاتايفي قامىرى كوپ مولشەردە مايعا قۋىرىلىپ دايىندالاتىنىن جانە ونىڭ كالورياسىن ودان ارى ارتتىراتىنىن ايتتى. بۇعان قوسا, وندىرۋشىلەر ءجيى قولداناتىن ينگرەديەنتتەردىڭ ساپاسىن جاسىرۋى مۇمكىن. ياعني قامىر, شوكولاد جانە پاستا ساپاسىز بولۋى ىقتيمال. سونداي-اق بوياعىشتار مەن كونسەرۆانتتاردى ۇمىتپاۋ كەرەك.
اسقازان-ىشەك جولدارىنىڭ ماسەلەلەرى مەن انافيلاكتيكالىق شوكتان باسقا, كومىرسۋلار مەن قانتتىڭ وسىنداي مولشەرى ۇيقى بەزى بۇزىلىپ, ءوت قابىنداعى ماسەلەلەرى ءورشىپ كەتەدى. بۇل اسىرەسە وتىندە تاسى بار ادامدار ءۇشىن قاۋىپتى حولەتسيستيتتى قوزدىرۋى ىقتيمال.

«جاڭعاقتار مەن تۇقىمدارعا ۇيرەنبەگەن ادامدار جەدەل جاردەم شاقىرىپ, تىنىس الۋدىڭ قيىنداۋىمەن جانە قاتتى ىسىنۋلەرمەن شاعىمدانىپ جاتىر. ويتكەنى ولاردىڭ اللەرگياسى بار ەكەنىن بىلمەگەن», – دەدى تەراپەۆت ناتاليا زۋبارەۆا.

ميحايل كۋتۋشوۆتىڭ ايتۋىنشا, ەگەر ادام بۇل شوكولاد ءتۇرىن سىناپ كورۋگە شەشىم قابىلداسا, كەلەسى نارسەلەرگە نازار اۋدارۋ قاجەت. بىرىنشىدەن, دەسەرتتىڭ قۇرامىندا بولۋى مۇمكىن اللەرگەندەردى تەكسەرۋ كەرەك. ەكىنشىدەن, قىشۋ, قىجىل, ەنتىگۋ نەمەسە باسقا دا جاعىمسىز بەلگىلەر پايدا بولسا, دەرەۋ دارىگەرگە جۇگىنۋ كەرەك. جاعدايدىڭ سەبەبىن انىقتاپ, ءتيىستى ەم قابىلداعان ءجون.

زۋبارەۆا ءوز كەزەگىندە, بۇل دەسەرتتى ۇناتاتىن ادامدارعا ونى ۇيدە وزدەرى دايىنداۋدى ۇسىنادى. وسىلايشا, كاتايفي قامىرىنىڭ ساپاسىن تاڭداپ, فيستاشكا پاستاسىن ازايتىپ, ءسۇتتى شوكولادتىڭ ورنىنا اششى شوكولاد قوسۋعا بولادى. مۇنىڭ ءبارى تاعامنىڭ كالورياسىن ازايتىپ, تاتتىگە قۇمار جانداردى قاۋىپتى سالدارلاردان ساقتاۋعا مۇمكىندىك بەرەدى.

ەسكە سالايىق, بۇعان دەيىن ەلوردا پوليتسەيلەرى قازىر ترەندكە اينالعان دۋباي شوكولادىن ينتەرنەتتە جارنامالاعان الاياقتاردى انىقتاعانىن جازدىق. جەرگىلىكتى تۇرعىنداردىڭ ءبىرى الاياقتارمەن حات الماسىپ, تولەم مەن جەتكىزۋ جولدارىن تالقىلاپ, شامامەن 15 مىڭ تەڭگەگە ءبىر پليتكا شوكولادقا تاپسىرىس بەرگەن. اقشانى بانك كارتاسىنا اۋدارعاننان كەيىن الاياقتار ونى بۇعاتتاپ تاستاعان. جابىرلەنۋشى الدانعانىن تۇسىنگەن سوڭ پوليتسياعا جۇگىنگەن. وسىنداي شاعىممەن بەس جابىرلەنۋشى جۇگىنگەن.