Dáýlet Muqaev er balalar qandaı kitap oqýy kerektigin aıtty

Foto: ashyq derekkóz

QR Parlamenti Májilisiniń depýtaty Dáýlet Muqaev «Ujdan» Ákeler alańyna bergen suhbatynda ákesinen alǵan tálim-tárbıesi men úlgi etken ónegesi týraly aıtyp berdi, – dep habarlaıdy qandastar.kz

«Meniń ákem óte qarapaıym eńbek adamy. Ol bizge árdaıym adal bolyńdar, bilimge umtylyńdar jáne eshkimge ózdiginen tıispeńder, ózi birinshi bastap tıisti me onda ony aıama dep qulaǵymyzǵa quıyp ósirdi. Ákem bul sózderdi er bala bolǵandyqtan jıi aıtqan bolar dep oılaımyn. Bala kezimizde ákem oqý-bilimge qushtar bolý kerektigin esimizge jıi salyp otyrdy. Sodan bolar kitap oqýǵa, bilim alýǵa erekshe qyzyǵýshylyq tanyttym. Bizdiń balalyq shaǵymyz toqsanynshy jyldardyń toqyraý kezeńinde ótkendikten qıynshylyqtyń ne ekenin sezinip óstik. Ol ýaqytta bizde oınaıtyn qarapaıym oıynshyq bolmady. Úıde ne bar sodan oıynshyq qurastyryp, joqtan bar jasaýdy, qırap qalǵan dúnıeni qaıta qurastyrýdy úırendik. Al qazir barlyǵy bar, múmkindik kóp, balalar óte baqytty. Biraq búginginiń balalary úshin kóp nársege qol jetkizý ońaı bolǵandyqtan, bar dúnıeniń qadirin bile bilmeıdi. Sebebi, qarapaıym oıynshyqtyń ózin kishkene ýaqytta syndyryp, qoqysqa laqtyryp jatady. Sol sebepti óz balalarymdy ákem aıtqan aqylmen tárbıelep kelemin. Áke retinde balalarymdy bilimdi, eńbekqor, adal azamat etip ósirgim keledi. О́zimniń jasym otyz ekige kelse de áli kúnge deıin ákemniń qabaǵyna qarap, túıini sheshilmegen máseleni sol kisimen aqyldasyp otyramyn. Áke-sheshemiz qasymyzda bar kezde qadirin bilýimiz kerek», – dedi Dáýlet Muqaev.

Suhbat barysynda “er balalar qandaı kitapty mindetti túrde oqýy kerek?”,- degen suraǵymyzǵa Dáýlet Muqaev “birinshi kezekte Baýyrjan Momyshulyn oqý kerek”,- dep jaýap berdi.

«О́zim ekonomıst bolǵannan keıin qarjylyq saýattylyq baǵytyndaǵy kitaptardy jıi oqımyn. Biraq, óskeleń urpaqqa Baýyrjan Momyshuly atamyz jaıly jáne Ázilhan Nurshaıyqov týraly kitaptardy jıi oqytýymyz kerek. Sondaı-aq, jastardyń otansúıgishtik qasıetin oıatatyn kitaptardy da jıi oqytýymyz kerek. Al onyń barlyǵyn biz tarıhtan alamyz. Sondyqtan siz ben biz óz tarıhymyzdy tereń túsinýimiz qajet», – dedi Dáýlet Muqaev.