جاڭالىقتار
دەمالىسقا اتتانعان اتا-انا بالاسىن اۋەجايدا قالدىرىپ كەتكەن

سۋرەت: oxu.az
اتا-اناسى مەرزىمى وتكەن تولقۇجات ءۇشىن 10 جاستاعى بالاسىن اۋەجايدا قالدىرىپ, دەمالۋعا كەتىپ قالعان, دەپ حابارلايدى qandastar.kz
وقيعا يسپانيانىڭ بارسەلونا قالاسىنداعى ەل-پرات حالىقارالىق اۋەجايىندا بولعان. تۋريستەر وتباسى تەكسەرۋ كەزىندە بالالارىنىڭ تولقۇجاتىنىڭ مەرزىمى ءوتىپ كەتكەنىن انىقتاعان. ۇشاققا وتىرۋعا رۇقسات بەرىلمەگەنىنە قاراماستان, اتا-اناسى جوسپارىنان باس تارتپاعان – ولار ۇلىن اۋەجايدا تۋىستارىن كۇتۋگە قالدىرىپ, وزدەرى رەيسپەن ۇشىپ كەتكەن.
كىشكەنتاي بالانى اۋەجاي قىزمەتكەرلەرى بايقاپ قالىپ, پوليتسياعا حابارلاعان. «ول پوليتسياعا اتا-اناسى وتانىنا ۇشىپ كەتكەنىن ايتتى», – دەپ جازدى اۋە ديسپەتچەرى الەۋمەتتىك جەلىدە.
پوليتسيا ساياحاتشىلاردى تاۋىپ, ۇلىمەن بىرگە بولىمشەگە جەتكىزگەن. ەرلى-زايىپتىنىڭ قاماۋعا الىنعانى جايلى اقپارات ناقتىلانباعان.