دەپۋتات بەرگەي رىسقاليەۆپەن قانداي بايلانىسى بارىن ايتتى

فوتو: اشىق دەرەككوز

ءماجىلىس دەپۋتاتى, زاڭگەر ابزال قۇسپان Adal ADAM youtube ارناسىنا بەرگەن سۇحباتىندا اتىراۋ وبلىسىنىڭ ەكس-اكىمى بەرگەي رىسقاليەۆقا قاتىستى پىكىر ءبىلدىردى, دەپ جازادى qandastar.kz

«ول كىسىنىڭ ادۆوكاتى بولدىم, مەن ونىمەن كاسىبي قىزمەتىم عانا بايلانىستىرادى. وتباسىمىزبەن ارالاسامىز دەپ ايتا المايمىن. رىسقاليەۆپەن 2019 جىلى شەتەلدە كەزدەسكەنىم باق-تا جارىققا شىعىپ كەتتى. نەگىزىندە وعان دەيىن دە, ودان كەيىن ۇدايى كەزدەسىپ تۇردىق, لوندوندا, پاريجدە. مىڭ تومنان اساتىن ورىس, قازاق تىلىندە جازىلعان ءىس بولدى ول كىسىدە. سونداعى اقپاراتتاردىڭ قايسىسى قاي تومدا ەكەنىن اعىلشىن ارىپتەستەرگە ايتىپ ءتۇسىندىرىپ وتىردىم» دەيدى.

دەپۋتات ابزال قۇسپان بەرگەي رىسقاليەۆقا تاعىلعان ايىپتارمەن كەلىسپەيتىنىن ايتتى.
«باسقاسىن بىلمەدىم, بەرگەي رىسقاليەۆقا تاعىلعان ايىپتار شەڭبەرىندە ونى كىنالى, قىلمىسكەر دەپ ەسەپتەمەيمىن. اتىراۋ حالقىنىڭ 90 پايىزى, ءتىپتى ودان دا اسىپ كەتۋى مۇمكىن, بەرگەيدى جاقتايتىنىنا سەنىمدىمىن. كەزىندە ەسكى جۇيەدە ساياسي ماسەلەمەن قۋعىندالعان», دەدى دەپۋتات.

ابزال قۇسپاننىڭ ويىنشا, رىسقاليەۆ ەلگە ورالعىسى كەلەدى, بىراق قازىرگى جاعدايدا مۇمكىن ەمەس.

«17 جىلعا سوتتاۋ تۋرالى ۇكىمى بار, سول بۇزىلمايىنشا ول قازاقستانعا كەلە المايدى. مەنىڭشە, رىسقاليەۆ ەلگە كەلگىسى كەلەدى دەپ ويلايمىن. ول وتە اۋىلدان شىققان قازاقى تۇلعا», – دەدى دەپۋتات.