Depýtat Bergeı Rysqalıevpen qandaı baılanysy baryn aıtty

Foto: ashyq derekkóz

Májilis depýtaty, zańger Abzal Quspan Adal ADAM youtube arnasyna bergen suhbatynda Atyraý oblysynyń eks-ákimi Bergeı Rysqalıevqa qatysty pikir bildirdi, dep jazady qandastar.kz

«Ol kisiniń advokaty boldym, men onymen kásibı qyzmetim ǵana baılanystyrady. Otbasymyzben aralasamyz dep aıta almaımyn. Rysqalıevpen 2019 jyly shetelde kezdeskenim BAQ-ta jaryqqa shyǵyp ketti. Negizinde oǵan deıin de, odan keıin udaıy kezdesip turdyq, Londonda, Parıjde. Myń tomnan asatyn orys, qazaq tilinde jazylǵan is boldy ol kiside. Sondaǵy aqparattardyń qaısysy qaı tomda ekenin aǵylshyn áriptesterge aıtyp túsindirip otyrdym» deıdi.

Depýtat Abzal Quspan Bergeı Rysqalıevqa taǵylǵan aıyptarmen kelispeıtinin aıtty.
«Basqasyn bilmedim, Bergeı Rysqalıevqa taǵylǵan aıyptar sheńberinde ony kináli, qylmysker dep eseptemeımin. Atyraý halqynyń 90 paıyzy, tipti odan da asyp ketýi múmkin, Bergeıdi jaqtaıtynyna senimdimin. Kezinde eski júıede saıası máselemen qýǵyndalǵan», dedi depýtat.

Abzal Quspannyń oıynsha, Rysqalıev elge oralǵysy keledi, biraq qazirgi jaǵdaıda múmkin emes.

«17 jylǵa sottaý týraly úkimi bar, sol buzylmaıynsha ol Qazaqstanǵa kele almaıdy. Menińshe, Rysqalıev elge kelgisi keledi dep oılaımyn. Ol óte aýyldan shyqqan qazaqy tulǵa», – dedi depýtat.