دەپۋتات قازاقستاندا ايەلدەر ءۇشىن جۇمىس كۇنىن قىسقارتۋدى ۇسىندى

فوتو: ءماجىلىس

ءماجىلىس وتىرىسىندا دەپۋتات قاراقات ابدەن پرەمەر-مينيسترگە ساۋال جولداپ, ەلدە ايەلدەر ءۇشىن قىسقارتىلعان جۇمىس كۇنىن ەنگىزۋ ماسەلەسىن ۇسىندى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

دەپۋتاتتىق ساۋالدا “اۋىل” فراكتسياسىنىڭ دەپۋتاتى كەيىنگى جىلدارى اۋدان اكىمى قىزمەتىنە تاعايىندالعان ايەلدەر سانى 8% ارتقانىن ايتتى. دەگەنمەن بيلىكتە ايەلدەردىڭ سانىن كوبەيتۋ ءۇشىن جۇيەلى وزگەرىستەر كەرەك دەيدى.

“2023 جىلى مەملەكەتتىك قىزمەتتەگى ايەلدەردىڭ ۇلەسى 55,7% بولسا, باسشىلىق قىزمەتتەگىلەردىڭ ۇلەسى نەبارى 20,3%. تاۋەلسىزدىك العالى ساياسي لاۋازىمدا وتىرعان ايەلدەردىڭ ۇلەسى 15%-دان اسقان ەمەس. IPU Parline رەيتينگىنە سۇيەنسەك, قازاقستان ساياساتتاعى ايەلدەردىڭ ۇلەسى بويىنشا 183 ەلدىڭ ىشىندە 124-ورىندا. بۇل كورسەتكىش بويىنشا وزبەكستان الدىڭعى ورىندا. بۇل ەلدە بىلتىر پارلامەنت سايلاۋى ءوتىپ, پارلامەنتتىڭ زاڭ شىعارۋشى پالاتاسىندا ايەلدەردىڭ ۇلەسى 38% بولعان. ال قازاقستاندا ايماقتارداعى ماسليحاتتاعى ايەلدەردىڭ ۇلەسى 21%. بىراق ايماقتاردا كورسەتكىش ءارتۇرلى. مىسالى, تۇركىستان وبلىسىندا 21% عانا. ال كۆازيمەملەكەتتىك سەكتوردا نەگىزگى لاۋازىمداعى ەرلەر سانى ءالى دە باسىم”, – دەدى قاراقات ابدەن.

ماجىلىسمەن وبلىستىق اكىمدىكتەردە باسشىلىق قىزمەتتەگى ايەلدەردىڭ ۇلەسى تەك 10% ەكەنىن ايتىپ, بارلىق وبلىستى ەرلەر باسقاراتىنىن العا تارتتى. ايەلدەر ورىنباسار قىزمەتىنە تاعايىندالىپ, نەگىزگى “جۇمىس كۇشىنە” اينالعان ەكەن.

“جوعارىدا ايتىلعانداردى ەسكەرە وتىرىپ, ۇكىمەتتى ايەلدەردىڭ كوشباسشىلىعىن دامىتۋعا كومەكتەسەتىن شارالار قابىلداۋعا شاقىرامىن. الدىمەن, باسشىلىق قىزمەتكە ايەلدەردىڭ قاتىسۋىن ارتتىرۋ ماقساتىندا گەندەرلىك تەڭدىك ماسەلەلەرى بويىنشا ۇلتتىق باقىلاۋ جانە ەسەپ جۇيەسىن قۇرۋ كەرەك. ءسوزسىز ايەلدەردى باسشىلىق لاۋازىمعا تاعايىنداۋ تەك ولاردىڭ بىلىكتىلىگىنە سۇيەنە وتىرىپ جۇزەگە اسۋى كەرەك. ەكىنشىدەن, مەملەكەتتىك قىزمەت پەن كۆازيمەملەكەتتىك سەكتوردىڭ بارلىق دەڭگەيىندە ايەلدەر كوشباسشىلىعى ۇلتتىق باعدارلاماسىن ەنگىزۋ قاجەت. ۇشىنشىدەن, سكانديناۆيا ەلدەرىنىڭ تاجىريبەسىنە سۇيەنە وتىرىپ ايەلدەر ءۇشىن قىسقارتىلعان جۇمىس كۇنىن ەنگىزۋ مۇمكىندىگىن قاراستىرۋ كەرەك. بۇل وتباسى ينستيتۋتىن دامىتۋعا كومەكتەسىپ, جۇمىس ىستەيتىن ايەلدەر بالا تاربيەسىنە كوبىرەك كوڭىل بولە الادى”, – دەپ ۇسىندى ول.

سونداي-اق دەپۋتات تاۋلىك بويى جۇمىس ىستەيتىن بالاباقشالار اشىپ, جۇمىس ورىندارىندا بالالار بولمەسىن جابدىقتاۋ كەرەك دەيدى.

“اقىلى دەكرەت دەمالىسىن مەرزىمىن 2 جىلعا دەيىن ۇزارتۋ كەرەك. سونىمەن قاتار جۇمىس ورنىندا ايەلدى قورعاۋ جانە كەمسىتۋمەن كۇرەس ماقساتىنداعى قۇقىقتىق جۇمىستاردى كۇشەيتكەن ءجون”, – دەپ تۇيىندەدى ول.