دەپۋتات: قۇرىلتايدا ەل دامۋىنا باعىتتالعان ۇسىنىستار قارالدى

ۇلتتىق قۇرىلتايدىڭ العاشقى وتىرىسىندا قابىلدانعان ەڭ ماڭىزدى شەشىم — 25 قازان رەسپۋبليكا كۇنىنە ۇلتتىق مەرەكە مارتەبەسىن قايتارۋ بولدى. رەسپۋبليكا كۇنى جاي عانا داتا ەمەس, مەملەكەت باسشىسى اتاپ وتكەندەي بۇل كۇن — بىرەگەيلىگىمىزدى قالىپتاستىرىپ, بىرلىگىمىزدى نىعايتاتىن ورتاق تاريحىمىزدى, داستۇرلەرىمىزدى جانە مادەنيەتىمىزدى ەسكە سالادى. تۇركىستان جەرىندە وتكەن ەكىنشى جيىندا پرەزيدەنت ادىلەتتى قازاقستاندى ادال ازاماتتار قۇرادى, «ادىلەتتى قازاقستان – ادال ازامات» ۇعىمدارى ەل تىرەگى بولاتىن ەگىز قۇندىلىق رەتىندە ءاردايىم قاتار تۇرۋعا ءتيىس دەپ اتاپ ءوتتى.

ال اتىراۋدا وتكەن قۇرىلتايدىڭ ءۇشىنشى وتىرىسىندا مەملەكەت باسشىسى قازاقستاننىڭ تۇراقتى دامۋىنا نەگىز بولاتىن: تاۋەلسىزدىك جانە وتانشىلدىق, بىرلىك جانە ىنتىماق, ادىلدىك جانە جاۋاپكەرشىلىك, زاڭ جانە ءتارتىپ, ەڭبەكقورلىق جانە كاسىبي بىلىكتىلىك, جاسامپازدىق جانە جاڭاشىلدىق سەكىلدى جالپىۇلتتىق قۇندىلىقتاردى نازارعا قويدى. سونداي-اق ۇلتتىق قۇرىلتايدىڭ ءۇشىنشى وتىرىسىنىڭ قورىتىندىسى بويىنشا 10 زاڭ جوباسىنا باستاماشىلىق جاسالدى, ونىڭ ىشىندە 9 زاڭ قابىلداندى. ولار ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى, ۆەيپكە تىيىم سالۋ, مەملەكەتتىك ناگرادالار تۋرالى, ونوماستيكا ماسەلەلەرى, رامىزدەردىڭ بىرىڭعاي ستاندارتى ماسەلەسى, ويىن بيزنەسى, لوتەرەيا جانە لوتەرەيا قىزمەتى ماسەلەلەرى, ۆانداليزم جانە تابيعي وبەكتىلەردى قورعاۋ جونىندەگى تۇزەتۋلەر, قۇرمەتتى اتاقتار بويىنشا, ەسىرتكى ءوندىرۋ مەن ساتۋ ءۇشىن جازانى كۇشەيتۋگە باعىتتالعان تۇزەتۋلەردى قامتىدى, ال ارحەولوگيا سالاسى بويىنشا زاڭ جوباسى پارلامەنت ءماجىلىسىنىڭ جۇمىسىندا.

ۇلتتىق قۇرىلتاي — قوعام مەن بيلىك اراسىنداعى تىكەلەي ديالوگ الاڭى, ونىمەن قوسا ماڭىزدى مەملەكەتتىك ماسەلەلەردى تالقىلاۋعا, قوعامنىڭ ءارتۇرلى توپتارىنىڭ پىكىرلەرىن ەسكەرۋگە, ەلدىڭ دامۋىنا باعىتتالعان ۇسىنىستاردى قالىپتاستىرۋعا ارنالعان بىرەگەي قۇرىلىم بولىپ تابىلادى.