دەپۋتات كۇزەتشىلەر, ەدەن جۋشىلار مەن اۋلا سىپىرۋشىلاردىڭ ەڭبەكاقىسىن كوتەرۋدى ۇسىندى

فوتو: pixabay.com

ءماجىلىس دەپۋتاتى تاڭساۋلە سەرىكوۆ دەپۋتاتتىق ساۋالىندا ەدەن جۋشى, اۋلا سىپىرۋشى, كۇزەتشى, ۆاحتەر سياقتى تەحنيكالىق ماماندىقتار بويىنشا زەينەتكە شىققاندارعا قۇرمەتتى اتاقتار مەن ءتوس بەلگىلەر ەنگىزۋدى ۇسىندى, دەپ جازدى qandastar.kz

بۇل تۋرالى Stan.kzاقپارات اگەنتتىگى حابارلايدى.

دەپۋتات قوعام نازارىن ولاردىڭ مارتەبەسى مەن ەڭبەك جاعدايىن كوتەرۋگە اۋداردى.

ء«بىز جۇمىسكەردىڭ مارتەبەسىن كوتەرۋ تۋرالى ءسوز ەتكەندە, نەنى مەڭزەيمىز? مەكەمەنىڭ بەدەلىن ەمەس, سول مەكەمەدە ەڭبەك ەتىپ جۇرگەن قىزمەتكەردىڭ مارتەبەسىن كوتەرۋ جايىندا ءسوز بولۋعا تيىس. اسىرەسە قوعامنىڭ ءومىر ءسۇرۋىن قامتاماسىز ەتەتىن, كوزگە كورىنبەيتىن, بىراق اسا ماڭىزدى جۇمىس اتقاراتىن – ەدەن جۋشىلار, تەحنيكالىق قىزمەتكەرلەر, گاردەروبشىلار, كۇزەتشىلەر, ۆاحتەرلەر, اۋلا سىپىرۋشىلار جانە باسقا دا كومەكشى ماماندىق يەلەرىنىڭ مارتەبەسى مەن ەڭبەك جاعدايى –وزەكتى ماسەلە», – دەدى دەپۋتات.

ول كوبىنە باسشىلىقتا وتىرعان نەمەسە نەگىزگى ماماندارعا عانا نازار اۋدارىلاتىنىن اتاپ ءوتتى. الايدا كۇزەتشى – بىرەۋدىڭ اكەسى نەمەسە اعاسى, ال ەدەن جۋشى – بىرەۋدىڭ اناسى نەمەسە اپكەسى ەمەس پە?

ء«يا, ولاردىڭ ەڭبەگى بەدەلدى ماماندىقتار قاتارىنا جاتپاۋى مۇمكىن, بىراق ءبىز ولاردى قۇرمەتتەپ, ادامي, ازاماتتىق جانە الەۋمەتتىك مارتەبەسىن كوتەرۋگە مىندەتتىمىز. ولاردىڭ دا بالالارى بار. ولار «مەنىڭ انام – ەدەن جۋشى بولعان, اكەم – اۋلا سىپىرۋشى بولعان» دەپ ماقتانىشپەن ايتا الا ما? ءبىز سولاي ايتاتىنداي جاعداي جاساۋىمىز كەرەك. بۇگىندە بۇل جۇمىسكەرلەردىڭ جالاقىسى ەلدەگى ورتاشا دەڭگەيدەن الدەقايدا تومەن. اۋىر فيزيكالىق ەڭبەككە قاراماستان, ولار الەۋمەتتىك قورعاۋدان, جەڭىلدىكتەر مەن كاسىبي قولداۋدان ءجيى تىس قالىپ وتىر», – دەدى تاڭساۋلە سەرىكوۆ.

ءماجىلىس دەپۋتاتى بۇل قىزمەتكەرلەر ءبىر كۇن جۇمىسقا شىقپاي قالسا, كوشەلەر قوقىسقا تولىپ, كەڭسەلەردى شاڭ باسىپ, تازالىق كەتەتىنىن ايتتى.

«نەگە بىز بۇل ماسەلەگە جەتكىلىكتى كوڭىل بولمەيمىز? اۋلا سىپىرۋشىلارمەن جانە تەحنيكالىق قىزمەتكەرلەرمەن سويلەسكەندە, ولار از جالاقى, جەڭىلدىكتەردىڭ جوقتىعى جانە الەۋمەتتىك مەنسىنبەۋشىلىك ۇيرەنشىكتى شىندىققا اينالعانىن ايتادى. قازىرگى تاڭدا نەگىزگى ماسەلەلەر قاتارىندا تومەن ەڭبەكاقىنى, ناقتى الەۋمەتتىك مارتەبەنىڭ بولماۋىن, ساۋىقتىرۋ جانە دەمالىس مۇمكىندىكتەرىنىڭ شەكتەۋلى ەكەنىن, كاسىبي ءوسۋ مەن قايتا دايارلاۋ جاعدايىنىڭ جەتىسپەۋشىلىگىن اتاپ وتۋگە بولادى», – دەيدى دەپۋتات.

دەپۋتاتتىڭ ۇنىسىنى بويىنشا, اربىر مەملەكەتتىك جانە كۆازيمەملەكەتتىك مەكەمە:

— وسى ساناتتاعى قىزمەتكەرلەرگە جىلىنا ءبىر رەت مەكەمە ەسەبىنەن شيپاجايعا جولداما بەرۋى;

— 13-ءشى جالاقى تولەۋى;

— جىل سايىن ەڭبەك دەمالىسىنا شىققاندا ەكى ەڭبەكاقى كولەمىندە قوسىمشا جاردەماقى بەرۋى;

— تەگىن وقىتۋ جانە كاسىبي قايتا دايارلاۋدى قامتاماسىز ەتۋى;

— زەينەتكە شىققان تەحنيكالىق ماماندىق يەلەرىنە قۇرمەتتى اتاقتار مەن ىنتالاندىرۋ تۇرلەرىن ەنگىزۋى قاجەت.

ء«بىز كۇن سايىن تازا كەڭسەگە كىرىپ, تازا كوشەلەرمەن ءجۇرىپ, جىلى قابىلداۋعا ۇيرەنىپ قالدىق. بىراق وسىنىڭ ارتىندا «كورىنبەيتىن» ەڭبەك يەلەرى – مىڭداعان جۇمىسشى تۇرعانىن ۇمىتپاۋىمىز كەرەك. بۇل تەك ماتەريالدىق تۇرعىداعى ماسەلە ەمەس – بۇل ادامگەرشىلىك پەن ادىلدىك ماسەلەسى. جۇمىسشى ماماندىقتار جىلى جاي عانا ادەمى ۇران بولىپ قالماۋى كەرەك. ول ناقتى ارەكەتتەرمەن تولتىرىلۋى كەرەك. ال العاشقى قادام – كاسىبي يەرارحيانىڭ ەڭ تومەنگى ساتىسىنداعى ادامدارعا قامقورلىق جاساۋ», – دەدى دەپۋتات.

سونداي-اق ول وسى ساناتتاعى قىزمەتكەرلەردىڭ جالاقىسىن كوتەرۋدى قاراستىرۋدى ۇسىندى.

«ولارعا «قوعامدىق ماڭىزى بار كاسىپ يەلەرى» دەگەن مارتەبەنى زاڭ جۇزىندە بەكىتۋ; جىل سايىن مەملەكەتتىك كۆوتا ەسەبىنەن تەگىن شيپاجاي جولدامالارىن ۇلەستىرۋ جۇيەسىن ەنگىزۋ; قايتا دايارلاۋ جانە كاسىبي ءوسۋ كۋرستارىنا تەگىن قاتىسۋ مۇمكىندىگىن قامتاماسىز ەتۋ; ەدەن جۋشى, اۋلا سىپىرۋشى, گاردەروبشى سىندى تەحنيكالىق ماماندىق بويىنشا زەينەتكە شىققاندارعا قۇرمەتتى اتاقتار مەن توسبەلگىلەر ەنگىزۋ مۇمكىندىگىن قاراستىرۋ قاجەت», – دەگەن ۇسىنىس ءبىلدىردى دەپۋتات.