جاڭالىقتارقارجى جانە تولەمدەر
دەپۋتات سوتتالعان كاسىپكەر قايرات بورانباەۆتىڭ پاراليمپيادا كوميتەتىنىڭ باسشىسى قىزمەتىنە تاعايىندالۋىن سىنعا الدى
فوتو: جەكە قورىنان
ءماجىلىستىڭ جالپى وتىرىسىندا ابەنوۆ «بيۋدجەتتەن ۇرلىق جاساعانى ءۇشىن» سوتتالعان ادامنىڭ پرەزيدەنتتىڭ قاسىندا قوعامدىق شارالارعا قاتىسۋى دۇرىس ەمەس ەكەنىن ايتتى, دەپ جازادى qandastar.kz
«بيۋدجەتتەن ۇرلىق جاساعانى ءۇشىن سوتتالعان ادام پاراليمپيادا سپورتىنا جەتەكشىلىك ەتىپ, ەل نامىسىن قورعايتىن بولسا, قوعام قالاي قارايدى? مۇمكىندىگى شەكتەۋلى جاندار اراسىندا سپورتتى دامىتۋدى اقشا ۇرلاعان ادامعا سەنۋ قانشالىقتى دۇرىس», – دەيدى دەپۋتات.
ال سپورت ءمينيسترى مىرزابوسىنوۆ مينيسترلىكتىڭ بورانباەۆتىڭ جۇمىسىنا شاعىمى جوق ەكەنىن ايتتى. ونىڭ ايتۋىنشا, سوڭعى جىلدارى ەلىمىزدە پاراليمپيادا سپورتى قارقىندى دامىپ كەلەدى جانە باس حاتشى رەسمي جانە حالىقارالىق ءىس-شارالاردا كوميتەت اتىنان وكىلدىك ەتەدى.
«سوڭعى جىلدارى پاراليمپيادا كوميتەتى دامۋ جولىندا ۇلكەن جۇمىس اتقارۋدا. باسشىلىقتىڭ اۋىسۋىنا كەلەتىن بولساق, ونى تاعايىندايتىن ناقتى اتقارۋ كوميتەتى بار. بۇگىندە پاراليمپيادا كوميتەتىنىڭ جۇمىسىنا قاتىستى مينيسترلىك تاراپىنان تۇسىنىسپەۋشىلىك جوق. قوعامدىق ۇيىمنىڭ جۇمىسىنا شاعىم جوق», – دەدى مينيستر.
ەسكە سالساق, 2023 جىلدىڭ ناۋرىز ايىندا استانا سوتى قايرات بورانباەۆتى كۆازيمەملەكەتتىك سەكتوردان اقشا جىمقىرعانى ءۇشىن سەگىز جىلعا باس بوستاندىعىنان ايىردى. كەيىنىرەك ەكىنشى ساتىداعى سوت ونىڭ مەرزىمىن ەكى جىلعا قىسقارتتى. ال 2023 جىلدىڭ قاراشا ايىندا سوت بورانباەۆتىڭ مەملەكەتكە كەلتىرىلگەن زالالدى تولىعىمەن وتەگەنىن, تەرگەۋگە بەلسەندى اتسالىسقانىن جانە ىستەگەن ىسىنە وكىنگەنىن ەسكەرىپ ونى تۇرمەدەن بوساتتى. 2024 جىلدىڭ ماۋسىم ايىندا قايرات بورانباەۆ ۇلتتىق پاراليمپيادا كوميتەتىنىڭ باسشىسى بولىپ قايتا سايلانعان ەدى.
