جاڭالىقتار
دەپۋتات ۇلتتىق بانكتى ۇلتتىق قور اكتيۆتەرى جونىندە اشىق تۇردە ەسەپ بەرمەيسىڭدەر دەپ سىنادى
فوتو: stambekov.kz
ءماجىلىس دەپۋتاتى ەرلان ستامبەكوۆ ۇلتتىق قور اكتيۆتەرىن باسقارۋدا اشىقتىق جوق ەكەنىن ايتىپ, ۇلتتىق بانكتى سىنادى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
ماجىلىستە «قازاقستان ۇلتتىق قورىنداعى 69 ميلليارد دوللاردىڭ ناقتى قالاي يگەرىلىپ جاتقانىن قوعام مەن پارلامەنت نەگە ءالى كۇنگە دەيىن بىلمەيدى?» دەپ سۇراق قويعان دەپۋتات بۇل اقشانى باسقارۋعا ۇلتتىق بانك جاۋاپتى ەكەنىن ەسكە سالدى.
«ۇلتتىق قوردىڭ اكتيۆتەرىن ۇلتتىق بانك باسقارادى – بۇل 2024 جىلدىڭ اياعىندا شامامەن 69 ميلليارد دوللار بولعان. الايدا جۇمسالىم قۇرىلىمى, تاۋەكەلدەر مەن كىرىستىلىك قوعام مەن پارلامەنت ءۇشىن جابىق كۇيىندە قالىپ وتىر», – دەپ مالىمدەدى دەپۋتات.
ەسەپتەردە تولىق اقپارات بەرىلمەيتىنىن جوعارى اۋديتورلىق پالاتا دا راستاپ وتىر. اتاپ ايتقاندا, قاراجات قاي ەلدەرگە جانە قانداي ۆاليۋتادا سالىنعانى كورسەتىلمەگەن, سترەسس-تەستتەر مەن باقىلاۋ جۇيەسى تۋرالى اقپارات جوق.
«نورۆەگيالىق, سينگاپۋرلىق جانە ابۋ-دابي قورلارى سياقتى حالىقارالىق قورلار تولىق ينۆەستيتسيالىق ەسەپتەردى جاريالاپ وتىرادى, ال قازاقستاندا ءالى كۇنگە دەيىن ەسەپ بەرۋدە اشىقتىق جوق, تاۋەلسىز قاداعالاۋ ورگانى دا جوق», – دەدى ستامبەكوۆ.
ونىڭ ايتۋىنشا, ۇلتتىق بانك قوردىڭ اقشاسىن باسقارادى ءارى رەتتەۋشى رەتىندە ءوز-ءوزىن باقىلايدى. دەپۋتات مۇندا مۇددەلەر قاقتىعىسى بولۋى مۇمكىن ەكەنىن دە العا تارتتى.
«نەگە ۇلتتىق بانك ۇلتتىق قوردى باسقارۋدىڭ حالىقارالىق اشىقتىق ستاندارتتارىن الى كۇنگە دەيىن ەنگىزبەي وتىر جانە ەسەپ بەرۋدى قامتاماسىز ەتەتىن جانە مۇددەلەر قاقتىعىسىن جوياتىن سىرتقى باقىلاۋ, باقىلاۋ كەڭەسى نەمەسە باسقا تەتىك قۇرۋ جوسپاردا بار ما?», – دەپ سۇرادى ستامبەكوۆ.
بۇعان جاۋاپ رەتىندە ۇلتتىق بانك توراعاسىنىڭ ورىنباسارى ەرۇلان جاماۋباەۆ بۇعان دەيىن ەسەپتەر شىنىمەن دە تولىق جاريالانباعانىن مويىنداپ, بيىلدان باستاپ بارى وزگەرەدى دەپ ۋادە بەردى.
«ۇلتتىق بانك بۇل قورعا قاتىستى سەنىمگەرلىك باسقارۋشى بولىپ سانالادى. سوندىقتان ۇلتتىق بانك تاراپىنان جىل سايىن ۇكىمەتكە بۇكىل ەسەپ بەرىلىپ وتىرادى. ونى قارجى مينيسترلىگى جيناقتاپ, پرەزيدەنتتىڭ جارلىعىمەن بەكىتىلەدى. بەكىتىلگەننەن كەيىن مىندەتتى تۇردە جاريالاناۋى ءتيىس. دەگەنمەن سوڭعى جىلدارى بۇل اقپارات تولىعىمەن جاريالانعان جوق, سەبەبى حالىقارالىق اربيتراجدا رەزونانستى ىستەر بولدى. جاقىن ارادا جارلىق شىعادى, بيىلدان باستاپ ەسەپ تولىعىمەن جاريالاناتىن بولادى. بۇل جەردە ءسىز ايتقان ينۆەستيتسيالىق كورسەتكىشتەر دە, مەملەكەتتەر بولىنىسىندە دە جانە تابىستىلىققا قاتىستى, ۆاليۋتاعا قاتىستى بۇكىل اقپارات بولادى», – دەدى ول.
جاماۋباەۆ مۇنداي ەسەپتەردى ۇلتتىق بانكتىڭ سايتىندا جانە اقپارات قۇرالدارىندا ۇنەمى جاريالاپ تۇرۋعا ۋادە بەردى. ول, بۇعان قوسا, قازىر دە باقىلاۋ جۇيەسىندە قور جوسپارلارىنىڭ ورىندالۋىن باقىلايتىن ارنايى كەڭەس پەن كوميسسيا بار ەكەنىن اتاپ ءوتتى.
