دەپۋتات: «ۇلتتىق قورعا» ارقا سۇيەۋدى دوعارۋ كەرەك

جاقىندا پارلامەنت ماجىلىسىندە 2024–2026 جىلدارعا ارنالعان رەسپۋبليكالىق بيۋدجەت ماسەلەسى قارالدى. پلەنارلىق وتىرىسقا ارناپ, وسى ماسەلە جونىندە «امانات» فراكتسياسىنىڭ جەتەكشىسى ەلنۇر بەيسەنباەۆ جاساعان باياندامانىڭ (قاز-قالپىندا جاريالاندى) مازمۇنى ەلدىڭ قارجىلىق احۋالى دابىل قاعارلىق جاعدايعا جەتكەنىن ايقىن اڭعارتاتىنىن ايتتى دەپ جازدى دەپۋتات ەرمۇرات باپي, دەپ حابارلايدى qandastar.kz

«جاسىراتىنى جوق, قازىرگى تاڭدا ءبىز بيۋدجەت ساياساتى بويىنشا ەلەۋلى سىن-قاتەرلەرمەن بەتپە-بەت كەلىپ وتىرمىز. بىرىنشىدەن, ول – بيۋدجەتتىڭ تەڭگەرىمسىزدىگى. بيۋدجەت قاراجاتىنىڭ باسىم بولىگى, ياعني 92 %-ى مىندەتتى شىعىستاردى جابۋعا باعىتتالعانى بەلگىلى. بۇل – ەلىمىزدى دامىتۋعا, ياعني بولاشاققا سالىناتىن ينۆەستيتسياعا نەبارى 8-اق پايىز عانا قالادى دەگەن ءسوز. مۇنداي جاعدايدا سەرپىندى دامۋ, حالىقتىڭ ءومىر ءسۇرۋ دەڭگەيىن كوتەرۋ تۋرالى ءسوز ايتۋدىڭ ءوزى ارتىق.

ەكىنشىدەن, بيۋدجەت تاپشىلىعىن جابۋ ءۇشىن, ۇلتتىق قوردان قاراجات الۋ 2024 جىلى ەڭ شەكتى دەڭگەيگە جەتتى. بيىل بيۋدجەتتىڭ كىرىس بولىگى نەبارى 13,1 ترلن تەڭگەنى قۇرادى. ياعني, بيۋدجەتكە 3 تريلليون تەڭگە كولەمىندە جوسپارلانعان سالىقتىق تۇسىمدەر تۇسپەدى.

دۇرىس جوسپارلاماۋ سالدارىنان ءۇش تريلليون تەڭگەنىڭ جەتپەۋى – سالىق جانە بيۋدجەتتىك ساياساتتىڭ كۇيرەگەنى دەگەن ءسوز ەمەس پە?! دەمەك, ۇكىمەت بيۋدجەتكە ناقتى سالىقتىق تۇسىممەن قامتاماسىز ەتىلمەگەن كىرىستى سالىپ وتىر. مۇنى ءبىز ۇكىمەتتىڭ ەكونوميكالىق بلوگىنىڭ جەتكىلىكتى دەڭگەيدە جاۋاپكەرشىلىك پەن كاسىبيلىك تانىتا الماۋى دەپ ەسەپتەيمىز», – دەدى ە.باپي.

پرەزيدەنتتىڭ قاتاڭ ەسكەرتۋىنە قاراماستان, ۇكىمەت بيۋدجەت تاپشىلىعىن جابۋ ءۇشىن, ۇلتتىق قوردان 5,6 ترلن تەڭگە, بۇعان قوسا, «قازاتومپروم» ارقىلى تاعى دا 1 تريلليون تەڭگەنى بيۋدجەت ەسەبىنەن الدى. مۇنىڭ بارلىعى – ۇلتتىق قوردىڭ قاراجاتى. سونىمەن بيىل ۇلتتىق قوردان 6,6 تريلليون, ال كەلەسى جىلى تاعى 5,3 ترلن تەڭگە الىنادى. بۇل – شامامەن 24 ميلليارد اقش دوللارىنا پارا-پار. ول – جالپى ۇلتتىق قور كولەمىنىڭ ۇشتەن بىرىنە تەڭ سوما. مۇنىڭ سوڭى قورداعى اكتيۆتەردىڭ ازايۋىنا ۇشىراتاتىنىن العا تارتادى دەپۋتات.

«بولاشاق ۇرپاقتىڭ نەسىبەسىنە قول سۇعۋدى دوعارۋ كەرەك. قازىر ونى ەلىمىزدىڭ بارلىق اتا-انالارى مەن بالالارى قاداعالاپ وتىر. ۇلتتىق قورعا ارقا سۇيەۋدىڭ دە شەگى بار. پرەزيدەنت ايتقانداي, «ۇلتتىق قور – بالالارعا!»», – دەدى ول.