جاڭالىقتار
دەپۋتاتتار نەگە وزدەرى جازعان زاڭ جوبالارىنا حالىقتىڭ كەلىسىمىن العىسى كەلمەيدى
قازاقستاندا زاڭ جوبالارى, پرەزيدەنت جارلىقتارى, ۇكىمەت قاۋلىلارى, مينيسترلەردىڭ بۇيرىقتارى, اكىمدەر مەن ءماسليحاتتاردىڭ شەشىمدەرى قابىلدانباس بۇرىن, ولاردىڭ جوبالارى «اشىق نقا» مەملەكەتتىك پورتالىندا جاريالانىپ, قوعامدىق تالقىلاۋعا شىعارىلاتىنى ءمالىم.
بۇل بيلىك پەن حالىقتىڭ ديالوگىن جولعا قويۋدىڭ ىزگى قۇرالىنا اينالدى. سەبەبى, بۇقارا وسى ارقىلى بيلىكتەگىلەردىڭ قابىلداعالى تۇرعان ساياسي شەشىمىنە تىكەلەي ارالاسىپ, ىقپال ەتەدى. قوعامنىڭ قاتاڭ سىنىنا ۇشىراپ, رەزونانس تۋدىرعان جوبالار ءارى قاراي ىلگەرىلەتىلمەيدى.
مىسالى, 2020 جىلعى جەلتوقساندا قوعامدىق تالقىعا سالىنعان «وتباسىلىق-تۇرمىستىق زورلىق-زومبىلىققا قارسى ءىس-قيمىل تۋرالى» زاڭجوبالار توپتاماسى ازاماتتاردىڭ توبە شاشىن تىك تۇرعىزدى. ويتكەنى ول بالالاردى وتباسىدان, اتا-اناسىنان سوتسىز-اق تارتىپ الۋعا مۇمكىندىك بەرەتىن. حالىقتان سۇراپىل قارسىلىق كورەمىن دەپ ويلاماعان بيلىك كەرى شەگىنىپ, بۇل قۇجاتىن 2021 جىلعى قاڭتاردا قايتارىپ الدى.
ونىڭ الدىندا پارلامەنت «گاز جانە گازبەن جابدىقتاۋ تۋرالى» زاڭىن اسىعىس, ىڭ-شىڭسىز قابىلداپ جىبەردى. 2018 جىلى قابىلدانعانىمەن, وتپەلى كەزەڭ اياقتالعاندا, 2022 جىلعى قاڭتاردا كۇشىنە ەنگەن قۇجات سۇيىتىلعان گازدى (اۆتوگازدى) بيرجا ارقىلى ساتۋدى بەكىتتى.
«زاڭ جوباسىنا باستاماشى بولۋىمىزعا قازاقستاننىڭ سۇيىتىلعان مۇناي گازى (سمگ) نارىعىنداعى احۋال تۇرتكى بولدى… بىزدە سۇيىتىلعان گازدىڭ بولشەك باعاسى كوتەرمە باعالاردان ايتارلىقتاي تومەن جانە كورشى ەلدەردەگى بولشەك ساۋدادان شامالى عانا از. سالدارىنان ءبىزدىڭ زاۋىتتار گازدى ىشكى نارىققا جەتكىزە وتىرىپ, بۇگىندە شىعىندى جۇمىس ىستەۋدە», – دەدى ءماجىلىس دەپۋتاتى (قازىر دە دەپۋتات) جانە زاڭ جوباسى اۆتورلارىنىڭ ءبىرى باقتىقوجا ىزمۇحامبەتوۆ 2018 جىلعى 2 مامىرداعى پالاتانىڭ جالپى وتىرىسىندا.
