Depýtattar nege ózderi jazǵan zań jobalaryna halyqtyń kelisimin alǵysy kelmeıdi

Qazaqstanda zań jobalary, Prezıdent jarlyqtary, Úkimet qaýlylary, mınıstrlerdiń buıryqtary, ákimder men máslıhattardyń sheshimderi qabyldanbas buryn, olardyń jobalary «Ashyq NQA» memlekettik portalynda jarııalanyp, qoǵamdyq talqylaýǵa shyǵarylatyny málim.

Bul bılik pen halyqtyń dıalogyn jolǵa qoıýdyń izgi quralyna aınaldy. Sebebi, buqara osy arqyly bıliktegilerdiń qabyldaǵaly turǵan saıası sheshimine tikeleı aralasyp, yqpal etedi. Qoǵamnyń qatań synyna ushyrap, rezonans týdyrǵan jobalar ári qaraı ilgeriletilmeıdi.

Mysaly, 2020 jylǵy jeltoqsanda qoǵamdyq talqyǵa salynǵan «Otbasylyq-turmystyq zorlyq-zombylyqqa qarsy is-qımyl týraly» zańjobalar toptamasy azamattardyń tóbe shashyn tik turǵyzdy. О́ıtkeni ol balalardy otbasydan, ata-anasynan sotsyz-aq tartyp alýǵa múmkindik beretin. Halyqtan surapyl qarsylyq kóremin dep oılamaǵan bılik keri sheginip, bul qujatyn 2021 jylǵy qańtarda qaıtaryp aldy.

Onyń aldynda Parlament «Gaz jáne gazben jabdyqtaý týraly» zańyn asyǵys, yń-shyńsyz qabyldap jiberdi. 2018 jyly qabyldanǵanymen, ótpeli kezeń aıaqtalǵanda, 2022 jylǵy qańtarda kúshine engen qujat suıytylǵan gazdy (avtogazdy) bırja arqyly satýdy bekitti.

«Zań jobasyna bastamashy bolýymyzǵa Qazaqstannyń suıytylǵan munaı gazy (SMG) naryǵyndaǵy ahýal túrtki boldy… Bizde suıytylǵan gazdyń bólshek baǵasy kóterme baǵalardan aıtarlyqtaı tómen jáne kórshi elderdegi bólshek saýdadan shamaly ǵana az. Saldarynan bizdiń zaýyttar gazdy ishki naryqqa jetkize otyryp, búginde shyǵyndy jumys isteýde», – dedi Májilis depýtaty (qazir de depýtat) jáne zań jobasy avtorlarynyń biri Baqtyqoja Izmuhambetov 2018 jylǵy 2 mamyrdaǵy palatanyń jalpy otyrysynda.